'ಎಚ್‌ಡಿಕೆಯವರಿಗೆ ಮತ ಹಾಕಿದರೆ ಅದೇ ನೀವು ನೀಡುವ ಉಡುಗೊರೆ'-ಮದುವೆ ಆಮಂತ್ರಣ ಪತ್ರಿಕೆ ವೈರಲ್‌!

•   Fri, May 06 2022 04:21:59 PM



• ತುಮಕೂರು, ಮೇ 06 (DaijiworldNews/DB): ಮದುವೆ ಆಮಂತ್ರಣ ಪತ್ರಿಕೆಯಲ್ಲಿ ಹೊಸತನ ಇತ್ತೀಚಿನ ಟ್ರೆಂಡ್. ಇಲ್ಲೊಬ್ಬ ಎಚ್‌ಡಿಕೆ ಅಭಿಮಾನಿ ಮಾತ್ರ ವಿಭಿನ್ನವಾಗಿ ಆಮಂತ್ರಣ ಪತ್ರಿಕೆ ಅಚ್ಚು ಹಾಕಿಸಿ ಗಮನ ಸೆಳೆದಿದ್ದಾರೆ. 2023ರ ಚುನಾವಣೆಯಲ್ಲಿ ಎಚ್.ಡಿ. ಕುಮಾರಸ್ವಾಮಿಯವರಿಗೆ ಮತ ಹಾಕಿದರೆ ಅದೇ ನೀವು ನೀಡುವ ಉಡುಗೊರೆ ಎಂದು ಬರೆದುಕೊಂಡಿದ್ದಾರೆ.

  ಹೌದು. ಸಾಹಿತ್ಯಿಕವಾಗಿ, ಪರಿಸರ ಪ್ರೇಮ ಮೆರೆದೋ ಅಥವಾ ಇನ್ಯಾವುದೋ ರೀತಿಯಲ್ಲಿ ಮದುವೆ ಆಮಂತ್ರಣ ಪತ್ರಿಕೆ ಪ್ರಿಂಟ್ ಹಾಕಿಸುವುದು ಇತ್ತೀಚೆಗೆ ಮಾಮೂಲಿ. ಆದರೆ, ರಾಜಕಾರಣಿಗಳ ಮೇಲಿನ ಅಭಿಮಾನವನ್ನೂ ಮದುವೆ ಆಮಂತ್ರಣ ಪತ್ರಿಕೆಯಲ್ಲಿ ತೋರಿಸುತ್ತಾರೆಂದರೆ ನೀವು ನಂಬಲೇಬೇಕು. ಕುಮಾರಸ್ವಾಮಿ ಅಭಿಮಾನಿಯಾಗಿರುವ ಪುಟ್ಟಮ್ಮ ಮತ್ತು ದಿ. ನಾಗರಾಜಪ್ಪನವರ ದ್ವಿತೀಯ ಪುತ್ರ ಎನ್. ಜಯಕುಮಾರ್ ಹಾಗೂ ಕದರಮ್ಮ ಮತ್ತು ದಿ. ಸಿದ್ಧಪ್ಪನವರ ಪುತ್ರಿ ಜ್ಯೋತಿಲಕ್ಷ್ಮೀಯವರ ಆಮಂತ್ರಣ ಪತ್ರಿಕೆಯಲ್ಲಿ ಮದುವೆಗೆ ಉಡುಗೊರೆ ಏನೂ ಬೇಡ, 2023ರ ಚುನಾವಣೆಯಲ್ಲಿ ಎಚ್.ಡಿ. ಕುಮಾರಸ್ವಾಮಿ ಅವರಿಗೆ ನೀಡುವ ಮತವೇ ನೀವು ನೀಡುವ ಉಡುಗೋರೆ ಎಂಬುದಾಗಿ ಅಚ್ಚು ಹಾಕಿಸಿದ್ದಾರೆ. ಇದನ್ನು ಆಮಂತ್ರಣ ಪತ್ರಿಕೆಯ ಮುಖಪುಟದಲ್ಲೇ ಮುದ್ರಿಸಿರುವುದು ಸದ್ಯ ಗಮನ ಸೆಳೆದಿದೆ.

  ಇಷ್ಟೇ ಅಲ್ಲದೆ, ಶ್ರೀಮತಿ ಚೆನ್ನಮ್ಮ, ಎಚ್ ಡಿ ದೇವೇಗೌಡರು, ಅನಿತಾ, ಎಚ್ ಡಿ ಕುಮಾರಸ್ವಾಮಿಯವರ ಕೃಪಾಶೀರ್ವಾದಗಳೊಂದಿಗೆ ಅಂತ ಆಮಂತ್ರಣ ಪತ್ರಿಕೆಯ ಒಳ ಭಾಗದಲ್ಲಿ ಮುದ್ರಿಸಿ ಎಚ್.ಡಿ. ದೇವೇಗೌಡ ಮತ್ತು ಎಚ್‌.ಡಿ. ಕುಮಾರಸ್ವಾಮಿಯವರ ಫೋಟೋವನ್ನು ಕೂಡಾ ಮುದ್ರಿಸಿದ್ದಾರೆ. ಒಟ್ಟಿನಲ್ಲಿ ಜಯಕುಮಾರ್ ಅವರ ಕುಟುಂಬದ ಜೆಡಿಎಸ್ ಪ್ರೇಮ ಮದುವೆ ಆಮಂತ್ರಣ ಪತ್ರಿಕೆಯಲ್ಲಿಯೂ ತೋರಿ ಬಂದಿದೆ. ಸದ್ಯ ಈ ಆಮಂತ್ರಣ ಪತ್ರಿಕೆ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗುತ್ತಿದೆ.