'ಮೋದಿಯಂತೆ ರಾಹುಲ್ ಗಾಂಧಿ ಈಜುತ್ತಾ ವಿದೇಶಕ್ಕೆ ಹೋಗಿಲ್ಲ'-ರಂಜನ್ ಚೌಧರಿ ವ್ಯಂಗ್ಯ

•   Thu, May 05 2022 02:44:50 PM



• ಕೋಲ್ಕತಾ, ಮೇ 05 (DaijiworldNews/DB): ಪ್ರಧಾನಿ ನರೇಂದ್ರ ಮೋದಿಯವರಂತೆ 13 ಸಾವಿರ ಕೋಟಿ ರೂ. ಮೌಲ್ಯದ ಈಜುಕೊಳದಲ್ಲಿ ಈಜುತ್ತಾ ರಾಹುಲ್ ಗಾಂಧಿಯವರು ವಿದೇಶಕ್ಕೆ ಹೋಗುವುದಿಲ್ಲ ಎಂದು ಕಾಂಗ್ರೆಸ್ ನಾಯಕ ಅಧೀರ್ ರಂಜನ್ ಚೌಧರಿ ವ್ಯಂಗ್ಯವಾಡಿದ್ದಾರೆ.

  ಕಾಂಗ್ರೆಸ್‌ ನಾಯಕ, ಸಂಸದ ರಾಹುಲ್‌ ಗಾಂಧಿಯವರು ನೇಪಾಳದ ಪಾರ್ಟಿಯೊಂದರಲ್ಲಿ ಮದ್ಯಹೀರುತ್ತಿರುವ ಯುವತಿಯ ಪಕ್ಕ ಕಾಣಿಸಿಕೊಂಡಿರುವ ವಿಡಿಯೋವೊಂದು ಕೋಲಾಹಲ ಸೃಷ್ಟಿಸುತ್ತಿದ್ದಂತೆ ಬಿಜೆಪಿ ವಿರುದ್ದ ಕಿಡಿ ಕಾರಿರುವ ಅವರು, ಮೋದಿಯವರ ಎರಡು ವಿಮಾನಗಳಲ್ಲಿಯೂ ಈಜುಕೊಳವಿದೆ. ಅವರು ವಿದೇಶಕ್ಕೆ ಹೋಗುವಾಗ ವಿಮಾನದಲ್ಲಿ ಈಜುತ್ತಾ ಹೋಗುತ್ತಾರೆ. ಆದರೆ ನಿಮ್ಮ ಮೋದಿಯವರಂತೆ ರಾಹುಲ್ ಗಾಂಧಿಯವರು ಮಾಡುವುದಿಲ್ಲ. ಅವರು ಹೋಗಿರುವುದು ಸ್ನೇಹಿತೆಯ ಮದುವೆಗೆ ಎಂದರು.

  ನೇಪಾಳ ನಮ್ಮ ನೆರೆ ರಾಷ್ಟ್ರ. ಯಾರು ಬೇಕಾದರೂ ಅಲ್ಲಿಗೆ ಹೋಗಬಹುದು. ರಾಹುಲ್‌ ಗಾಂಧಿಯವರು ಸ್ವಂತ ಹಣದಲ್ಲಿ ಅಲ್ಲಿಗೆ ಹೋಗಿದ್ದಾರೆ. ಮೋದಿಯವರಂತೆ ಬೇರೆ ಹಣದಲ್ಲಿ ಹೋಗಿರುವುದಲ್ಲ ಎಂದವರು ಈ ವೇಳೆ ಲೇವಡಿ ಮಾಡಿದರು.