ಧ್ವನಿವರ್ಧಕ ಬಳಕೆ : 'ಅಸಂಬದ್ಧ ವಿಚಾರದ ಬಗ್ಗೆ ಪ್ರತಿಕ್ರಿಯಿಸುವುದಿಲ್ಲ'- ನಿತೀಶ್ ಕುಮಾರ್

•   Sat, Apr 30 2022 07:32:08 PM



• ಬಿಹಾರ, ಏ 30 (DaijiworldNews/MS): ಯಾವುದೇ ಧಾರ್ಮಿಕ ಆಚರಣೆಗಳಲ್ಲಿ ನಮ್ಮ ಸರ್ಕಾರ ಹಸ್ತಕ್ಷೇಪ ಮಾಡುವುದಿಲ್ಲ ಎಂದು ಬಿಹಾರ ಮುಖ್ಯಮಂತ್ರಿ ನಿತೀಶ್ ಕುಮಾರ್ ಅವರು ಹೇಳಿದ್ದು ಪ್ರಾರ್ಥನಾ ಮಂದಿರಗಳಲ್ಲಿ ಧ್ವನಿವರ್ಧಕಗಳ ಬಳಕೆಯ ಕುರಿತ ವಿವಾದವನ್ನು ಶನಿವಾರ ತಳ್ಳಿಹಾಕಿದ್ದಾರೆ.

  ಉತ್ತರ ಬಿಹಾರ ಜಿಲ್ಲೆಯಲ್ಲಿ ಕಾರ್ಯಕ್ರಮವೊಂದರಲ್ಲಿ ಭಾಗವಹಿಸಲು ಬಂದಿದ್ದ ಅವರು ಮಾಧ್ಯಮಗಳಿಗೆ, "ನಾವು ಈ ಅಸಂಬದ್ಧತೆಯ ಬಗ್ಗೆ ಮಾತನಾಡುವುದಿಲ್ಲ. ಬಿಹಾರದಲ್ಲಿ ನಾವು ಯಾವುದೇ ರೀತಿಯ ಧಾರ್ಮಿಕ ಆಚರಣೆಗಳಲ್ಲಿ ಹಸ್ತಕ್ಷೇಪ ಮಾಡುವುದಿಲ್ಲ ಎಂಬುದು ಎಲ್ಲರಿಗೂ ತಿಳಿದಿದೆ. ಕೆಲವರು ಗಲಾಟೆ ಮಾಡುವುದನ್ನು ತಮ್ಮ ವ್ಯವಹಾರವೆಂದು ಭಾವಿಸುತ್ತಾರೆ ಅಲ್ಲದೆ ಅದನ್ನೇ ಮುಂದುವರಿಸುತ್ತಾರೆ."ಅವರು ಹೇಳಿದರು.

  ಬಿಹಾರವು ಉತ್ತರ ಪ್ರದೇಶದ "ಯೋಗಿ ಮಾದರಿ" ಯನ್ನು ಅನುಸರಿಸುತ್ತದೆ ಎಂಬ ರಾಜ್ಯದ ಬಿಜೆಪಿ ನಾಯಕರ ಹೇಳಿಕೆಗಳ ಬೆನ್ನಲ್ಲೇ ನಿತೀಶ್ ಕುಮಾರ್ ಅವರ ಈ ಹೇಳಿಕೆ ಮಹತ್ವ ಪಡೆದಿದೆ.

  ಉತ್ತರ ಪ್ರದೇಶದಲ್ಲಿ ಹೆಚ್ಚಿನ ಡೆಸಿಬಲ್ ಶಬ್ದಗಳಿಂದ ಆರೋಗ್ಯದ ಅಪಾಯಗಳನ್ನು ಉಲ್ಲೇಖಿಸಿ ಇತ್ತೀಚೆಗೆ ಸಾವಿರಾರು ಧ್ವನಿವರ್ಧಕಗಳನ್ನು ಪೂಜಾ ಸ್ಥಳಗಳಿಂದ ತೆಗೆದುಹಾಕಲಾಗಿದೆ.