ಗೋವಾದಿಂದ ಲಕ್ಷಾಂತರ ರೂ. ಮೌಲ್ಯದ ಅಕ್ರಮ ಮದ್ಯ ಸಾಗಾಟ-ಶಿವಮೊಗ್ಗ ಮೂಲದ ಇಬ್ಬರ ಬಂಧನ

•   Fri, Apr 29 2022 04:30:03 PM



• ಕಾರವಾರ, ಏ 29 (DaijiworldNews/DB): ಗೋವಾದಿಂದ ಕಾರವಾರಕ್ಕೆ ಅಕ್ರಮವಾಗಿ ಲಕ್ಷಾಂತರ ರೂ. ಮೌಲ್ಯದ ಮದ್ಯ ಸಾಗಾಟದ ಆರೋಪದ ಮೇಲೆ ಇಬ್ಬರನ್ನು ಪೊಲೀಸರು ವಶಕ್ಕೆ ಪಡೆದುಕೊಂಡಿದ್ದಾರೆ.

  ಶಿವಮೊಗ್ಗ ಮೂಲದ ನಾಗರಾಜ್ (35) ಹಾಗೂ ಸಾಗರ್ (25) ಬಂಧಿತರು.

  ಗೋವಾದಲ್ಲಿ ಕರ್ನಾಟಕಕ್ಕಿಂತ ಕಡಿಮೆ ದರದಲ್ಲಿ ಮದ್ಯ ಸಿಗುತ್ತಿದ್ದು, ಇದೇ ಕಾರಣದಿಂದ 1.27 ಲಕ್ಷ ರೂ. ಮೌಲ್ಯದ ಮದ್ಯವನ್ನು ಆರೋಪಿಗಳು ತಂದಿದ್ದಾರೆ. ಸಾಗರ-ಪಣಜಿ ನಡುವೆ ಸಂಚರಿಸುವ ಕೆಎಸ್ಸಾರ್ಟಿಸಿ ಬಸ್‌ನ್ನು ಇವರು ಹತ್ತಿದ್ದಾರೆ. ಇಬ್ಬರಲ್ಲಿಯೂ ತಲಾ ಮೂರು ಬ್ಯಾಗ್ ಇತ್ತು. ಕಾರವಾರದ ಮಾಜಾಳಿ ಚೆಕ್‌‌ಪೋಸ್ಟ್ ಬಳಿ ಅಬಕಾರಿ ಇಲಾಖೆ ಹಾಗೂ ಪೊಲೀಸರು ತಪಾಸಣೆ ನಡೆಸಿದಾಗ ಇಬ್ಬರೂ ಸಿಕ್ಕಿ ಬಿದ್ದಿದ್ದಾರೆ.

  ಇಬ್ಬರಲ್ಲಿ ತಲಾ ಮೂರು ಬ್ಯಾಗ್‌ಗಳಿರುವುದರಿಂದ ಅನುಮಾನಗೊಂಡು ತಪಾಸಣೆ ನಡೆಸಿದಾಗ ಬರೋಬ್ಬರಿ 1.27 ಲಕ್ಷ ರೂ. ಮೌಲ್ಯದ ವಿವಿಧ ಬ್ರಾಂಡ್‌ನ ಗೋವಾ ಮದ್ಯ ಪತ್ತೆಯಾಗಿದೆ. ಹೀಗಾಗಿ ಪೊಲೀಸರು ಇಬ್ಬರನ್ನೂ ವಶಕ್ಕೆ ಪಡೆದು ಪ್ರಕರಣ ದಾಖಲಿಸಿದ್ದಾರೆ.