ಹಿಮದಿಂದ ರಸ್ತೆ ಸಂಪರ್ಕ ಕಟ್-ಮದುಮಗ ಯೋಧನನ್ನು ಹೆಲಿಕಾಪ್ಟರ್‌ನಲ್ಲಿ ಕಳುಹಿಸಿದ ಬಿಎಸ್‌ಎಫ್‌

•   Thu, Apr 28 2022 06:08:25 PM



• ಶ್ರೀನಗರ, ಏ 28 (DaijiworldNews/DB): ಹಿಮದಿಂದಾವೃತವಾದ ರಸ್ತೆಯಲ್ಲಿ ಸಂಪರ್ಕ ಕಡಿತಗೊಂಡ ಕಾರಣ ಮದುಮಗ ಯೋಧನನ್ನು ವಿಶೇಷ ಹೆಲಿಕಾಪ್ಟರ್ ಮೂಲಕ ಬಿಎಸ್‌ಎಫ್ ಸಿಬಂದಿ ಶ್ರೀನಗರಕ್ಕೆ ಕರೆ ತರುವ ಶ್ಲಾಘನೀಯ ಕೆಲಸ ಮಾಡಿದ್ದಾರೆ.

  ಕಾನ್‌ಸ್ಟೆಬಲ್‌ ನಾರಾಯಣ ಬೆಹ್ರಾ ಅವರಿಗೆ ಮೇ 2ರಂದು ಕಾಶ್ಮೀರದಿಂದ 2,500 ಕಿ.ಮೀ. ದೂರದಲ್ಲಿರುವ ಒಡಿಶಾದ ಧೆನ್‌ಕನಲ್ ಜಿಲ್ಲೆಯ ಆದಿಪುರ ಗ್ರಾಮದಲ್ಲಿ ಮದುವೆ ನಿಗದಿಯಾಗಿದೆ. ಅವರು ಜಮ್ಮು- ಕಾಶ್ಮೀರದ ಗಡಿ ನಿಯಂತ್ರಣ ರೇಖೆ (ಎಲ್‌ಒಸಿ) ಬಳಿಯ ಮಚಿಲ್‌ ವಲಯದ ಪರ್ವತ ಪ್ರದೇಶದಲ್ಲಿ ಕರ್ತವ್ಯದಲ್ಲಿದ್ದು, ಅಲ್ಲಿಂದ ಊರಿಗೆ ಮರಳಲು ಹಿಮದಿಂದ ರಸ್ತೆ ಸಂಪರ್ಕ ಕಡಿತಗೊಂಡಿತ್ತು.

  ಇದರಿಂದಾಗಿ ನಾರಾಯಣ್ ಅವರ ಹೆತ್ತವರು ಆತಂಕಿತರಾಗಿದ್ದರು. ಮದುವೆ ವಿಚಾರವಾಗಿ ಹೆತ್ತವರು ಯೂನಿಟ್ ಕಮಾಂಡರ್‌ಗಳನ್ನು ಸಂಪರ್ಕಿಸಿ ಅಳಲು ತೋಡಿಕೊಂಡಿದ್ದರು. ಯೂನಿಟ್ ಕಮಾಂಡರ್‌ಗಳು ಈ ವಿಚಾರವನ್ನು ಬಿಎಸ್‌ಎಫ್‌ ಇನ್‌ಸ್ಪೆಕ್ಟರ್ ಜನರಲ್‌ (ಕಾಶ್ಮೀರ ವಿಭಾಗ) ರಾಜ ಬಾಬು ಸಿಂಗ್‌ ಅವರ ಗಮನಕ್ಕೆ ತಂದರು. ತತ್‌ಕ್ಷಣ ಅವರು ಚೀತಾ ಹೆಲಿಕಾಪ್ಟರ್‌ನ್ನು ನಿಗದಿಪಡಿಸಿ ನಾರಾಯಣ ಅವರನ್ನು ಶ್ರೀನಗರಕ್ಕೆ ಕರೆ ತರಲು ಸೂಚಿಸಿದರು. ಹೀಗಾಗಿ ಮದುವೆಗೆ ಮುನ್ನ ನಿರಾತಂಕವಾಗಿ ಮದುಮಗ ಊರು ಸೇರುವಂತಾಯಿತು.

  ಸದ್ಯ ಹಿಮಚ್ಛಾದಿತವಾಗಿರುವ ರಸ್ತೆಯಲ್ಲಿ ಸಂಪರ್ಕ ಕಡಿತಗೊಂಡಿರುವ ಕಾರಣ ಇಲ್ಲಿ ಸಂಚಾರ ಸಾಧ್ಯವಾಗುತ್ತಿಲ್ಲ. ಹೀಗಾಗಿ ವಾಯುಮಾರ್ಗವನ್ನೇ ಅವಲಂಬಿಸಬೇಕಾಗಿ ಬಂದಿದೆ ಎಂದು ಮಾಧ್ಯಮವೊಂದು ವರದಿ ಮಾಡಿದೆ.