ಪ್ರತಿಷ್ಠಿತ ಆಸ್ಪತ್ರೆಗಳ ಹೆಸರಿನ ನಕಲಿ ವೆಬ್‍ಸೈಟ್ ತೆರೆದು ಕಿಡ್ನಿದಾನಕ್ಕೆ ಆಮಿಷ - ಮೂವರ ಬಂಧನ

•   Tue, Apr 26 2022 12:02:42 PM



• ಬೆಂಗಳೂರು, ಏ 26 (DaijiworldNews/HR): ಪ್ರತಿಷ್ಠಿತ ಆಸ್ಪತ್ರೆಗಳ ಹೆಸರಿನಲ್ಲಿ ನಕಲಿ ವೆಬ್‌ಸೈಟ್‌ ಸೃಷ್ಟಿಸಿ ಕಿಡ್ನಿದಾನ ಮಾಡಿದರೆ 4 ಕೋಟಿ ರೂ. ನೀಡುವುದಾಗಿ ಜಾಹೀರಾತು ನೀಡಿ, ಹಣ ಸುಲಿಗೆ ಮಾಡುತ್ತಿದ್ದ ಮೂವರು ವಿದೇಶಿ ಪ್ರಜೆಗಳನ್ನು ಆಗ್ನೇಯ ವಿಭಾಗದ ಸೆನ್‌ ಠಾಣೆ ಪೊಲೀಸರು ಬಂಧಿಸಿದ್ದಾರೆ.

  ಬಂಧಿತರನ್ನು ನೈಜೀರಿಯಾ ಮೂಲದ ಮಿರಾಕಲ್‌ ಅಲಿಯಾಸ್‌ ಮಿಮಿ (28), ಸೋವ್‌ ಕಾಲಿನ್ಸ್‌ ನಿ (32) ಮತ್ತು ಫಾನಾ ಮೂಲದ ಮ್ಯಾಥ್ಯೂ ಇನೋಸೆಂಟ್‌ ಅಲಿಯಾಸ್‌ ಪಾಲ್‌ (38) ಎಂದು ಗುರುತಿಸಲಗಿದೆ.

  ಜಯನಗರದ ಸಾಗರ್‌ ಆಸ್ಪತ್ರೆ ಹೆಸರಿನಲ್ಲಿ ನಕಲಿ ವೆಬ್‌ಸೈಟ್‌ ತೆರೆದು ಕಿಡ್ನಿ ಕಸಿ ಮಾಡಲಾಗುತ್ತದೆ. ಕಿಡ್ನಿ ದಾನ ಮಾಡುವವರು ಹಾಗೂ ಕಿಡ್ನಿ ಅಗತ್ಯವಿದ್ದವರು ಸಂಪರ್ಕಿಸುವಂತೆ ಜಾಹೀರಾತು ನೀಡಿದ್ದರು. ಅದನ್ನು ಗಮನಿಸಿದ ಆಸ್ಪತ್ರೆಯ ಮೆಡಿಕಲ್‌ ಡೈರೆಕ್ಟರ್‌ ಮಹೇಂದ್ರ ಕುಮಾರ್‌ ನೀಡಿದ ದೂರಿನ ಮೇರೆಗೆ ಕಾರ್ಯಾಚರಣೆ ನಡೆಸಿ ಆರೋಪಿಗಳನ್ನು ಬಂಧಿಸಿ, ಅವರಿಂದ ಕೃತ್ಯಕ್ಕೆ ಬಳಸಿದ್ದ ಮೊಬೈಲ್‌ಗ‌ಳು, ಲ್ಯಾಪ್‌ಟಾಪ್‌ ಹಾಗೂ ಇತರೆ ದಾಖಲೆಗಳನ್ನು ಜಪ್ತಿ ಮಾಡಲಾಗಿದೆ.

  ಇನ್ನು ನಗರದ ಸಾಗರ್‌, ಬ್ಯಾಪ್ಟಿಸ್ಟ್‌, ಕಾವೇರಿ ಆಸ್ಪತ್ರೆ ಸೇರಿ ನಗರದ ಹತ್ತಕ್ಕೂ ಹೆಚ್ಚು ಪ್ರತಿಷ್ಠಿತ ಖಾಸಗಿ ಆಸ್ಪತ್ರೆಗಳ ಹೆಸರಿನ ನಕಲಿ ವೆಬ್‌ಸೈಟ್‌ ತೆರೆದಿದ್ದರು. ಕಿಡ್ನಿ ದಾನ ಮಾಡಿದರೆ ಮುಂಗಡ 2 ಕೋಟಿ ಹಾಗೂ ನಂತರ 2 ಕೋಟಿ ಒಟ್ಟು 4 ಕೋಟಿ ಕೊಡುವುದಾಗಿ ಜಾಹೀರಾತು ನೀಡಿದ್ದರು ಎನ್ನಲಾಗಿದೆ.