ಕೊರೊನಾ ಹೆಚ್ಚಳ - 10 ಕೋಟಿ ಲಸಿಕೆ ಉಚಿತವಾಗಿ ನೀಡಲು ಕೇಂದ್ರಕ್ಕೆ ಮನವಿ

•   Mon, Apr 25 2022 09:24:34 AM



• ನವದೆಹಲಿ, ಏ 25 (DaijiworldNews/HR): ಕೊರೊನಾ ಪ್ರಕರಣಗಳು ದೇಶದಲ್ಲಿ ಕೊಂಚ ಹೆಚ್ಚಾಗುತ್ತಿರುವ ಹಿನ್ನೆಲೆಯಲ್ಲಿ ಕೇಂದ್ರ ಸರಕಾರದ ಕೊವ್ಯಾಕ್ಸ್‌ ಸೌಲಭ್ಯದಡಿಯಲ್ಲಿ ಲಭ್ಯವಿರುವ 10 ಕೋಟಿ ಕೊವಿಶೀಲ್ಡ್‌ ಲಸಿಕೆಯನ್ನು ಸಾರ್ವಜನಿಕರಿಗೆ ಉಚಿತವಾಗಿ ನೀಡಬೇಕು ಎಂದು ಪುಣೆಯ ಸೀರಂ ಇನ್‌ಸ್ಟಿಟ್ಯೂಟ್‌ ಆಫ್ ಇಂಡಿಯಾ ಕೇಂದ್ರ ಸರಕಾರಕ್ಕೆ ಮನವಿ ಮಾಡಿದೆ.

  ಈ ಕುರಿತು ಸರ್ಕಾರಕ್ಕೆ ಪತ್ರ ಬರೆದಿರುವ ಸೀರಂ ಇನ್‌ಸ್ಟಿಟ್ಯೂಟ್‌ ಆಫ್ ಇಂಡಿಯಾ, ಸರಕಾರಿ- ಖಾಸಗಿ ಸಹಯೋಗದಡಿ ಅಸ್ತಿತ್ವಕ್ಕೆ ತರಲಾಗಿರುವ ಲಸಿಕಾ ಸಹಭಾಗಿತ್ವದಡಿ ಮೀಸಲಿಡಲಾಗಿರುವ 10 ಕೋಟಿ ಕೊವಿಶೀಲ್ಡ್‌ ಲಸಿಕೆಗಳು ಉಪಯೋಗವಾಗದೇ ಉಳಿದಿದ್ದು, ಅಮೂಲ್ಯವಾದ ಇವುಗಳ ಅವಧಿ ಮೀರಿ ಉಪಯೋಗಕ್ಕೆ ಬಾರದಂತಾಗುತ್ತವೆ. ಹೇಗಿದ್ದರೂ ದೇಶದಲ್ಲಿ ಕೊರೊನಾ ಸೋಂಕು ಹೆಚ್ಚಾಗುತ್ತಿದ್ದು, ಈ ಹಿನ್ನೆಲೆಯಲ್ಲಿ ಲಸಿಕೆಗಳನ್ನು ಉಚಿತವಾಗಿ ಸಾರ್ವಜನಿಕರಿಗೆ ನೀಡಬೇಕು ಎಂದು ಹೇಳಿದೆ.

  ಇನ್ನು ಭಾರತದಲ್ಲಿ ಮತ್ತೆ ಕೊರೊನಾ ಸೋಂಕಿನ ಪ್ರಕರಣ ವೇಗ ಪಡೆದಿದ್ದು,ಕಳೆದ 24 ಗಂಟೆಗಳಲ್ಲಿ 2,593 ಮಂದಿಗೆ ಸೋಂಕು ತಗುಲಿದ್ದು, 44 ಮಂದಿ ಸಾವನಪ್ಪಿ, ದೇಶದಲ್ಲಿ 15,873 ಸೋಂಕಿತರಿದ್ದಾರೆ.