ಶಾಲೆಗಳಿಗೆ ಬಾಂಬ್ ಬೆದರಿಕೆ-ಇಮೇಲ್ ರವಾನೆಯಾಗಿರುವುದು ಪಾಕ್‌ನಿಂದ!

•   Sun, Apr 24 2022 12:42:31 PM



• ಬೆಂಗಳೂರು, ಏ 24 (DaijiworldNews/DB): ಬೆಂಗಳೂರು ನಗರದ ಪ್ರತಿ‍ಷ್ಠಿತ ಶಾಲೆಗಳಿಗೆ ಬಾಂಬ್ ಬೆದರಿಕೆ ಹಾಕಿರುವ ಇಮೇಲ್ ಪಾಕಿಸ್ತಾನದಿಂದ ಬಂದಿದೆ ಎಂಬುದು ತನಿಖೆಯಲ್ಲಿ ಬೆಳಕಿಗೆ ಬಂದಿದೆ.

  ಶಾಲೆಗಳಲ್ಲಿ ಬಾಂಬ್ ಇರಿಸಲಾಗಿದೆ ಎಂದು ಏ. 8 ರಂದು ನಗರದ ಒಂಬತ್ತಕ್ಕೂ ಹೆಚ್ಚು ಪ್ರತಿಷ್ಠಿತ ಶಾಲೆಗಳಿಗೆ ಇಮೇಲ್ ಸಂದೇಶ ಬಂದಿತ್ತು. ಪ್ರಕರಣದ ಬೆನ್ನತ್ತಿದ್ದ ಬೆಂಗಳೂರು ಪೊಲೀಸರು ಇಮೇಲ್ ಬಂದಿರುವ ಮೂಲವನ್ನು ಜಾಲಾಡತೊಡಗಿದಾಗ ಇಮೇಲ್ ಪಾಕಿಸ್ತಾನದಿಂದ ರವಾನೆಯಾಗಿದೆ ಎಂಬುದು ಗೊತ್ತಾಗಿದೆ.

  ಬೆದರಿಕೆ ಬಂದ ದಿನದಂದು ಪರಿಶೀಲನೆ ನಡೆಸಿದಾಗ ಶಾಲೆಗಳಲ್ಲಿ ಬಾಂಬ್ ಇಡಲಾಗಿಲ್ಲ ಮತ್ತು ಇದೊಂದು ಹುಸಿ ಬಾಂಬ್ ಕರೆ ಎಂದು ಗೊತ್ತಾಗಿತ್ತು. ಆದರೆ ಪೊಲೀಸರು ಈ ಪ್ರಕರಣವನ್ನು ನಿರ್ಲಕ್ಷ್ಯ ಮಾಡದೇ ತನಿಖೆ ಮಾಡಿದಾಗ ಪಾಕಿಸ್ತಾನದಿಂದ ಬಂದಿರುವುದೆಂದು ಗೊತ್ತಾಗಿದೆ. ಸರ್ವರ್ ಜಾಡು ಹಿಡಿದು ತನಿಖೆ ಮಾಡಲಾಗಿತ್ತು. ಗೂಗಲ್ ಸಂಸ್ಥೆಯಿಂದ ಈ ಕುರಿತು ತಾಂತ್ರಿಕ ದಾಖಲೆಗಳನ್ನು ಪೊಲೀಸರು ಪಡೆದುಕೊಂಡಿದ್ದಾರೆ. ಆದರೆ ವಿದೇಶೀ ಸರ್ವರ್‌ಗಳನ್ನು ಹ್ಯಾಕ್ ಮಾಡಿ ಬೆದರಿಕೆ ಇಮೇಲ್ ರವಾನಿಸಿರುವ ಅನುಮಾನವೂ ಇದೆ ಎನ್ನಲಾಗಿದೆ. ಹೀಗಾಗಿ ಐಪಿ ಅಡ್ರೆಸ್ ಮುಖಾಂತರ ತನಿಖೆ ಆರಂಭಿಸಲಾಗಿದ್ದು, ಪಾಕಿಸ್ತಾನದಿಂದಲೇ ಬಂದಿರುವುದಕ್ಕೆ ಮತ್ತಷ್ಟು ಪುರಾವೆ ಸಿಕ್ಕಿದರೆ ಎನ್‌ಐಎ ತನಿಖೆಗೆ ಪ್ರಕರಣ ಹಸ್ತಾಂತರವಾಗಲಿದೆ ಎಂದು ಉನ್ನತ ಪೊಲೀಸ್ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ ಎಂದು ಮಾಧ್ಯಮವೊಂದು ವರದಿ ಮಾಡಿದೆ.