'ಈಶ್ವರಪ್ಪ ಮೇಲಿನ ಆರೋಪ ಕಾಂಗ್ರೆಸ್ ಮಹಾನಾಯಕ, ಬಿಜೆಪಿ ಯುವ ನಾಯಕ ಹೆಣೆದ ಕುತಂತ್ರ'-ಯತ್ನಾಳ್

•   Fri, Apr 15 2022 05:50:53 PM



• ವಿಜಯಪುರ, ಏ 15 (DaijiworldNews/DB): ಈಶ್ವರಪ್ಪ ಅವರ ವಿರುದ್ದದ ಕುತಂತ್ರದಲ್ಲಿ ಕಾಂಗ್ರೆಸ್ ಪಕ್ಷದ ಮಹಾನಾಯಕನ ಜೊತೆಗೆ ನಮ್ಮ ಪಕ್ಷದ ಯುವ ನಾಯಕನೊಬ್ಬನ ಪಾತ್ರವಿದೆ ಎಂದು ವಿಜಯಪುರ ಶಾಸಕ ಬಸನಗೌಡ ಪಾಟೀಲ ಯತ್ನಾಳ್ ಆರೋಪಿಸಿದ್ದಾರೆ.

  ಶುಕ್ರವಾರ ನಗರದಲ್ಲಿ ಪತ್ರಕರ್ತರೊಂದಿಗೆ ಮಾತನಾಡಿದ ಅವರು, ಕಾಂಗ್ರೆಸ್ ನಾಯಕರು ರಾಜಕೀಯ ಸೋಲಿನಿಂದ ಹತಾಶರಾಗಿದ್ದಾರೆ. ಹೀಗಾಗಿ ಡಿ.ಕೆ. ಶಿವಕುಮಾರ್‍, ಲಕ್ಷ್ಮಿ ಹೆಬ್ಬಾಳ್ಕರ್ ಮುಂತಾದವರು ಬಾಯಿಗೆ ಬಂದಂತೆ ಮಾತನಾಡುತ್ತಿದ್ದಾರೆ. ಈಶ್ವರಪ್ಪ ಅವರ ಮೇಲೆ ಭ್ರಷ್ಟಾಚಾರ ಆರೋಪ ಹೊರಿಸಿರುವುದರ ಹಿಂದೆ ಕಾಂಗ್ರೆಸ್ ಮಹಾನಾಯಕನೊಂದಿಗೆ ಬಿಜೆಪಿ ಯುವನಾಯಕನ ಪಾತ್ರವೂ ಇದೆ. ಶಾಸಕ ರಮೇಶ ಜಾರಕಿಹೊಳಿ ಹೇಳಿಕೆಯಲ್ಲಿ ಸತ್ಯಾಂಶವಿದ್ದು, ಸೂಕ್ತ ತನಿಖೆ ನಡೆಯಬೇಕು ಎಂದು ಒತ್ತಾಯಿಸಿದರು.

  ರಾಜ್ಯದಲ್ಲಿ ಬ್ಲಾಕ್‌ಮೇಲ್ ಸಂಸ್ಕೃತಿ ಹೆಚ್ಚುತ್ತಿದೆ. ಇಂತಹವರನ್ನು ಜೈಲಿಗಟ್ಟಿ ಇದಕ್ಕೆ ಅಂತ್ಯ ಹಾಡಬೇಕು. ಸುಸಂಸ್ಕೃತ ರಾಜಕೀಯ ಬದಲಾಗಿ ವಿಕೃತ ರಾಜಕೀಯ ನಡೆಯುತ್ತಿರುವುದು ದುರಂತ. ಪೊಲೀಸ್ ಬ್ಯಾರಿಕೇಡ್ ಹಾರಿ ಹೋಗುವ ಡಿ.ಕೆ. ಶಿವಕುಮಾರ್‍ ಅವರ ಆರೋಗ್ಯದಲ್ಲಿ ಯಾವುದೇ ಸಮಸ್ಯೆ ಇಲ್ಲ ಎಂಬುದನ್ನು ನ್ಯಾಯಾಧೀಶರು ಗಮನಿಸಬೇಕು ಎಂದವರು ತಿಳಿಸಿದರು.

  ಪ್ರಕರಣದಲ್ಲಿ ಕಾಂಗ್ರೆಸ್ ನಾಯಕರ ಕೈವಾಡವಿದೆ ಎಂಬುದಕ್ಕೆ ದಾಖಲೆಗಳಿವೆ ಎಂಬುದಾಗಿ ರಮೇಶ್ ಜಾರಕಿಹೊಳಿ ಹೇಳಿದ್ದಾರೆ. ಶೀಘ್ರ ಅದನ್ನವರು ಬಹಿರಂಗಪಡಿಸಿ ಕುತಂತ್ರ ನಡೆಸಿದವರ ಷಡ್ಯಂತ್ರವನ್ನು ಜನತೆಯ ಮುಂದಿಡಬೇಕು ಎಂದು ಇದೇ ವೇಳೆ ಆಗ್ರಹಿಸಿದರು.