ದೈವಕೋಲದ ವೇಳೆ ನಾಲ್ವರ ಮೇಲೆ ಗುಂಡಿನ ದಾಳಿ

•   Tue, Apr 12 2022 10:33:09 AM



• ಸೋಮವಾರಪೇಟೆ, ಏ 12 (DaijiworldNews/DB): ದೈವಕೋಲದ ವೇಳೆ ನಡೆದ ಗಲಾಟೆ ಗುಂಡಿನ ದಾಳಿಯಲ್ಲಿ ಕೊನೆಗೊಂಡ ಘಟನೆ ಸೋಮವಾರಪೇಟೆ ತಾಲೂಕಿನ ನಗರಳ್ಳಿ ಗ್ರಾಮದಲ್ಲಿ ಸೋಮವಾರ ನಡೆದಿದೆ.

  ದೈವಕೋಲದ ಸಂದರ್ಭದಲ್ಲಿ ವ್ಯಕ್ತಿಗಳ ಮಧ್ಯೆ ಗಲಾಟೆ ಏರ್ಪಟ್ಟು ವ್ಯಕ್ತಿಯೋರ್ವ ಒಂದೇ ಕುಟುಂಬದ ನಾಲ್ವರ ಮೇಲೆ ಗುಂಡು ಹಾರಿಸಿದ್ದಾನೆ. ಇದರಿಂದ ಜಿ.ಡಿ. ವೀರೇಶ, ಮಹೇಶ, ನಂದೀಶ ಹಾಗೂ ಚಂದ್ರಶೇಖರ್‌ ಗಾಯಗೊಂಡಿದ್ದಾರೆ.

  ನಗರಳ್ಳಿ ಗ್ರಾಮದಲ್ಲಿ ಐವರು ಕುಟುಂಬಸ್ಥರು ಸೇರಿ 12 ವರ್ಷಗಳ ಅನಂತರ ಮೊದಲ ಬಾರಿಗೆ ದೈವಕ್ಕೆ ಕೋಲ ನೀಡಿದ್ದಾರೆ. ಕೋಲಕ್ಕೂ ಮುನ್ನ ಎರಡು ದಿನ ಪೂಜೆ ನೆರವೇರಿದೆ. ಸೋಮವಾರ ದೈವದ ಕೋಲ ನಡೆಯುತ್ತಿರುವ ಸಂದರ್ಭದಲ್ಲಿ ಸಂಜೆ ವೇಳೆಗೆ ಕ್ಷುಲ್ಲಕ ಕಾರಣಕ್ಕೆ ಐವರ ಮಧ್ಯೆ ಗಲಾಟೆ ನಡೆದಿದೆ. ಬಳಿಕ ಗಲಾಟೆ ತಾರಕಕ್ಕೇರಿ ವ್ಯಕ್ತಿಯೋರ್ವ ಒಂದೇ ಕುಟುಂಬದ ನಾಲ್ವರ ಮೇಲೆ ಗುಂಡು ಹಾರಿಸಿದ್ದಾನೆ. ಸೋಮವಾರಪೇಟೆ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದಾರೆ.