ಪಾರ್ಕಿಂಗ್ ಮಾಡಲಾಗಿದ್ದ ರಾಯಲ್ ಎನ್‌ಫೀಲ್ಡ್‌ ಮೋಟಾರ್‌ ಬೈಕ್ ಸ್ಪೋಟ

•   Tue, Apr 05 2022 10:22:26 AM



• ಹೈದರಾಬಾದ್‌, ಏ 05 (DaijiworldNews/DB): ಪಾರ್ಕಿಂಗ್ ಮಾಡಲಾಗಿದ್ದ ರಾಯಲ್ ಎನ್‌ಫೀಲ್ಡ್‌ ಮೋಟಾರ್‌ ಬೈಕೊಂದು ಏಕಾಏಕಿ ಸ್ಪೋಟಗೊಂಡ ದೃಶ್ಯ ಹೊಂದಿರುವ ವೀಡಿಯೋವೊಂದು ಸಾಮಾಜಿಕ ತಾಣಗಳಲ್ಲಿ ವೈರಲ್ ಆಗಿದೆ.

  ಮೈಸೂರಿನಿಂದ ಆಂಧ್ರಪ್ರದೇಶಕ್ಕೆ ರಾಯಲ್ ಎನ್ ಫೀಲ್ಡ್ ನಲ್ಲಿ ತೆರಳಿದ್ದ ರಚಿಚಂದ್ರ ಎಂಬುವವರ ಬೈಕ್ ಸ್ಪೋಟಕ್ಕೆ ಆಹುತಿಯಾಗಿದೆ. ಮೈಸೂರಿನಿಂದ 387 ಕಿ.ಮೀ. ದೂರದ ಗುಂಟ್ಕಲ್‌ ಮಂಡಲ್‌ನ ನೆಟ್ಟಿಕಂಟಿ ಆಂಜನೇಯ ಸ್ವಾಮಿ ದೇವಸ್ಥಾನಕ್ಕೆ ಅವರು ಪ್ರಯಾಣ ಬೆಳೆಸಿದ್ದರು. ದೇವಳದ ಹೊರಭಾಗದಲ್ಲಿರುವ ಪಾರ್ಕಿಂಗ್‌ ತಾಣದಲ್ಲಿ ಬೈಕ್ ನಿಲ್ಲಿಸಿ ಅವರು ದೇವಳದೊಳಕ್ಕೆ ದೇವರ ದರ್ಶನಕ್ಕೆಂದು ಹೋಗಿದ್ದರು. ಈ ವೇಳೆ ಪಾರ್ಕಿಂಗ್ ನಲ್ಲಿದ್ದ ಬೈಕ್ ಏಕಾಏಕಿ ಸ್ಪೋಟಗೊಂಡು ಹೊತ್ತಿ ಉರಿದಿದೆ. ಈ ಘಟನೆಯನ್ನು ಸ್ಥಳದಲ್ಲಿದ್ದವರು ವೀಡಿಯೋ ಮಾಡಿದ್ದು, ಸಾಮಾಜಿಕ ತಾಣದಲ್ಲಿ ಹರಿಯಬಿಟ್ಟಿದ್ದಾರೆ. ಇದೀಗ ಭಾರೀ ವೈರಲ್ ಆಗಿದೆ.

  ಬೈಕ್ ನ್ನು ಪಾರ್ಕಿಂಗ್ ಮಾಡಿ ಸವಾರ ದೇವಳಕ್ಕೆ ಹೋಗಿದ್ದರಿಂದ ಮತ್ತು ಬೈಕ್ ನ ಸನಿಹದಲ್ಲಿ ಯಾರೂ ಇರಲಿಲ್ಲವಾದ್ದರಿಂದ ಯಾವುದೇ ಜೀವಹಾನಿ ಉಂಟಾಗಿಲ್ಲ. ಬೈಕ್ ನ ಪೆಟ್ರೋಲ್ ಟ್ಯಾಂಕ್ ಸ್ಫೋಟಗೊಂಡಿದ್ದೇ ಬೈಕ್ ಹೊತ್ತಿ ಉರಿಯಲು ಕಾರಣವಾಗಿದೆ ಎನ್ನಲಾಗಿದೆ. ಆದರೆ ನಿರ್ದಿಷ್ಟ ಕಾರಣ ಇನ್ನೂ ಪತ್ತೆಯಾಗಿಲ್ಲ.

  కసాపురంలో బుల్లెట్ బండి మైసూరు నుండి కసాపురం కు నాన్ స్టాప్ గా వచ్చినందుకు పేలిపోయింది #guntakal #RoyalEnfield #Bullet #bike #fire #ACCIDENT #RoyalsFamily #RoyalEnfield pic.twitter.com/GGaRAnCY5x

  — Allu Harish (@AlluHarish17) April 3, 2022