ಮಂಡ್ಯದಲ್ಲಿ ತಾರಸಿ ಕುಸಿದು ಮಹಿಳೆ ಸಾವು: 40 ಮಂದಿಗೆ ಗಂಭೀರ ಗಾಯ

•   Tue, Mar 29 2022 11:45:46 AM



• ಮಂಡ್ಯ, ಮಾ 29 (DaijiworldNews/DB): ಮನೆ ತಾರಸಿ ಕುಸಿದು ಓರ್ವ ಮಹಿಳೆ ಸಾವನ್ನಪ್ಪಿ 40 ಮಂದಿ ಗಂಭೀರ ಗಾಯಗೊಂಡ ಘಟನೆ ಮಂಡ್ಯದಲ್ಲಿ ನಡೆದಿದೆ.

  ಮಂಡ್ಯದ ಮದ್ದೂರು ತಾಲೂಕಿನ ಹುಲಿಗೆರೆಪುರ ಗ್ರಾಮದಲ್ಲಿನ ಬಸವೇಶ್ವರ ದೇವಸ್ಥಾನ ಕೊಂಡೋತ್ಸವ ನೋಡಲು ಮಂಗಳವಾರ ಮುಂಜಾನೆ ಮಾದೇಗೌಡರ ನಿವಾಸದ ತಾರಸಿ ಮೇಲೆ 100 ಕ್ಕೂ ಹೆಚ್ಚು ಮಂದಿ ಸೇರಿದ್ದರು. ಸುಮಾರು 90 ವರ್ಷದ ಹಳೆಯ ಕಟ್ಟಡ ಇದಾಗಿದ್ದರಿಂದ ಒಮ್ಮೆಲೆ ನೂರಾರು ಜನರ ಭಾರವನ್ನು ಹೊರಲಾಗದೆ ಕುಸಿದು ಬಿದ್ದಿದೆ.

  ದುರಂತದಲ್ಲಿ ಅದೇ ಗ್ರಾಮದ ಪುಟ್ಟಲಿಂಗಮ್ಮ(50) ಮೃತಪಟ್ಟಿದ್ದಾರೆ. 10 ಕ್ಕೂ ಹೆಚ್ಚು ಮಕ್ಕಳು ಸೇರಿದಂತೆ 40 ಕ್ಕೂ ಹೆಚ್ಚು ಜನರಿಗೆ ಗಂಭೀರ ಗಾಯಗಳಾಗಿದ್ದು, ಗಾಯಾಳುಗಳನ್ನು ಮಂಡ್ಯ ಜಿಲ್ಲಾಸ್ಪತ್ರೆಗೆ ದಾಖಲಿಸಲಾಗಿದೆ. ಮದ್ದೂರು ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ಪ್ರಕರಣ ದಾಖಲಾಗಿದೆ.