ಮಹಾತ್ಮಾ ಗಾಂಧಿ ಮೊಮ್ಮಗಳಿಂದ 'ದಿ ಮೋದಿ ಸ್ಟೋರಿ' ವೆಬ್‌ಸೈಟ್ ಗೆ ಚಾಲನೆ

•   Sat, Mar 26 2022 02:21:20 PM



• ನವದೆಹಲಿ, ಮಾ 26 (DaijiworldNews/DB): ಪ್ರಧಾನಿ ನರೇಂದ್ರ ಮೋದಿಯವರ ಜೀವನಗಾಥೆಗಳ ಸಂಗ್ರಹವಾಗಿರುವ 'ದಿ ಮೋದಿ ಸ್ಟೋರಿʼ ವೆಬ್‌ಸೈಟ್ ಗೆ ರಾಷ್ಟ್ರಪಿತ ಮಹಾತ್ಮಾ ಗಾಂಧೀಜಿಯವರ ಮೊಮ್ಮಗಳು ಸುಮಿತ್ರಾ ಗಾಂಧಿ ಕುಲಕರ್ಣಿ ಅವರು ಶನಿವಾರ ಚಾಲನೆ ನೀಡಿದ್ದಾರೆ.

  ಪ್ರಧಾನಿ ಮೋದಿ ಅವರ ಜೀವನದ ಹಲವು ಮಜಲುಗಳು ಮತ್ತು ಇನ್ನೊಬ್ಬರಿಗೆ ಸ್ಪೂರ್ತಿಯಾಗಬಲ್ಲ ಘಟನೆಗಳನ್ನು ಈ ವೆಬ್ ಸೈಟ್ ಪ್ರಕಟಿಸಲಿದೆ. ಮೋದಿ ಜೊತೆಗೆ ನಿಕಟ ಒಡನಾಟ ಹೊಂದಿರುವವರು ಹೇಳಿರುವ ನೆನಪುಗಳನ್ನು ಕೂಡಾ ಪ್ರಕಟಿಸಿ ಮೋದಿ ಜನಪ್ರಿಯತೆಯನ್ನು ಜನಮನಕ್ಕೆ ತಲುಪಿಸುವ ನಿಟ್ಟಿನಲ್ಲಿ ಈ ವೆಬ್ ಸೈಟ್ ಕೆಲಸ ಮಾಡಲಿದೆ.

  ಈ ವೇಳೆ ಒಲಂಪಿಕ್ ಚಿನ್ನದ ಪದಕ ವಿಜೇತ ನೀರಜ್ ಚೋಪ್ರಾ ಮಾತನಾಡಿ, ಈ ಹಿಂದೆ ಪ್ರಧಾನಿಯವರೊಂದಿಗೆ ಆಯೋಜಿತವಾಗಿದ್ದ ಸಂವಾದದ ಸಂದರ್ಭದಲ್ಲಿ ನನಗೆ ನಾನು ದೇಶದ ಪ್ರಧಾನಿಯೊಂದಿಗೆ ಮಾತನಾಡುತ್ತಿದ್ದೇನೆಂದು ಅನಿಸಿರಲಿಲ್ಲ. ಸರ್ವರೊಂದಿಗೆ ಬೆರೆತು ಬಾಳುವ ಅತ್ಯಂತ ಸರಳತೆಯ ಗುಣ ಅವರದು ಎಂದರು.

  ಮಾಹಿತಿ ಮತ್ತು ಪ್ರಸಾರ ಸಚಿವ ಅನುರಾಗ್ ಠಾಕೂರ್ ಅವರು ಟ್ವೀಟ್‌ ಮಾಡಿ, ಮೋದಿಯವರು ನಡೆದು ಬಂದ ದಾರಿ ಮತ್ತು ಅವರ ಜೀವನದಲ್ಲಾದ ಸ್ಪೂರ್ತಿಯುತ ಕ್ಷಣಗಳನ್ನು ಈ ವೆಬ್ ಸೈಟ್ ನಲ್ಲಿ ಹಂಚಿಕೊಳ್ಳಲಾಗುತ್ತದೆ. ವೆಬ್ ಸೈಟ್ ನ್ನು Modistory.in ಅನ್ನು ವೀಕ್ಷಣೆ ಮಾಡಬಹುದಾಗಿದೆ ಎಂದಿದ್ದಾರೆ.