ಅನ್ಯ ಜಾತಿಯ ಯುವತಿಯೊಂದಿಗೆ ಮಗ ಓಡಿ ಹೋಗಿದ್ದಾನೆಂದು ತಾಯಿಗೆ ಥಳಿತ

•   Thu, Jan 27 2022 12:41:44 PM



• ಚೆನ್ನೈ,ಜ.27 (DaijiworldNews/KP): ಬೇರೆ ಜಾತಿಯ ಯುವತಿಯನ್ನು ಮಗ ಮದುವೆಯಾಗಿದ್ದಕ್ಕೆ ತಾಯಿಯನ್ನು ವಿದ್ಯುತ್ ಕಂಬಕ್ಕೆ ಕಟ್ಟಿ ಥಳಿಸಿರುವ ಘಟನೆ ತಮಿಳುನಾಡಿನ ವರುಧಾನಗರ ಜಿಲ್ಲೆಯ ತಿರುಚುಲು ಬ್ಲಾಕ್ನ ಕೆ.ವಗೈಕುಲಮ್​ ಗ್ರಾಮದಲ್ಲಿ ಎರಡು ದಿನಗಳ ಹಿಂದೆ ನಡೆದಿದೆ.

  ಸಂತ್ರಸ್ತೆಯನ್ನು ಮೀನಾಕ್ಷಿ ಎಂದು ಗುರುತಿಸಲಾಗಿದ್ದು, ಇವರ ಮಗ ಇದೇ ತಿಂಗಳ ಜನವರಿ 22ರಂದು ತಮ್ಮ ಗ್ರಾಮದ ಬೇರೆ ಜಾತಿಯ ಯುವತಿ ಜತೆ ಓಡಿ ಹೋಗಿ ಮದುವೆಯಾಗಿದ್ದಾನೆ ಎಂದು ಯುವತಿಯ ಸಂಬಂಧಿಕರು ಜನವರಿ 25ರಂದು ಮೀನಾಕ್ಷಿಯನ್ನು ಮನೆಯಿಂದ ಹೊರಗೆ ಕರೆತಂದು ವಿದ್ಯುತ್ ಕಂಬಕ್ಕೆ ಕಟ್ಟಿ ಮನಬಂದಂತೆ ಥಳಿಸಿ, ಕೆಟ್ಟದಾಗಿ ನಿಂದಿಸಿದ್ದಾರೆ ಎಂದು ಆರೋಪಿಸಲಾಗಿದೆ.

  ಈ ಕುರಿತು ಮೀನಾಕ್ಷಿ ಪರಲಚಿ ಠಾಣಾ ಪೊಲೀಸ್ ಠಾಣೆಯಲ್ಲಿ ಯುವತಿಯ ತಾಯಿ ಸೇರಿದಂತೆ 14 ಮಂದಿಯ ವಿರುದ್ಧ ಪ್ರಕರಣ ದಾಖಲಿಸಿದ್ದಾರೆ. ಇದೀಗ ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ಆರೋಪಿಗಳ ಬಂಧನಕ್ಕೆ ಮುಂದಾಗಿದ್ದಾರೆ.

  ಇನ್ನು ಓಡಿ ಹೋಗಿದ್ದ ಇಬ್ಬರು ಮದುವೆ ಆಗಿ ರಕ್ಷಣೆ ನೀಡುವಂತೆ ಅರುಪ್ಪುಕೊಟೈ ಮಹಿಳಾ ಪೊಲೀಸ್​ ಠಾಣೆಯ ಮೊರೆ ಹೋಗಿದ್ದಾರೆ.

  ಸದ್ಯ ಗಂಭೀರವಾಗಿ ಗಾಯಗೊಂಡಿದ್ದ ಮೀನಾಕ್ಷಿಯನ್ನು ಅರುಪ್ಪುಕೊಟೈ ಸರ್ಕಾರಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆದುಕೊಳ್ಳುತಿದ್ದಾರೆ.