ಇಟಲಿಯಿಂದ ಅಮೃತ್​ಸರ್​ಕ್ಕೆ ವಿಮಾನದಲ್ಲಿ ಬಂದ 125 ಪ್ರಯಾಣಿಕರಿಗೂ ಕೊರೊನಾ ದೃಢ

•   Thu, Jan 06 2022 03:49:52 PM



• ಅಮೃತ್​ಸರ್, ಜ 06 (DaijiworldNews/HR): ಇಟಲಿ-ಅಮೃತ್​ಸರ್​ ಏರ್​ ಇಂಡಿಯಾ ವಿಮಾನದಲ್ಲಿ ಪ್ರಯಾಣ ಮಾಡಿದ 179 ಮಂದಿ ಪ್ರಯಾಣಿಕರ ಪೈಕಿ 125 ಪ್ರಯಾಣಿಕರಿಗೆ ಕೊರೊನಾ ಸೋಂಕು ದೃಢಪಟ್ಟಿರುವುದಾಗಿ ಅಮೃತ್​ಸರ್​ ವಿಮಾನ ನಿಲ್ದಾಣ ನಿರ್ದೇಶಕ ವಿ.ಕೆ.ಸೇಠ್​ ತಿಳಿಸಿದ್ದಾರೆ.

  ಇಟಲಿಯಿಂದ ಪಂಜಾಬ್​ನ ಅಮೃತ್​ಸರ್​ ಏರ್​ಪೋರ್ಟ್‌ಗೆ​ ಏರ್​ ಇಂಡಿಯಾ ವಿಮಾನ ತಲುಪಿ ಇಲ್ಲಿ ತಪಾಸಣೆ ಮಾಡಿದಾಗ 125 ಪ್ರಯಾಣಿಕರಲ್ಲಿ ಸೋಂಕು ದೃಢಪಟ್ಟಿದೆ.

  ಕೊರೊನಾ ಸೋಂಕು ಹೆಚ್ಚಾಗುತ್ತಿರುವ ಹಿನ್ನಲೆಯಲ್ಲಿ ಎಲ್ಲ ಏರ್​ಪೋರ್ಟ್​​ನಲ್ಲಿ ಬೇರೆ ದೇಶಗಳಿಂದ ಬಂದ ಪ್ರಯಾಣಿಕರ ಕೊರೊನಾ ಪರೀಕ್ಷೆ ಮಾಡಲಾಗುತ್ತಿದ್ದು, ಇಟಲಿಯಿಂದ ಬಂದ ಪ್ರಯಾಣಿಕರನ್ನೂ ಟೆಸ್ಟ್​ಗೆ ಒಳಪಡಿಸಲಾಗಿತ್ತು. 179 ಮಂದಿಗೆಯಲ್ಲಿ 125 ಜನರಲ್ಲಿ ಸೋಂಕು ದೃಢಪಟ್ಟಿದೆ. ಈ ಮಧ್ಯೆ ಇಂದು ಕೇಂದ್ರ ಸರ್ಕಾರ ಎಲ್ಲ ರಾಜ್ಯ, ಕೇಂದ್ರಾಡಳಿತ ಪ್ರದೇಶಗಳ ಸರ್ಕಾರಗಳಿಗೆ ಪತ್ರ ಬರೆದಿದ್ದು, ತಪಾಸಣೆಯ ವೇಗ ಇನ್ನಷ್ಟು ಹೆಚ್ಚುಗೊಳಿಸುವಂತೆ ಸೂಚಿಸಿದೆ.

  ಭಾರತದಲ್ಲಿ ಕೊರೊನಾ ಸೋಂಕಿನ ಪ್ರಕರಣಗಳು ದಿನದಿಂದ ದಿನಕ್ಕೆ ಏರಿಕೆಯಾಗುತ್ತಿದ್ದು, ಇಂದು ಒಂದೇ ದಿನ 90 ಸಾವಿರಕ್ಕೂ ಹೆಚ್ಚು ಕೇಸ್​ಗಳು ದಾಖಲಾಗಿದೆ. ಇದು ನಿನ್ನೆಗಿಂತ ಶೇ.56ರಷ್ಟು ಹೆಚ್ಚಾಗಿದ್ದು, ಕಳೆದ ಒಂದು ವಾರದಿಂದಲೂ ಗಣನೀಯವಾಗಿ ಕೊರೊನಾ ಸೋಂಕಿನ ಪ್ರಮಾಣ ಏರಿಕೆಯಾಗುತ್ತಿದ್ದು, ಒಮಿಕ್ರಾನ್​ ಕೂಡ ಹರಡುತ್ತಿದೆ.