ಗಾಲ್ವಾನ್‌‌ನಲ್ಲಿ ಚೀನಾದ ಬಾವುಟ - ಮೋದಿ ಸರ್ಕಾರದ ವಿರುದ್ದ ರಾಹುಲ್‌ ವಾಗ್ದಾಳಿ

•   Tue, Jan 04 2022 10:49:27 AM



• ಲಖನೌ, ಜ 04 (DaijiworldNews/PY): ಗಾಲ್ವಾನ್‌‌ನಲ್ಲಿ ಚೀನಾದ ಬಾವುಟ ಕಂಡು ಬಂದ ವಿಚಾರವಾಗಿ ಕಾಂಗ್ರೆಸ್‌ ನಾಯಕ ರಾಹುಲ್‌ ಗಾಂಧಿ ಪ್ರಧಾನಿ ನರೇಂದ್ರ ಮೋದಿ ಅವರ ವಿರುದ್ದ ವಾಗ್ದಾಳಿ ನಡೆಸಿದ್ದಾರೆ.

  ಈ ಕುರಿತು ಟ್ವೀಟ್‌ ಮಾಆಡಿರುವ ಅವರು, "ಗಾಲ್ವಾನ್‌‌ನಲ್ಲಿ ನಮ್ಮ ತ್ರಿವರ್ಣ ಧ್ವಜ ಚೆನ್ನಾಗಿ ಕಾಣುತ್ತದೆ. ಈ ಬಗ್ಗೆ ಚೀನಾಕ್ಕೆ ಪ್ರತಿಕ್ರಿಯೆ ನೀಡಬೇಕಾಗಿದೆ. ಮೋದಿ ಜೀ ಮೌನ ಮುರಿಯಿರಿ" ಎಂದಿದ್ದಾರೆ.

  ಚೀನಾವು ಬಿಡುಗಡೆ ಮಾಡಿರುವ ಪ್ರಚಾರ ವಿಡಿಯೋದಲ್ಲಿ 2022ರ ಹೊಸ ವರ್ಷದ ದಿನದಂದು ಗಾಲ್ವಾನ್‌ನಲ್ಲಿ ಚೀನಾ ತನ್ನ ಬಾವುಟವನ್ನು ಹಾರಿಸುವ ದೃಶ್ಯ ಕಂಡುಬಂದಿದೆ.

  ಅಕ್ಟೋಬರ್‌ನಲ್ಲಿ ಚೀನಾ ವಿವಾದಾತ್ಮಕ ಗಡಿ ಭೂಮಿ ಕಾನೂನನ್ನು ಪರಿಚಯಿಸಿತ್ತು. 2022ರ ಜನವರಿ 1ರಿಂದ ಇದು ಜಾರಿಗೆ ಬಂದಿದೆ. ಚೀನಾ ಹಾಗೂ ನೆರೆರಾಷ್ಟ್ರಗಳ ನಡುವಿನಲ್ಲಿ ವಿವಾದವು ಹೆಚ್ಚಳವಾದ ವೇಳೆ ಈ ವಿವಾದಾತ್ಮಕ ಕಾನೂನನ್ನು ಚೀನಾ ಜಾರಿಗೆ ತಂದಿದೆ.

  ಈ ವಿಡಿಯೋವನ್ನು ಶೇನ್‌ ಶಿವಿಯ್‌ ಎನ್ನುವ ಚೀನಾ ಮಾಧ್ಯಮದ ವರದಿಗಾರ ಟ್ವೀಟ್‌ ಮಾಡಿದ್ದು, "ಚೀನಾದ ಬಾವುಟವನ್ನು ಚೀನಾದ ಅಧಿಕಾರಿಗಳು ಗಾಲ್ವಾನ್‌ನಲ್ಲಿ ಹಾರಿಸುವ ದೃಶ್ಯ ಕಂಡುಬಂದಿದೆ. 2022ರ ಹೊಸ ವರ್ಷದ ವೇಳೆ ಗಾಲ್ವಾನ್‌ ಕಣಿವೆಯಲ್ಲಿ ಚೀನಾದ ಬಾವುಟವನ್ನು ಹಾರಿಸಲಾಗಿದೆ" ಎಂದಿದ್ದಾರೆ.