'ಕಾಂಗ್ರೆಸ್‌ ಶವಯಾತ್ರೆಗೆ ಸಜ್ಜಾಗುತ್ತಿದೆ' - ನಳಿನ್‌ ವ್ಯಂಗ್ಯ

•   Sun, Dec 05 2021 10:02:44 AM



• ಬೆಂಗಳೂರು, ಡಿ.05 (DaijiworldNews/PY): ಬಿಜೆಪಿ ರಾಜ್ಯಾಧ್ಯಕ್ಷ ನಳಿನ್‌ ಕುಮಾರ್‌ ಕಟೀಲ್‌ ಅವರು ಕಾಂಗ್ರೆಸ್‌ ಅನ್ನು ವ್ಯಂಗ್ಯವಾಡಿದ್ದು, "ಕಾಂಗ್ರೆಸ್‌ ತನ್ನ ಶವಯಾತ್ರೆಗೆ ಸಜ್ಜಾಗುತ್ತಿದೆ" ಎಂದಿದ್ದಾರೆ.

  ಹಾಸನದ ಬಿಜೆಪಿ ಕಚೇರಿಯಲ್ಲಿ ಯೋಗ ರಮೇಶ್ ಅವರನ್ನು ಬಿಜೆಪಿ ಪಕ್ಷಕ್ಕೆ ಸ್ವಾಗತಿಸಿದ ಬಳಿಕ ಮಾತನಾಡಿದರು.

  "ಕಾಂಗ್ರೆಸ್‌ ಪಕ್ಷದಲ್ಲಿ ಬೀದಿ ಜಗಳ ನಡೆಯುತ್ತಿದೆ. ರಾಜ್ಯಾಧ್ಯಕ್ಷರ ಆಯ್ಕೆಯಾಗಿ ಒಂದು ವರ್ಷ ಕಳೆದರೂ ಸಹ ಇನ್ನೂ ಪದಾಧಿಕಾರಿಗಳ ಹೆಸರು ಬಳಿಲ್ಲ. ಹುದ್ದೆಯಲ್ಲಿರುವವರು ಸುಮ್ಮನೆ ಕುಳಿತಿದ್ದಾರೆ. ಮುಂಬರುವ ಚುನಾವಣೆಯಲ್ಲಿ ಕಾಂಗ್ರೆಸ್‌ ಇಬ್ಭಾಗವಾಗಲಿದೆ" ಎಂದು ಹೇಳಿದ್ದಾರೆ.

  ಮಾಜಿ ಸಚಿವ ಎ.ಮಂಜು ಪಕ್ಷ ತೊರೆದಿರುವ ಹಿನ್ನೆಲೆಯಲ್ಲಿ ಅವರ ಎದುರಾಳಿ ಯೋಗ ರಮೇಶ್ ಬಿಜೆಪಿ ಸೇರಿದ್ದಾರೆ. ಮುಂಬರುವ ವಿಧಾನಸಭಾ ಚುನಾವಣೆಯಲ್ಲಿ ಅರಕಲಗೂಡು ಕ್ಷೇತ್ರದಿಂದ ರಮೇಶ್ ಅವರನ್ನು ಬಿಜೆಪಿ ಅಭ್ಯರ್ಥಿಯಾಗಿ ಕಣಕ್ಕಿಳಿಸುವ ಸಾಧ್ಯತೆ ಇದೆ ಎನ್ನಲಾಗಿದೆ.