ಯಾದಗಿರಿಯಲ್ಲಿ ಭೀಕರ ಅಪಘಾತ - ಮಗು ಸೇರಿ ಮೂವರ ದುರ್ಮರಣ

•   Sat, Nov 13 2021 03:30:27 PM



• ಯಾದಗಿರಿ, ನ 13 (DaijiworldNews/MS): ಆಟೋ ಮತ್ತು ಲಾರಿ ನಡುವೆ ಭೀಕರ ಅಪಘಾತ ಸಂಭವಿಸಿದ್ದು ಎರಡೂವರೆ ತಿಂಗಳ ಮಗು ಸೇರಿ ಮೂವರು ಮೃತಪಟ್ಟಿರುವ ಘಟನೆ ಯಾದಗಿರಿ ನಗರದ ಮುದ್ನಾಳ್ ಕ್ರಾಸ್ ಬಳಿ ಸಂಭವಿಸಿದೆ.

  ಶುಕ್ರವಾರ ರಾತ್ರಿ ಈ ಘಟನೆ ನಡೆದಿದ್ದು, ಮೃತರನ್ನು ಯಾದಗಿರಿ ತಾಲೂಕಿನ ಕಂಚಗಾರಹಳ್ಳಿ ತಾಂಡಾದ ಆಟೋ ಚಾಲಕ ಲಕ್ಷ್ಮಣ ಶಹಾಪುರ‌(26), ಹೋತಪೇಟ ತಾಂಡಾದ ನಿವಾಸಿ ಜಯರಾಜ್ ಚವ್ಹಾಣ್​ (45) ಹಾಗೂ ಎರಡೂವರೆ ತಿಂಗಳ ಮಗು ಕೃಷ್ಣ ಸಂತೋಷ ಎಂದು ಗುರುತಿಸಲಾಗಿದೆ. ಇನ್ನು ಆಟೋದಲ್ಲಿ ಪ್ರಯಾಣಿಸುತ್ತಿದ್ದ 6 ಜನರ ಸ್ಥಿತಿ ಗಂಭೀರವಾಗಿದೆ.ಗಾಯಾಳುಗಳನ್ನು ಯಾದಗಿರಿ ಜಿಲ್ಲಾಸ್ಪತ್ರೆಗೆ ದಾಖಲಿಸಲಾಗಿದೆ

  ಮುಂಬೈನಿಂದ ರೈಲ್ವೆ ನಿಲ್ದಾಣಕ್ಕೆ ಬಂದಿಳಿದವರನ್ನ ಪ್ಯಾಸೆಂಜರ್​ ಆಟೋ ಚಾಲಕ ಯಾದಗಿರಿ ತಾಲೂಕಿನ ಕಂಚಗಾರಹಳ್ಳಿ ತಾಂಡಾಗೆ ಕರೆದೊಯ್ಯುತ್ತಿದ್ದ. ಇದೇ ವೇಳೆ ಕಲಬುರಗಿಯಿಂದ ಯಾದಗಿರಿಯತ್ತ ಕ್ವಾರಿ ಕಲ್ಲು ತುಂಬಿದ್ದ ಲಾರಿ ಬರುತ್ತಿತ್ತು. ಮಾರ್ಗಮಧ್ಯೆ ಮುದ್ನಾಳ್ ಕ್ರಾಸ್ ಬಳಿ ಆಟೋ ಮತ್ತು ಲಾರಿ ಮುಖಾಮುಖಿ ಡಿಕ್ಕಿಯಾಗಿದ್ದು, ಸ್ಥಳದಲ್ಲೇಮೃತಪಟ್ಟಿದ್ದಾರೆ. ಯಾದಗಿರಿ ಸಂಚಾರಿ ಠಾಣೆಯಲ್ಲಿ ಈ ಪ್ರಕರಣ ದಾಖಲಾಗಿದೆ.