ಗುಲ್ಶನ್​ ಕುಮಾರ್​ ಹತ್ಯೆ ಪ್ರಕರಣ - ಇಬ್ಬರಿಗೆ ಜೀವಾವಧಿ ಶಿಕ್ಷೆ, ಓರ್ವ ಆರೋಪಿಗೆ ಖುಲಾಸೆ

•   Thu, Jul 01 2021 01:39:12 PM



• ಮುಂಬೈ, ಜು. 01(DaijiworldNews/HR): ಬಾಲಿವುಡ್​ ಚಿತ್ರ ನಿರ್ಮಾಪಕ, ಟಿ-ಸೀರಿಸ್​ ಮ್ಯೂಸಿಕ್ ಕಂಪೆನಿ ಮಾಲೀಕರಾಗಿದ್ದ ಗುಲ್ಶನ್​ ಕುಮಾರ್​ ಅವರ ಕೊಲೆ ಪ್ರಕರಣದ ಆರೋಪಿ ಅಬುಲ್​ ರೌಫ್​​ ಮರ್ಚೆಂಟ್​ ಅನ್ನು ತಪ್ಪಿತಸ್ಥನೆಂದು ಘೋಷಿಸಿದ್ದ ಸೆಷನ್ಸ್​ ಕೋರ್ಟ್​ ತೀರ್ಪನ್ನು ಬಾಂಬೆ ಹೈಕೋರ್ಟ್​ ಎತ್ತಿಹಿಡಿದಿದ್ದು, ಮತ್ತೊಬ್ಬ ಆರೋಪಿ ಅಬ್ದುಲ್ ರಷೀದ್​ಅನ್ನು ಕೂಡ ಅಪರಾಧಿ ಎಂದು ತೀರ್ಪು ನೀಡಿದೆ.

  

  ಗುಲ್ಶನ್​ ಕುಮಾರ್ ಅವರನ್ನು ಉದ್ಯಮದಲ್ಲಿನ ದ್ವೇಷದಿಂದ ಹಿನ್ನಲೆಯಲ್ಲಿ ಕೊಲೆ ಮಾಡಿಸಿದ್ದರು ಎಂದು ಆರೋಪಿಸಲಾಗಿದ್ದ ಟಿಪ್ಸ್​ ಇಂಡಸ್ಟ್ರೀಸ್​ನ ಮಾಲೀಕ ರಮೇಶ್ ತೌರಾನಿ ಅವರ ಖುಲಾಸೆಯನ್ನು ಹೈಕೋರ್ಟ್​ ಎತ್ತಿಹಿಡಿದಿದೆ.

  ಇನ್ನು ಖುಲಾಸೆಗೊಳಿಸಿದ್ದ ಸೆಷನ್ಸ್ ಕೋರ್ಟ್​ನ 2002 ರ ಏಪ್ರಿಲ್ 29 ರ ತೀರ್ಪಿನ ವಿರುದ್ಧ ಸರ್ಕಾರ ಸಲ್ಲಿಸಿದ್ದ ಅರ್ಜಿಯನ್ನು ವಜಾ ಮಾಡಿದು, ಅಪರಾಧಿಗಳೆಂದು ಸಾಬೀತಾದ ದಾವೂದ್​ ಇಬ್ರಾಹಿಂನ ಸಹಚರ ಎನ್ನಲಾದ ರೌಫ್ ಮರ್ಚೆಂಟ್​​ ​ಮತ್ತು ಅಬ್ದುಲ್ ರಶೀದ್​ಗೆ ಜೀವಾವಧಿ ಜೈಲು ಶಿಕ್ಷೆ ವಿಧಿಸಲಾಗಿದೆ.

  ಗುಲ್ಶನ್​ ಕುಮಾರ್​ ಅವರಿಗೆ ಅಂಡರ್​ವರ್ಲ್ಡ್​ನಿಂದ ಜೀವ ಬೆದರಿಕೆ ಬಂದಿತ್ತು ಎನ್ನಲಾಗಿದ್ದು, ಆ ಬಳಿಕ 1997 ರ ಆಗಸ್ಟ್​ 12 ರಂದು ಮುಂಬೈ ನಗರದ ಜುಹುನಲ್ಲಿ ದೇವಸ್ಥಾನದಿಂದ ಹೊರಬರುತ್ತಿದ್ದ ಕುಮಾರ್​ ಅವರನ್ನು ಗುಂಡಿಕ್ಕಿ ಸಾಯಿಸಲಾಗಿತ್ತು. ರೌಫ್​ ಮರ್ಚೆಂಟ್​ ಮತ್ತು ಅಬ್ದುಲ್ ರಶೀದ್​ 16 ಬುಲೆಟ್​ಗಳನ್ನು ಹಾರಿಸಿದ್ದು, ಕುಮಾರ್​ ಅವರು ಸ್ಥಳದಲ್ಲೇ ಸಾವನ್ನಪ್ಪಿದ್ದರು ಎನ್ನಲಾಗಿದೆ.