ಕೊರೊನಾ ಮೊದಲ ಅಲೆಗೆ ಉದ್ಯೋಗ ನಷ್ಟ, 2ನೇ ಅಲೆಗೆ ಜೀವಗಳೇ ನಷ್ಟ, 'ಆತ್ಮ ಬರ್ಬರ'ವಾಗಿದೆ- ಕಾಂಗ್ರೆಸ್‌

•   Fri, May 07 2021 04:38:32 PM



• ಬೆಂಗಳೂರು, ಮೇ.07 (DaijiworldNews/PY): "ಮೊದಲ ಅಲೆಯಲ್ಲಿ ಹತ್ತು ಕೋಟಿ ಉದ್ಯೋಗ ನಷ್ಟ, ಎರಡನೇ ಅಲೆಯ ಪರಿಣಾಮದಲ್ಲಿ ಜೀವಗಳೇ ನಷ್ಟವಾಗುತ್ತಿವೆ" ಎಂದು ಕೇಂದ್ರ ಸರ್ಕಾರದ ವಿರುದ್ದ ಕಾಂಗ್ರೆಸ್‌ ಕಿಡಿಕಾರಿದೆ.

  

  ಈ ಕುರಿತು ಟ್ವೀಟ್‌ ಮಾಡಿರುವ ಕಾಂಗ್ರೆಸ್‌, "ಮೊದಲ ಅಲೆಯಲ್ಲಿ ಹತ್ತು ಕೋಟಿ ಉದ್ಯೋಗ ನಷ್ಟ, ಎರಡನೇ ಅಲೆಯ ಪರಿಣಾಮದಲ್ಲಿ ಜೀವಗಳೇ ನಷ್ಟವಾಗುತ್ತಿವೆ. ಪ್ರಧಾನಿ ನರೇಂದ್ರ ಮೋದಿ ಅವರ ಬೇಜವಾಬ್ದಾರಿತನ, ನಿರ್ಲಕ್ಷ್ಯ ದೇಶವನ್ನು ಎಲ್ಲಾ ಕ್ಷೇತ್ರದಲ್ಲೂ ಪಾತಾಳಕ್ಕೆ ತಳ್ಳುವುದು ನಿಸ್ಸಂಶಯ" ಎಂದಿದೆ.

  "ಎಲ್ಲಿದ್ಯಪ್ಪಾ.. ತೇಜಸ್ವಿ ಸೂರ್ಯನಾರಾಯಣ ರಾವ್? ಎಲ್ಲಿ ರೋಷ, ಆವೇಶ, ಆಕ್ರೋಶ, ಜನಪರ ಕಾಳಜಿ ಎಲ್ಲವೂ ಎಲ್ಲಿ ಹೋದವು? ಆಕ್ಸಿಜನ್ ನೀಡುವುದಿಲ್ಲವೆಂದು ಕರ್ನಾಟದ ವಿರುದ್ಧ ಸಮರ ಸಾರಿದ ಮೋದಿಯವರ ಬಗ್ಗೆ ಏಕೆ ತುಟಿ ಬಿಚ್ಚಲಿಲ್ಲ? ರಾಜ್ಯದ ಜನರ ಕಾಳಜಿ ವಹಿಸಲು ಕೋರ್ಟುಗಳೇ ಬರಬೇಕಾಯ್ತು, 25 ಸಂಸದರು ಎಲ್ಲಿ ಕಡಿದು ಗುಡ್ಡೆ ಹಾಕುತ್ತಿದ್ದಿರಿ?" ಎಂದು ಪ್ರಶ್ನಿಸಿದೆ.

  "ಹಾಸಿಗೆ ವಿಷಯದಲ್ಲಿ ಬಿಜೆಪಿಗರು ಸದಾ ಬೆತ್ತಲಾಗುತ್ತಲೇ ಇರುತ್ತಾರೆ! ಬಿಜೆಪಿ ಶಾಸಕ ಸತೀಶ್ ರೆಡ್ಡಿಯೇ ಬಿಬಿಎಂಪಿ ಬೆಡ್ ಬ್ಲಾಕಿಂಗ್ ದಂಧೆಯಲ್ಲಿ ಭಾಗಿಯಾಗಿದ್ದರೂ ಬಂಧನವಿಲ್ಲ ಏಕೆ ಬಿಎಸ್‌ವೈ ಅವರೇ? ಸ್ವತಃ ಸತೀಶ್ ರೆಡ್ಡಿಯೇ ದಂಧೆಯನ್ನು ಒಪ್ಪಿ ಸಮರ್ಥನೆಗೆ ಇಳಿದಿದ್ದಾರೆ. ಹೀಗಿದ್ದೂ ಈ ಮೆಡಿಕಲ್ ಭಯೋತ್ಪಾದಕರ ಬಂಧನವಾಗದಿದ್ದಿದ್ದು ಅಕ್ಷಮ್ಯ" ಎಂದು ಆರೋಪಿಸಿದೆ.

  "ರಾಜ್ಯದ ಜನತೆಯ ಜವಾಬ್ದಾರಿ ಇದ್ದಿದ್ದು - 25 ಸಂಸದರಿಗೆ, ಜನತೆಯ ರಕ್ಷಣೆಯ ಹೊಣೆ ಇದ್ದಿದ್ದು - ರಾಜ್ಯ ಬಿಜೆಪಿ ಸರ್ಕಾರಕ್ಕೆ, ಕರ್ನಾಟಕದ ಮೇಲೆ ಆಕ್ಸಿಜನ್ ಯುದ್ಧ ಸಾರಿದ್ದ ಮೋದಿ ಸರ್ಕಾರದ ಯಾರೊಬ್ಬರೂ ಮಾತಾಡದೆ ಹೈಕೋರ್ಟ್, ಸುಪ್ರೀಂ ಕೋರ್ಟ್‌ಗಳು ನೆರವಿಗೆ ನಿಂತು, ಜನರ ಪರವಾಗಿ ಮಾತನಾಡುವ ಸ್ಥಿತಿ ಬಂದಿದ್ದು ಬಿಜೆಪಿ ಆಡಳಿತದ ಅಧೋಗತಿಗೆ ಸಾಕ್ಷಿ" ಎಂದು ಹೇಳಿದೆ.

  "ಡಬಲ್ ಇಂಜಿನ್‌‌ ಸರ್ಕಾರಗಳಲ್ಲ ಇವು ಡಬಲ್ ಟ್ರಬಲ್ ಸರ್ಕಾರಗಳು. ಮೋದಿ ಸರ್ಕಾರದ ಅನ್ಯಾಯದಿಂದ ರಾಜ್ಯದ ಜನತೆಯ ರಕ್ಷಣೆ ಹೈಕೋರ್ಟ್ ಬರಬೇಕಾಯ್ತು, ಸುಪ್ರೀಂ ಕೋರ್ಟ್ ಜೊತೆ ನಿಲ್ಲಬೇಕಾಯ್ತು. ನೆರೆ ಪರಿಹಾರದಿಂದ ಆಕ್ಸಿಜನ್‌ವರೆಗೂ ರಾಜ್ಯದ ಪರ ನಿಲ್ಲದ 25 ಸಂಸದರು ಅನಗತ್ಯ. ರಾಜೀನಾಮೆ ಕೊಟ್ಟು ಯಾವುದಾದರೂ ನೀರಿಲ್ಲದ ಬಾವಿ ನೋಡಿಕೊಳ್ಳಲಿ!" ಎಂದು ಲೇವಡಿ ಮಾಡಿದೆ.

  ಪರದೇಶಗಳ, ಇತರ ಸೇವಾ ಸಂಸ್ಥೆಗಳ ನೆರವನ್ನು ತಮ್ಮದೇ ಎಂದು ಬಿಂಬಿಸಿಕೊಳ್ಳುವ ಹೀನಾಯ ಸ್ಥಿತಿಗೆ ಬಿಜೆಪಿ ಬಂದಿದೆ, ಮೋದಿಯವರ "ಆತ್ಮ ನಿರ್ಭರ" ಕತೆ "ಆತ್ಮ ಬರ್ಬರ" ಆಗುವಲ್ಲಿಗೆ ಬಂದು ನಿಂತಿದೆ! ರಾಜ್ಯದ ಆಕ್ಸಿಜನ್ ರಾಜ್ಯವೇ ಉಪಯೋಗಿಸಲಾಗದ ಸ್ಥಿತಿಗೆ ತಂದಿದ್ದಾರೆ ಬಿಜೆಪಿ. ಕರ್ನಾಟಕಕ್ಕಿಲ್ಲವೇ "ಆತ್ಮ ನಿರ್ಭರ" ಬಿಜೆಪಿ? ಎಂದು ಕೇಳಿದೆ.

  ಮೊದಲ ಅಲೆಯಲ್ಲಿ ಹತ್ತು ಕೋಟಿ ಉದ್ಯೋಗ ನಷ್ಟ, ಎರಡನೇ ಅಲೆಯ ಪರಿಣಾಮದಲ್ಲಿ ಜೀವಗಳೇ ನಷ್ಟವಾಗುತ್ತಿವೆ.@narendramodi ಅವರ ಬೇಜವಾಬ್ದಾರಿತನ, ನಿರ್ಲಕ್ಷ್ಯ ದೇಶವನ್ನು ಎಲ್ಲಾ ಕ್ಷೇತ್ರದಲ್ಲೂ ಪಾತಾಳಕ್ಕೆ ತಳ್ಳುವುದು ನಿಸ್ಸಂಶಯ. pic.twitter.com/zeWuJQrdhG

  — Karnataka Congress (@INCKarnataka) May 7, 2021