ಬೆಂಗಳೂರು, ಎ.16 (DaijiworldNews/PY): ರಾಜ್ಯದಲ್ಲಿ ಕೊರೊನಾ ಸೋಂಕು ದಿನೇ ದಿನೇ ಹೆಚ್ಚಾಗುತ್ತಿದ್ದು, ಈ ನಡುವೆ ಕೊರೊನಾ ನಿಯಂತ್ರಣಕ್ಕೆ ಬಳಸುತ್ತಿದ್ದ ರೆಮ್ಡಿಸ್ವಿರ್ ಚುಚ್ಚುಮದ್ದು ಖಾಸಗಿ ಆಸ್ಪತ್ರೆಗಳಲ್ಲಿ ಸಿಗುತ್ತಿಲ್ಲ ಎಂದು ತಿಳಿದುಬಂದಿದೆ.
ಸಾಂದರ್ಭಿಕ ಚಿತ್ರ
ಹಣ ಕೊಟ್ಟರೂ ಕೂಡಾ ರೆಮ್ಡಿಸ್ವಿರ್ ಇಂಜೆಕ್ಷನ್ ಹೊರಗಡೆ ಸಿಗುತ್ತಿಲ್ಲ. ಹಾಗಾಗಿ ರೋಗಿಗಳು ಚುಚ್ಚುಮದ್ದು ಇಲ್ಲದೇ ಪರದಾಡುವಂತಾಗಿದೆ. ರೆಮ್ಡಿಸ್ವಿರ್ ಇಂಜೆಕ್ಷನ್ ಅನ್ನು ಮೂಲ ಬೆಲೆಗಿಂತ ಹತ್ತುಪಟ್ಟು ಹೆಚ್ಚಿನ ಬೆಲೆಗೆ ಮಾರಾಟ ಮಾಡಲಾಗುತ್ತಿದೆ. 4-5 ಸಾವಿರ ಬೆಲೆಯ ವೈರಲ್ ಡ್ರಗ್ನ್ನು 20-40 ಸಾವಿರದವರೆಗೆ ಮಾರಾಟ ಮಾಡಲಾಗುತ್ತಿದೆ ಎನ್ನಲಾಗುತ್ತಿದೆ. ಈ ಕಾರಣದಿಂದ ಹಣ ನೀಡಿದರೂ ಕೂಡಾ ಈ ಇಂಜೆಕ್ಷನ್ ಕೆಲವೊಮ್ಮೆ ಸಿಗುತ್ತಿಲ್ಲ.
ಇನ್ನು ಇಂಜೆಕ್ಷನ್ ಬೆಲೆ ಎಷ್ಟೆ ಆದರೂ ಕೂಡಾ ಖರೀದಿ ಮಾಡಿ ಜೀವ ಉಳಿಸಿಕೊಳ್ಳಬೇಕು ಎಂದು ಜನರು ಮುಂದಾಗುತ್ತಿದ್ಧಾರೆ. ಕೆಲವರು ಇದನ್ನೇ ಲಾಭವಾಗಿಸಿಕೊಂಡು ವ್ಯಾಪಾರ ಮಾಡಿಕೊಂಡು ಹತ್ತುಪಟ್ಟು ಹೆಚ್ಚಿನ ಬೆಲೆಗೆ ಮಾರಾಟ ಮಾಡುತ್ತಿದ್ದಾರೆ. ಈ ಬಗ್ಗೆ ಕ್ರಮ ತೆಗೆದುಕೊಳ್ಳುವಂತೆ ನೊಂದವರು ಪೊಲೀಸ್ ಕಮಿಷನರ್ಗೂ ಪತ್ರ ಬರೆದಿದ್ದಾರೆ.
ರೆಮ್ಡಿಸ್ವಿರ್ ಚುಚ್ಚುಮದ್ದನ್ನು ಆಸ್ಪತ್ರೆಗೆ ದಾಖಲು ಮಾಡಿದ ಕೂಡಲೇ ಕೊಡಲೇಬೇಕು. ಎರಡು ದಿನದೊಳೆ ಈ ವೈರಲ್ ಡ್ರಗ್ ಕೊಡದೇ ಹೋದಲ್ಲಿ ಜೀವಕ್ಕೆ ಅಪಾಯ ಎದುರಾಗುವ ಸಾಧ್ಯತೆ ಇದೆ. ವಿಶ್ವ ಆರೋಗ್ಯ ಸಂಸ್ಥೆಯಿಂದ ಈ ಚುಚ್ಚುಮದ್ದು ಪ್ರಮಾಣಿತಗೊಂಡಿದೆ. ಸರ್ಕಾರಿ ಆಸ್ಪತ್ರೆಯಲ್ಲಿ ಇದರ ದಾಸ್ತಾನು ಸದ್ಯಕ್ಕೆ ಇದೆ. ಆದರೆ, ಖಾಸಗಿ ದೊಡ್ಡ ಹಾಗೂ ಸಣ್ಣ ಆಸ್ಪತ್ರೆಗಳಲ್ಲಿ ಎರಡು ದಿನಕ್ಕಾಗುವಷ್ಟು ಇಂಜೆಕ್ಷನ್ ಇಲ್ಲ. ಇದರ ಸರಬರಾಜು ಮಾಡುವಂತೆ ಖಾಸಗಿ ಆಸ್ಪತ್ರೆ ಸಂಘ ಕಳೆದ ವಾರವೇ ಸರ್ಕಾರಕ್ಕೆ ಮನವಿ ಮಾಡಿದೆ.
ಖಾಸಗಿ ಇಲ್ಲವೇ ಸರ್ಕಾರ ಉಗ್ರಾಣದಿಂದ ಇಂಜೆಕ್ಷನ್ ನೀಡುವುದಾಗಿ ಸರ್ಕಾರ ಭರವಸೆ ನೀಡಿದೆ.