ಉಪಯೋಗಿಸಿದ ಮಾಸ್ಕ್ ಬಳಸಿ ಹಾಸಿಗೆ ತಯಾರಿ - ಪೊಲೀಸ್ ದಾಳಿ

•   Mon, Apr 12 2021 02:07:35 PM



• ಮುಂಬೈ, ಏ.12 (DaijiworldNews/HR): ಹಾಸಿಗೆ ತಯಾರಿಸುವ ಕಾರ್ಖಾನೆಯೊಂದು ಹತ್ತಿ ಅಥವಾ ಇತರ ಕಚ್ಚಾವಸ್ತುಗಳ ಬದಲಿಗೆ ಉಪಯೋಗಿಸಿ ಬಿಸಾಡಿರುವ ಮಾಸ್ಕ್‌‌ಗಳನ್ನು ಬಳಸುತ್ತಿರುವ ಘಟನೆ ಮಹಾರಾಷ್ಟ್ರದಲ್ಲಿ ಪೊಲೀಸರ ಗಮನಕ್ಕೆ ಬಂದಿದೆ.

  
  ಸಾಂಧರ್ಭಿಕ ಚಿತ್ರ

  ಕಾರ್ಖಾನೆಯ ಮಾಲೀಕರ ವಿರುದ್ಧ ಪ್ರಕರಣ ದಾಖಲಿಸಿರುವ ಪೊಲೀಸರು, ಕಾರ್ಖಾನೆಯ ಆವರಣದಲ್ಲಿ ಕಂಡುಬಂದ ಮಾಸ್ಕ್​ಗಳ ರಾಶಿಯನ್ನು ಬೆಂಕಿಹಚ್ಚಿ ನಾಶಪಡಿಸಿದ್ದಾರೆ.

  ಮಾಸ್ಕ್​ಗಳನ್ನು ಹಾಸಿಗೆ ತಯಾರಿಸಲು ಬಳಸಲಾಗುತ್ತಿದೆ ಎಂಬ ಮಾಹಿತಿ ಪೊಲೀಸರಿಗೆ ಬಂದಿದ್ದು, ಅಧಿಕಾರಿಗಳು ಕುಸುಂಬಾ ಗ್ರಾಮದಲ್ಲಿರುವ ಕಾರ್ಖಾನೆಯ ಆವರಣಕ್ಕೆ ಭೇಟಿ ನೀಡಿದಾಗ, ಬಳಸಿದ ಮಾಸ್ಕ್​​ಗಳನ್ನು ಹಾಸಿಗೆಯೊಂದಕ್ಕೆ ತುಂಬುತ್ತಿರುವುದನ್ನು ಕಂಡು ಬಂದಿದೆ ಎಂದು ಹೆಚ್ಚುವರಿ ಪೊಲೀಸ್ ವರಿಷ್ಠಾಧಿಕಾರಿ ಚಂದ್ರಕಾಂತ್ ಗವಾಲಿ ಹೇಳಿದ್ದಾರೆ.

  ಇನ್ನು ಕಾರ್ಖಾನೆಯ ಮಾಲೀಕ ಅಮ್ಜದ್ ಅಹ್ಮದ್ ಮನ್ಸೂರಿ ಎಂಬುವರ ವಿರುದ್ಧ ಪ್ರಕರಣ ದಾಖಲಿಸಲಾಗಿದ್ದು, ಈ ದಂಧೆಯಲ್ಲಿ ಇನ್ನೂ ಎಷ್ಟು ಜನ ಭಾಗಿಯಾಗಿದ್ದಾರೆ ಎಂಬ ಬಗ್ಗೆ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.