ಮದುವೆಯಾಗುವುದಾಗಿ ನಂಬಿಸಿ ಕೈ ಕೊಟ್ಟ ಆರೋಪಿಗೆ ಜೈಲಿನಲ್ಲೇ ವಿವಾಹ

•   Fri, Mar 19 2021 01:34:47 PM



• ಭುವನೇಶ್ವರ್​,ಮಾ.19 (DaijiworldNews/HR): ಮದುವೆಯಾಗುತ್ತೇನೆ ಎಂದು ನಂಬಿಸಿ ವಂಚಿಸಿ ಜೈಲು ಸೇರಿದ್ದ ಆರೋಪಿಗೆ ಜೈಲಿನಲ್ಲೇ ಸಂತ್ರಸ್ತೆ ಜತೆ ಮದುವೆ ಮಾಡಿಸಿರುವ ಅಪರೂಪದ ಘಟನೆ ಒಡಿಶಾದ ಕಟಕ್ ಜಿಲ್ಲೆಯ ಚೌದ್ವಾರ ಸರ್ಕಲ್​ ಜೈಲಿನಲ್ಲಿ ನಡೆದಿದೆ.

  
  ಸಾಂಧರ್ಭಿಕ ಚಿತ್ರ

  ಆರೋಪಿ ನರಸಿಂಗ್​ ದಾಸ್​ ಮತ್ತು ಸಂತ್ರಸ್ತೆ ಪೂಜಾ ದಾಸ್​ಗೆ ವೇದಿಕ ಸಂಪ್ರದಾಯದ​ ಪ್ರಕಾರ ಜೈಲಿನಲ್ಲಿ ಎರಡು ಕುಟುಂಬದ ಸಮ್ಮುಖದಲ್ಲೇ ಸಿಬ್ಬಂದಿ ಮದುವೆ ಮಾಡಿಸಿದ್ದಾರೆ ಎನ್ನಲಾಗಿದೆ.

  ಆರೋಪಿಯು ಪೂಜಾ ಎಂಬಾಕೆಯನ್ನು ಪ್ರೀತಿಸಿದ್ದು, ಬಳಿಕ ಆಕೆಗೆ ಮೋಸ ಮಾಡಿ ಮತ್ತೊಬ್ಬಳೊಂದಿಗೆ ಮದುವೆ ಆಗಲು ಯೋಜನೆ ರೂಪಿಸಿದ್ದ. ಸಂತ್ರಸ್ತೆಯ ಕುಟುಂಬಕ್ಕೆ ಈ ಬಗ್ಗೆ ಗೊತ್ತಾದಾಗ ಅವರು ಪೊಲೀಸ್​ ಠಾಣೆಯ ಮೆಟ್ಟಿಲೇರಿ ಪ್ರಕರಣ ದಾಖಲಿಸಿದ್ದರು.

  ಇನ್ನು ದೂರಿನ ಆಧಾರದ ಮೇಲೆ ನರಸಿಂಗ್​​ನನ್ನು ಪೊಲೀಸರು 2019ರ ಸೆಪ್ಟೆಂಬರ್​ 28ರಂದು ಪೊಕ್ಸೊ ಕಾಯ್ದೆ ಅಡಿ ಬಂಧಿಸಿದ್ದರು. ಆದರೆ ಈ ವೇಳೆ ಸಂತ್ರಸ್ತೆ ಅಪ್ರಾಪ್ತೆಯಾಗಿದ್ದಳು. ಬಳಿಕ ಜೈಲಿನಲ್ಲಿರುವಾಗ ಮದುವೆಗೆ ಆತ ಒಪ್ಪಿಗೆ ನೀಡಿದ್ದು, ಅದರಂತೆಯೇ ಇಂದು ಮದುವೆ ನಡೆದಿದೆ. ನಾವಿಬ್ಬರು ಒಳ್ಳೆಯ ಜೀವನ ನಡೆಸುತ್ತೇವೆಂಬ ಭರವಸೆ ಇದೆ ಸಂತ್ರಸ್ತೆ ಪೂಜಾ ಹೇಳಿದ್ದಾರೆ.