'ಮಹಿಳೆಯ ತಂದೆಯ ಉತ್ತರಾಧಿಕಾರಿಗಳು ಕೂಡ ಆಸ್ತಿಯ ಹಕ್ಕುದಾರರಾಗಿರುತ್ತಾರೆ' - ಸುಪ್ರೀಂ

•   Thu, Feb 25 2021 03:22:23 PM



• ನವದೆಹಲಿ, ಫೆ. 25 (DaijiworldNews/HR): "ಹಿಂದೂ ಉತ್ತರಾಧಿಕಾರ ಕಾಯ್ದೆಯಡಿ ಮಹಿಳೆಯ ತಂದೆಯ ಉತ್ತರಾಧಿಕಾರಿಗಳು ಕೂಡ ಆಕೆ ಹೊಂದಿರುವ ಆಸ್ತಿಯ ಹಕ್ಕುದಾರರಾಗಿರುತ್ತಾರೆ" ಎಂದು ಸುಪ್ರೀಂಕೋರ್ಟ್‌ ತೀರ್ಪು ನೀಡಿದೆ ಎನ್ನಲಾಗಿದೆ.

  

  ಈ ಕುರಿತ ಅರ್ಜಿ ವಿಚಾರಣೆ ನಡೆಸಿದ ನ್ಯಾಯಮೂರ್ತಿಗಳಾದ ಅಶೋಕಭೂಷಣ್‌ ಹಾಗೂ ಆರ್‌.ಸುಭಾಷ್‌ರೆಡ್ಡಿ ಅವರಿರುವ ನ್ಯಾಯಪೀಠ , ಹಿಂದೂ ಮಹಿಳೆಯ ತಂದೆಯ ಕಡೆಯ ವ್ಯಕ್ತಿಗಳನ್ನು ಸಹ ಆಕೆಯ ಆಸ್ತಿಯ ಉತ್ತರಾಧಿಕಾರಿ ಎಂದೇ ಪರಿಗಣಿಸಬೇಕಾಗುತ್ತದೆ ಎಂದು ಅಭಿಪ್ರಾಯಪಟ್ಟಿದೆ.

  ಜಗ್ನೊ ಎಂಬ ಮಹಿಳೆಗೆ ಸೇರಿದ ಆಸ್ತಿಯನ್ನು ಹಂಚಿಕೆಗೆ ಸಂಬಂಧಿಸಿದ ಅರ್ಜಿ ವಿಚಾರಣೆ ವೇಳೆ ನ್ಯಾಯಪೀಠ ಈ ಅಭಿಪ್ರಾಯ ಹೇಳಿದೆ.

  ಇನ್ನು ಪತಿ ಶೇರ್‌ ಸಿಂಗ್‌ ಮರಣ ಹೊಂದಿದ ಬಳಿಕ ಜಗ್ನೊ ಅವರು ತನ್ನ ಸಹೋದರರ ಮಕ್ಕಳಿಗೆ ತನ್ನ ಆಸ್ತಿಯನ್ನು ಹಂಚಿದ್ದು, ಇದನ್ನು ಪ್ರಶ್ನಿಸಿ ಆಕೆಯ ಬಾಮೈದುನ ಕೋರ್ಟ್‌ ಮೆಟ್ಟಿಲೇರಿದ್ದರು ಎನ್ನಲಾಗಿದೆ.

  ಇದಕ್ಕ್ ಪ್ರತಿಕ್ರಿಯಿಸಿದ ಕೋರ್ಟ್, ಪತಿಯ ಮರಣದ ನಂತರ ಆತ ಹೊಂದಿದ್ದ ಆಸ್ತಿಗೆ ಜಗ್ನೊ ಉತ್ತರಾಧಿಕಾರಿಯಾಗಿದ್ದು, ಆಕೆ ತನ್ನ ಸಹೋದರರ ಮಕ್ಕಳಿಗೆ ಆಸ್ತಿಯನ್ನು ಹಂಚಿಕೆ ಮಾಡಿದ್ದರಲ್ಲಿ ಏನೂ ತಪ್ಪಿಲ್ಲ. ಆಸ್ತಿಯನ್ನು ಪಡೆದವರನ್ನು ಇಲ್ಲಿ ಅಪರಿಚಿತರು ಎಂದು ವ್ಯಾಖ್ಯಾನಿಸುವುದು ಸರಿಯಲ್ಲ ಎಂದು ನ್ಯಾಯಪೀಠ ತಿಳಿಸಿದೆ.