'ನಾವು ದೇವರನ್ನೇ ಏಕವಚನದಲ್ಲಿ ಕರೆಯುತ್ತೇವೆ '- ವಿಶ್ವನಾಥ್‌ಗೆ ಸಿದ್ದು ತಿರುಗೇಟು

•   Fri, Dec 04 2020 05:01:37 PM



• ಮೈಸೂರು, ಡಿ.04 (DaijiworldNews/PY): ಸಿದ್ದರಾಮಯ್ಯನವರೇ ಇನ್ಮುಂದೆಯಾದರೂ ಏಕವಚನದಲ್ಲಿ ಮಾತನಾಡುವುದನ್ನು ಬಿಟ್ಟು ಬಿಡಿ ಎಂದು ಹೇಳಿದ ವಿಧಾನಪರಿಷತ್‌ ಸದಸ್ಯ ಎಚ್‌.ವಿಶ್ವನಾಥ್‌ ಅವರಿಗೆ ತಿರುಗೇಟು ನೀಡಿದ ವಿರೋಧ ಪಕ್ಷದ ನಾಯಕ ಸಿದ್ದರಾಮಯ್ಯ, "ದೇವರನ್ನೇ ನಾವು ಏಕವಚನದಲ್ಲಿ ಕರೆಯುತ್ತೇವೆ" ಎಂದಿದ್ದಾರೆ.

  

  "ದೇವರನ್ನೇ ನಾವು ಏಕವಚನದಲ್ಲಿ ಕರೆಯುತ್ತೇವೆ. ದೇವರನ್ನು ಯಾರಾದರೂ ಬಹುವಚನದಲ್ಲಿ ಕರೆಯುವದನ್ನು ಕೇಳಿದ್ದೀರಾ?" ಎಂದು ಪ್ರಶ್ನಿಸಿದರು.

  "ಉದ್ದೇಶಪೂರ್ವಕವಾಗಿ ನಾನು ಏಕವಚನದಲ್ಲಿ ಮಾತನಾಡಿಸುವುದಿಲ್ಲ. ಹಳ್ಳಿ ಭಾಷೆಯಲ್ಲಿ ಎಲ್ಲರ ಜೊತೆ ಏಕವಚನದಲ್ಲಿ ಮಾತನಾಡುತ್ತೇವೆ. ದೇವರಿಗೂ ಕೂಡಾ ಅವನು, ಇವನು ಎಂದು ಹೇಳುವುದಿಲ್ಲವೇ?" ಎಂದು ಕೇಳಿದರು.

  "ವಿಶ್ವನಾಥ್‌ ಏಕವಚನದಲ್ಲಿ ಎಷ್ಟು ಬಾರಿ ಮಾತನಾಡಿದ್ದಾರೆ ಎನ್ನುವುದನ್ನು ತೋರಿಸಬೇಕಾ?. ಇವ ಕೆ.ಆರ್‌.ನಗರ ಶಾಸಕರ ವಿರುದ್ದ ಯಾವ ಭಾಷೆಯಲ್ಲಿ ಮಾಡನಾಡಿದ್ದ?" ಎಂದು ಕೇಳಿದರು.

  ಸಿದ್ದರಾಮಯ್ಯ ಕಾಂಗ್ರೆಸ್‌ ಬಿಟ್ಟ ನಂತರ ನಾಯಕರಾಗಿ ಬೆಳೆದರು ಎನ್ನುವ ವಿಶ್ವನಾಥ್‌ ಅವರ ಹೇಳಿಕೆಗೆ ಪ್ರತಿಕ್ರಿಯೆ ನೀಡಿದ ಅವರು, "ನಾನು ಕಾಂಗ್ರೆಸ್‌ ಪಕ್ಷಕ್ಕೆ ಸೇರ್ಪಡೆಯಾಗಲು ಕರ್ನಾಟಕದ ಕಾಂಗ್ರೆಸ್‌ನ ಯಾವ ಮಂದಿಯೂ ಕಾರಣರಲ್ಲ. ನಾನು ಕಾಂಗ್ರೆಸ್‌ಗೆ ಸೇರಲು ಅಹ್ಮದ್‌ ಪಟೇಲ್‌ ಕಾರಣ ಎನ್ನುವುದನ್ನು ಮತ್ತೊಮ್ಮೆ ತಿಳಿಸುತ್ತೇನೆ" ಎಂದರು.