ಪಬ್‌ಜಿ ಮೊಬೈಲ್ ಹಕ್ಕನ್ನು ಚೀನಾದ ಟೆನ್ಸೆಂಟ್‌ನಿಂದ ಹಿಂಪಡೆದ ದಕ್ಷಿಣ ಕೊರಿಯಾ ಕಂಪನಿ

•   Tue, Sep 08 2020 05:24:09 PM



• ನವದೆಹಲಿ, ಸೆ. 8(DaijiworldNews/HR): ದೇಶದಲ್ಲಿ ನಿಷೇಧಕ್ಕೆ ಒಳಗಾಗಿರುವ ಪಬ್‌ಜಿ ಮೊಬೈಲ್‌ ಗೇಮ್‌ ಮತ್ತೆ ಕಾರ್ಯಾಚರಣೆ ಪುನರಾರಂಭಿಸುವ ಸೂಚನೆ ದೊರೆತಿದೆ. ಚೀನಾದ ಟೆನ್ಸೆಂಟ್‌ನಿಂದ ಭಾರತದಲ್ಲಿ ಪಬ್‌ಜಿ ಪ್ರಕಟಿಸುವ ಹಕ್ಕನ್ನು ಪಬ್‌ಜಿ ಕಾರ್ಪೊರೇಷನ್‌ ಹಿಂಪಡೆಯುತ್ತಿರುವುದಾಗಿ ಬ್ಲಾಗ್‌ನಲ್ಲಿ ತಿಳಿಸಿದೆ.

  

  ದಕ್ಷಿಣ ಕೊರಿಯಾದ ಪಬ್‌ಜಿ ಕಾರ್ಪೊರೇಷನ್‌ ಪಬ್‌ಜಿ ಗೇಮ್‌ನ ಮಾಲೀಕತ್ವ ಹೊಂದಿದೆ. ಪಬ್‌ಜಿ ಸೇರಿದಂತೆ ಚೀನಾದ 118 ಆ್ಯಪ್‌ಗಳನ್ನು ಭಾರತ ಸರ್ಕಾರ ಕಳೆದ ವಾರವಷ್ಟೇ ನಿಷೇಧಿಸಿದ್ದು, ಭಾರತ ಮತ್ತು ಚೀನಾದ ಗಡಿ ಪ್ರದೇಶಗಳಲ್ಲಿ ಬಿಕ್ಕಟ್ಟು ಸೃಷ್ಟಿಯಾಗಿರುವ ಸಮಯದಲ್ಲೇ ಚೀನಾ ಮೊಬೈಲ್‌ ಅಪ್ಲಿಕೇಷನ್‌ಗಳನ್ನು ಭಾರತ ಸರ್ಕಾರ ನಿಷೇಧಿಸಿದೆ.

  ಇನ್ನು ಪಬ್‌ಜಿ ಕಾರ್ಪೊರೇಷನ್‌ ಭಾರತದಲ್ಲಿ ಗೇಮ್‌ ಪ್ರಕಟಿಸುವ ಎಲ್ಲ ಹೊಣೆಯನ್ನು ವಹಿಸಲಿದ್ದು, ಭಾರತದ ಬಳಕೆದಾರರಿಗೆ ಮುಂದಿನ ದಿನಗಳಲ್ಲಿ ಗೇಮಿಂಗ್‌ ಅನುಭವ ನೀಡುವ ಮಾರ್ಗಗಳನ್ನು ಅನ್ವೇಷಿಸಲಾಗುತ್ತಿದೆ ಎಂಬುದಾಗಿ ಕಂಪನಿ ಹೇಳಿದೆ. ಪಬ್ ಜಿ ಕಾರ್ಪೊರೇಷನ್ ನಲ್ಲಿ ಚೀನಾದ ಟೆನ್ಸೆಂಟ್ ಗೇಮ್ಸ್ ಶೇ 10ರಷ್ಟು ಪಾಲುದಾರಿಕೆ ಹೊಂದಿದ್ದು, ಭಾರತ ಸೇರಿದಂತೆ ಹಲವು ರಾಷ್ಟ್ರಗಳಲ್ಲಿ ಪಬ್‌ಜಿ ಮೊಬೈಲ್‌ ಗೇಮ್‌ಪ್ರಕಟಿಸುವ, ನಿರ್ವಹಿಸಲು ಪರವಾನಗಿ ಪಡೆದಿತ್ತು.

  ಇತ್ತೀಚಿನ ಬೆಳವಣಿಗೆಗಳ ಸಂಬಂಧ ಭಾರತ ಸರ್ಕಾರ ಇನ್ನೂ ಪ್ರತಿಕ್ರಿಯಿಸಿಲ್ಲ. ಆದರೆ ಪ್ರಸ್ತುತ ಗೂಗಲ್‌ ಪ್ಲೇ ಸ್ಟೋರ್‌ ಮತ್ತು ಆ್ಯಪಲ್‌ ಸ್ಟೋರ್‌ಗಳಲ್ಲಿ ಪಬ್‌ಜಿ ಮೊಬೈಲ್‌ ಅಪ್ಲಿಕೇಷನ್‌ ಲಭ್ಯವಿಲ್ಲ. ಈಗಾಗಲೇ ಇನ್‌ಸ್ಟಾಲ್‌ ಮಾಡಿಕೊಂಡಿರುವವರು ಗೇಮ್‌ ಆಡಬಹುದಾಗಿದೆ. ಆದರೆ, ಹೊಸ ಅಪ್‌ಡೇಟ್‌ ಲಭ್ಯವಿರುವುದಿಲ್ಲ.