ಪರಿಹಾರ ಹಣ ಪಡೆಯಲು ಅರ್ಚಕ ನಾರಾಯಣಾಚಾರ್‌‌ ಮಕ್ಕಳಿಗೆ ಅಡ್ಡಿಯಾದ ಮತಾಂತರ

•   Tue, Aug 25 2020 06:25:16 PM



• ಮಡಿಕೇರಿ, ಆ 25 (DaijiworldNews/PY): ರಾಜ್ಯ ಸರ್ಕಾರದ ಪರಿಹಾರ ಹಣ ಪಡೆಯಲು ತಲಕಾವೇರಿ ಕ್ಷೇತ್ರದ ಪ್ರಧಾನ ಅರ್ಚಕ ನಾರಾಯಣಾಚಾರ್‌ ಅವರ ಪುತ್ರಿಯರಿಗೆ ಮತಾಂತರ ಅಡ್ಡಿಯಾಗಿದೆ.

  

  ಅರ್ಚಕರ ಪುತ್ರಿಯರಿಬ್ಬರು ಹಿಂದೂ ಧರ್ಮವನ್ನು ತೊರೆದು ಅನ್ಯ ಧರ್ಮಕ್ಕೆ ಮತಾಂತರಗೊಂಡಿರುವ ಕಾರಣ ಪರಿಹಾರ ಹಣ ಪಡೆದುಕೊಳ್ಳಲು ಇದು ಅಡ್ಡಿಯಾಗಿದೆ.

  ಅರ್ಚಕ ನಾರಾಯಣಾಚಾರ್‌ ಅವರ ಇಬ್ಬರು ಪುತ್ರಿಯರಿಗೆ ಕೊಡಗು ಜಿಲ್ಲಾ ಉಸ್ತುವಾರಿ ಸಚಿವ ವಿ.ಸೋಮಣ್ಣ ಅವರು ಆ.15ರಂದು ತಲಾ 2.50 ಲಕ್ಷ ರೂ ನಂತೆ ಪರಿಹಾರ ಹಣ ನೀಡಿದ್ದರು.

  ಆ.5ರಂದು ಬ್ರಹ್ಮಗಿರಿ ಬೆಟ್ಟದ ಸಾಲಿನ ಗಜಗಿರಿ ಬೆಟ್ಟ ಕುಸಿದು ನಾರಾಯಣ ಆಚಾರ್, ಶಾಂತ ಆಚಾರ್, ಆನಂದ ತೀರ್ಥ ಸ್ವಾಮೀಜಿ ಸೇರಿದಂತೆ ರವಿ ಕಿರಣ್ ಹಾಗೂ ಶ್ರೀನಿವಾಸ್ ಅವರು ಭೂ ಸಮಾಧಿಯಾಗಿದ್ದು, ಇದರಲ್ಲಿ ಶಾಂತ ಆಚಾರ್ ಹಾಗೂ ಶ್ರೀನಿವಾಸ್ ಭಟ್ ಅವರ ಮೃತ ದೇಹಗಳು ಪತ್ತೆ ಮಾಡಲಾಗಲಿಲ್ಲ.

  ಅರ್ಚಕ ನಾರಾಯಣ ಆಚಾರ್‌ ಅವರ ಮಕ್ಕಳು ಆಸ್ಟ್ರೇಲಿಯಾ, ನ್ಯೂಜಿಲೆಂಡ್‌‌ನಲ್ಲಿ ನೆಲೆಸಿದ್ದು, ಅಲ್ಲಿಂದ ಊರಿಗೆ ವಾಪಾಸ್ಸಾದ ಸಂದರ್ಭ ತಮ್ಮ ಪೋಷಕರು ನಾಪತ್ತೆಯಾಗಿರುವ ವಿಚಾರವಾಗಿ ಭಾಗಮಂಡಲ ಪೊಲೀಸ್‌ ಠಾಣೆಯಲ್ಲಿ ದೂರು ನೀಡಿದ್ದು, ಈ ವೇಳೆ ಅರ್ಚಕರ ಇಬ್ಬರು ಪುತ್ರಿಯರು ಶಾರದಾ ಆಚಾರ್‌ ಹಾಗೂ ನಮಿತಾ ಆಚಾರ್‌ ಎಂದು ಉಲ್ಲೇಖಿಸಿದ್ದರು. ಈ ಹೆಸರಿನ ಅನ್ವಯ ಚೆಕ್‌‌‌ ಬರೆಯಲಾಗಿತ್ತು. ಇದೀಗ ಮಡಿಕೇರಿ ತಹಶೀಲ್ದಾರ್‌‌‌‌‌ ಪಿ.ಎಸ್‌‌‌ ಮಹೇಶ್‌ ಅವರ ಬಳಿ ತಮ್ಮ ಬ್ಯಾಂಕ್‌‌‌‌ ಖಾತೆಯಲ್ಲಿರುವ ಶೆನೋನ್‌‌ ಫರ್ನಾಂಡೀಸ್‌ (ಶಾರದಾ ಆಚಾರ್‌), ನಮಿತಾ ನಜೇರತ್‌‌ ಹೆಸರಿಗೆ ಚೆಕ್‌‌ ನೀಡುವಂತೆ ಮನವಿ ಮಾಡಿದ್ದಾರೆ. ಹೆಸರು ಬದಲಾವಣೆ ಆಗಿರುವ ಬಗ್ಗೆ ಸೂಕ್ತ ದಾಖಲೆಗಳನ್ನು ಸಲ್ಲಿಸುವಂತೆ ಸೂಚನೆ ನೀಡಿದ್ದಾರೆ.