ಪತಂಜಲಿ ಕೊರೊನಿಲ್‌ಗೆ ಬೆಂಬಿಡದ ಕಂಟಕ - ಬ್ರ್ಯಾಂಡ್‌ನೇಮ್​ ಬಳಕೆಗೆ ಹೈಕೋರ್ಟ್​ ನಿಷೇಧ

•   Sat, Jul 18 2020 04:16:50 PM



• ನವದೆಹಲಿ, ಜು.18 (DaijiworldNews/MB) : ಬಾಬಾರಾಮ್‌ದೇವ್‌ ಅವರ ಕಂಪನಿ ಪತಂಜಲಿಯ ಕೊರೊನಿಲ್ ಔಷಧಿಗೆ ಕಂಟಕ ಬೆಂಬಿಡದೆ ಕಾಡುತ್ತಿದ್ದು ಇದೀಗ ಬ್ರ್ಯಾಂಡ್​ನೇಮ್ ಕೊರೊನಿಲ್‌ ಎಂಬ ಬಳಕೆಯನ್ನು ನಿಷೇಧಿಸಿ ಮದ್ರಾಸ್​ ಹೈಕೋರ್ಟ್​ ಜು.30ರವರೆಗೆ ಅನ್ವಯವಾಗುವಂತೆ ಮಧ್ಯಂತರ ಆದೇಶ ಹೊರಡಿಸಿದೆ.

  

  ಕೊರೊನಾಗೆ ಔಷಧಿ ಕೊರೊನಿಲ್‌ನ್ನು ಶೀಘ್ರವೇ ಮಾರುಕಟ್ಟೆಗೆ ಬಿಡುಗಡೆ ಮಾಡಲಾಗುವುದು ಎಂದು ರಾಮ್‌ದೇವ್‌ ಕಂಪೆನಿ ಪತಂಜಲಿ ಹೇಳಿಕೊಂಡಾಗ ಸರ್ಕಾರ ಈ ಔಷಧವನ್ನು ಪ್ರಯೋಗ ಮಾಡಿಲ್ಲ ಹಾಗೂ ಮಾರಾಟಕ್ಕೆ ಅನುಮತಿಯನ್ನೂ ಪಡೆದಿಲ್ಲ ಎಂದು ಈ ಔಷಧಿಗೆ ನಿಷೇಧ ಹೇರಿತ್ತು. ಬಳಿಕ ಬಾಬಾರಾಮ್‌ದೇವ್‌ ನಾವು ಆ ರೀತಿ ಹೇಳೆ ಇಲ್ಲ, ಇದು ನಮ್ಮ ವಿರುದ್ಧದ ಷಡ್ಯಂತ್ರ ಎಂದು ಹೇಳಿಕೊಂಡಿದ್ದರು. ಬಳಿಕ ಇದನ್ನು 'ರೋಗನಿರೋಧಕ ಶಕ್ತಿ ವರ್ಧಕ' ಎಂದು ಮಾರಾಟಕ್ಕೆ ಆಯುಷ್‌ ಇಲಾಖೆ ಅನುಮತಿ ನೀಡಿತ್ತು.

  ತಮಿಳುನಾಡಿನ ಚೆನ್ನೈ ಮೂಲದ ರಾಸಾಯನಿಕಗಳ ತಯಾರಿಕಾ ಸಂಸ್ಥೆ ಆರೂಢ ಇಂಜಿನಿಯರಿಂಗ್​ ಪ್ರೈವೇಟ್​ ಲಿಮಿಟೆಡ್​ ಎಂಬ ಕಂಪನಿಯು 1993ರಲ್ಲೇ ಈ ಕೊರೊನಿಲ್‌ ಎಂಬ ಹೆಸರಿನಲ್ಲಿ ನೋಂದಾಯಿಸಿಕೊಂಡಿದ್ದು ರಾಸಾಯನಿಕ ಹಾಗೂ ಬೃಹತ್​ ಯಂತ್ರೋಪಕರಣಗಳನ್ನು ಸ್ವಚ್ಛಗೊಳಿಸುವ ಸ್ಯಾನಿಟೈಸರ್​ಗಳನ್ನು ಉತ್ಪಾದನೆ ಮಾಡುತ್ತಿದೆ. ಕೊರೊನಿಲ್‌ 213 ಎಸ್​ಪಿಎಲ್​ ಮತ್ತು ಕೊರೊನಿಲ್‌ 92ಬಿ ಎಂಬ ಹೆಸರಿನಲ್ಲಿ ಈ ಉತ್ಪಾದನವನ್ನು ಮಾರಾಟ ಮಾಡುತ್ತಿದೆ. ಹಾಗೆಯೇ ಟ್ರೇಡ್​ಮಾರ್ಕ್ ಬಳಕೆಯ ಅನುಮತಿಯನ್ನು ನವೀಕರಿಸಿಕೊಂಡಿದೆ. ಈ ನಿಟ್ಟಿನಲ್ಲಿ ಈ ಕಂಪೆನಿಯು ಪತಂಜಲಿ ಸಂಸ್ಥೆಯಿಂದ ಈ ಹೆಸರಿನ ಬಳಕೆಗೆ ತಡೆಯೊಡ್ಡಬೇಕೆಂದು ಕೋರಿ ಮದ್ರಾಸ್​ ಹೈಕೋರ್ಟ್ ಮೆಟ್ಟಿಲೇರಿದ್ದು ಮದ್ರಾಸ್​ ಹೈಕೋರ್ಟ್ ಈ ಬ್ಯಾಂಡ್‌ನೇಮ್‌ನ ಬಳಕೆಗೆ ನಿಷೇಧಿಸಿದೆ.

  ನಾವು ಹಾಗೂ ಪತಂಜಲಿ ಸಂಸ್ಥೆ ಉತ್ಪಾದನೆ ಮಾಡುವ ಉತ್ಪನ್ನಗಳು ಬೇರೆ ಬೇರೆಯಾಗಿದ್ದರೂ ಕೂಡಾ ಬ್ರ್ಯಾಂಡ್​ನೇಮ್​ ಒಂದೇ ಆಗಿದೆ. ಇದರಿಂದಾಗಿ ನಮ್ಮ ಬೌದ್ಧಿಕ ಆಸ್ತಿಯ ಹಕ್ಕಿಗೆ ಧಕ್ಕೆ ಉಂಟಾಗುತ್ತದೆ ಎಂದು ಆರೂಢ ಕಂಪನಿ ವಾದಿಸಿದೆ.