ಕುಟುಂಬದ ಸದಸ್ಯರನ್ನೆಲ್ಲಾ ಹತ್ಯೆಗೈದು ಪೊಲೀಸರಿಗೆ ಶರಣಾದ

•   Fri, May 01 2020 10:28:44 AM



• ಲಕ್ನೋ, ಮೇ.01 (DaijiworldNews/PY) : ತನ್ನ ಕುಟುಂಬದ ಆರು ಜನರನ್ನು ಆಸ್ತಿ ವಿಚಾರಕ್ಕಾಗಿ ವ್ಯಕ್ತಿಯೋರ್ವ ಬರ್ಬರವಾಗಿ ಹತ್ಯೆಗೈದಿರುವ ಘಟನೆ ಉತ್ತರ ಪ್ರದೇಶ ರಾಜಧಾನಿ ಲಕ್ನೋದ ಹೊರವಲಯದಲ್ಲಿ ನಡೆದಿರುವುದಾಗಿ ಪೊಲೀಸರು ತಿಳಿಸಿದ್ದಾರೆ.

  

  ಹತ್ಯೆಗೈದ ಆರೋಪಿಯನ್ನು ಅಜಯ್‌ ಸಿಂಗ್‌ ​(26) ಎಂದು ಗುರುತಿಸಲಾಗಿದೆ.

  ಆರೋಪಿ ಅಜಯ್‌ ಸಿಂಗ್‌ ತನ್ನ ಕುಟುಂದೊಂದಿಗೆ ಆಸ್ತಿ ವಿವಾದ ಸಂಬಂಧ ಮಾತಿಗೆ ಇಳಿದ ಸಂದರ್ಭ ಮಾತಿಗೆ ಮಾತು ಬೆಳೆದು ಪರಿಸ್ಥಿತಿ ವಿಕೋಪಕ್ಕೆ ತಿರುಗಿದ್ದು, ಈ ಸಂದರ್ಭ ಆರೋಪಿ ಅಜಯ್‌ ಸಿಂಗ್‌ ಚೂಪಾದ ಆಯುಧಗಳಿಂದ ಕುಟುಂಬದ ಸದಸ್ಯರ ಮೇಲೆ ದಾಳಿ ನಡೆಸಿದ್ದಾನೆ. ದಾಳಿ ನಡೆಸಿದ ಪರಿಣಾಮ, ಆರೋಪಿಯ ತಾಯಿ, ತಂದೆ, ಹಿರಿಯ ಸಹೋದರ, ಅತ್ತಿಗೆ ಹಾಗೂ ಇಬ್ಬರು ಮಕ್ಕಳು ಸಾವನ್ನಪ್ಪಿದ್ದಾರೆ. ಮೃತಪಟ್ಟವರನ್ನು ಅಮರ್​(60), ರಮಾಸಖಿ(55), ಅರುಣ್​(40), ರಾಮ್ದುಲರಿ(35), ಸೌರಭ್​(7) ಮತ್ತು ಸಾರಿಕ(2) ಎನ್ನಲಾಗಿದೆ.

  ಕುಟುಂಬದ ಸದಸ್ಯರನ್ನು ಹತ್ಯೆ ಮಾಡಿದ ಬಳಿಕ ತಾನೇ ಖುದ್ದಾಗಿ ಪೊಲೀಸ್‌ ಠಾಣೆಗೆ ತೆರಳಿ ಶರಣಾಗಿದ್ದಾನೆ ಎಂದು ಪೊಲೀಸ್‌ ಆಯುಕ್ತ ಸುಜೀತ್‌ ಪಾಂಡೆ ತಿಳಿಸಿದ್ದಾರೆ.