'ಕೊರೊನ ಚಿಕಿತ್ಸೆಗೆ ರಾಜ್ಯದ ಎಲ್ಲಾ ಜಿಲ್ಲೆಗಳಲ್ಲೂ ಪ್ರತ್ಯೇಕ ಆಸ್ಪತ್ರೆ '- ಬಿ.ಶ್ರೀರಾಮುಲು

•   Wed, Apr 01 2020 05:53:37 PM



• ಬಾಗಲಕೋಟೆ, ಎ.01 (DaijiworldNews/PY) : "ಕೊರೊನ ಚಿಕಿತ್ಸೆಗೆ ರಾಜ್ಯದ ಎಲ್ಲಾ ಜಿಲ್ಲೆಗಳಲ್ಲೂ ಪ್ರತ್ಯೇಕ ಆಸ್ಪತ್ರೆ ತೆರೆಯಲು ಸಿಎಂ ಬಿಎಸ್‌ವೈ ಸೂಚಿಸಿದ್ದಾರೆ, ಅದರಂತೆ ಕಾರ್ಯ ಪ್ರವೃತ್ತರಾಗಿದ್ದೇವೆ" ಎಂದು ಆರೋಗ್ಯ ಸಚಿವ ಬಿ.ಶ್ರೀರಾಮುಲು ಹೇಳಿದರು.

  

  ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, "ಕೊರೊನಾ ಸೋಂಕಿತರಿಗೆ ಈ ಆಸ್ಪತ್ರೆಗಳಲ್ಲಿ ಮಾತ್ರ ಚಿಕಿತ್ಸೆ ನೀಡಲಾಗುತ್ತದೆ. ಬಾಗಲಕೋಟೆಯಲ್ಲಿ ಕೊರೊನಾ ಸೋಂಕು ಪರೀಕ್ಷೆಗೆ ವಿಶೇಷ ಲ್ಯಾಬ್ ಆರಂಭಿಸಲು ಸರ್ಕಾರಕ್ಕೆ ಪ್ರಸ್ತಾವ ಸಲ್ಲಿಸಲು ಇಲ್ಲಿನ ಎಸ್.ನಿಜಲಿಂಗಪ್ಪ ವೈದ್ಯಕೀಯ ಕಾಲೇಜ್ ಆಡಳಿತ ಮಂಡಳಿಗೆ ಸೂಚಿಸಲಾಗಿದೆ. ಬುಧವಾರ ಬೆಳಿಗ್ಗೆವರೆಗೆ ರಾಜ್ಯದಲ್ಲಿ 101 ಕೊರೊನಾ ಪಾಸಿಟಿವ್ ಪ್ರಕರಣ ಕಂಡುಬಂದಿವೆ. ಈ ಪೈಕಿ 8 ಜನ ಗುಣಮುಖರಾಗಿದ್ದಾರೆ. ಮೂವರು ಮೃತಪಟ್ಟಿದ್ದಾರೆ" ಎಂದು ತಿಳಿಸಿದ್ದಾರೆ.

  "ಈವರೆಗೆ ಒಟ್ಟು 3243 ಜನರ ಗಂಟಲು ದ್ರವ ಮಾದರಿಯನ್ನು ತಪಾಸಣೆಗೆ ಕಳುಹಿಸಲಾಗಿದೆ. ಅದರಲ್ಲಿ 3025 ನೆಗಟಿವ್ ಬಂದಿವೆ. ಇನ್ನೂ133 ಜನರ ವರದಿ ಬರಬೇಕಾಗಿದೆ. ಹೋಂಕ್ವಾರಂಟೈನ್‌ಗೆ ರಾಜ್ಯದಲ್ಲಿ 33 ಸಾವಿರ ಜನರನ್ನು ಒಳಪಡಿಸಲಾಗಿದೆ" ಎಂದರು.

  "16,550 ತ್ರಿ ಲೇಯರ್ ಮಾಸ್ಕ್, 2215 ಎನ್ 95 ಮಾಸ್ಕ್, 2030 ಪ್ರೊಟೆಕ್ಷನ್ ಕಿಟ್ ವಿದೇಶದಿಂದ ತರಿಸಲಾಗಿದೆ. ಬೇಡಿಕೆಗೆ ಅನುಗುಣವಾಗಿ ಆಯಾ ಜಿಲ್ಲೆಗಳ ಸಲಕರಣೆಗಳ ಪೂರೈಸಲಾಗುವುದು. ಲಾಕ್‌ಡೌನ್‌ಗೆ ದೇಶದಲ್ಲಿ ಶೇ.80ರಷ್ಟು ಜನರು ಸಹಕರಿಸಿದ್ದಾರೆ. ಇನ್ನು ಉಳಿದವರಿಗೆ ತಿಳುವಳಿಕೆ ಮೂಡಿಸಬೇಕಾಗಿದೆ. ಜನರ ಸಹಕಾರ ಎಲ್ಲಿಯವರೆಗೆ ಸಿಗುವುದಿಲ್ಲವೋ, ಕೊರೊನಾ ವೈರಸ್ ಅಲ್ಲಿಯವರೆಗೆ ನಿಯಂತ್ರಣ ಕಷ್ಟ" ಎಂದು ಹೇಳಿದರು.

  ಸರ್ಕಾರದೊಂದಿಗೆ ಕೊರೊನಾ ವೈರಸ್ ವಿರುದ್ಧದ ಹೋರಾಟಕ್ಕೆ ಕೈಜೋಡಿಸಲು ದೇಣಿಗೆ ನೀಡುವಂತ ದಾನಿಗಳು, ಶ್ರೀಮಂತರು, ಉದ್ಯಮಿಗಳಿಗೆ ಮನವಿ ಮಾಡಿದರು.