'ತೆಲಂಗಾಣ ಎ.7ರೊಳಗೆ ಕೊರೊನಾ ಮುಕ್ತವಾಗಲಿದೆ' - ಸಿಎಂ ಚಂದ್ರಶೇಖರ್‌ ಸ್ಪಷ್ಟನೆ

•   Mon, Mar 30 2020 11:43:01 AM



• ತೆಲಂಗಾಣ, ಮಾ.30 (DaijiworldNews/PY) : "ಮಹಾಮಾರಿ ಕೊರೊನಾ ವೈರಸ್‌ ಸೋಂಕಿನಿಂದ ತೆಲಂಗಾಣ ರಾಜ್ಯ ಎಪ್ರಿಲ್‌ 7ರೊಳಗೆ ಮುಕ್ತವಾಗಲಿದೆ" ಎಂದು ಮುಖ್ಯಮಂತ್ರಿ ಕೆ. ಚಂದ್ರಶೇಖರ್‌ ರಾವ್‌ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

  

  ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, "ಪ್ರಸ್ತುತ ರಾಜ್ಯದಲ್ಲಿ 70 ಕೊರೊನಾ ಸೋಂಕು ಪೀಡಿತರಾಗಿದ್ದಾರೆ. ಹನ್ನೊಂದು ಮಂದಿ ಚೇತರಿಸಿಕೊಂಡಿದ್ದು, ನೆಗೆಟಿವ್‌ ವರದಿ ಬಂದಿದೆ. ಸೋಮವಾರ ಇವರನ್ನೆಲ್ಲಾ ಆಸ್ಪತ್ರೆಯಿಂದ ಡಿಸ್‌ಚಾರ್ಜ್ ಮಾಡಲಾಗುವುದು" ಎಂದು ಹೇಳಿದ್ದಾರೆ.

  "ಎಲ್ಲಾ ರೀತಿಯ ವೈದ್ಯಕೀಯ ಪ್ರಕ್ರಿಯೆ ಪೂರ್ಣಗೊಳಿಸಲಾಗಿದೆ. ರೋಗಿಗಳನ್ನು ಎಲ್ಲಾ ಔಪಚಾರಿಕ ಕಾರ್ಯದ ಬಳಿಕ ಡಿಸ್‌ಚಾರ್ಜ್ ಮಾಡಲಾಗುವುದು. 58 ಮಂದಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ರಾಜ್ಯಕ್ಕೆ ವಿದೇಶದಿಂದ ಮರಳಿದ 25,937 ಮಂದಿ ಸರ್ಕಾರದ ನಿಗಾದಲ್ಲಿದ್ದಾರೆ. ಎ.7ರಂದು ಅವರ ಕ್ವಾರಂಟೈನ್‌ ಸಮಯ ಮುಕ್ತಾಯವಾಗಲಿದೆ" ಎಂದು ಹೇಳಿರುವುದಾಗಿ ವರದಿ ತಿಳಿಸಿದೆ.

  "ಪ್ರಧಾನಿ ಮೋದಿ ಅವರು ಘೋಷಿಸಿರುವ 21 ದಿನಗಳ ಲಾಕ್ ಡೌನ್‌ನ ವಿಚಾರವಾಗಿ ಒತ್ತಡಕ್ಕೆ ಒಳಗಾಗದೆ ಸ್ವಯಂ ನಿಯಂತ್ರಣದಲ್ಲಿ ಇರುವುದು ಮುಖ್ಯ ಎಂದು ಹೇಳಿದ್ದು, ಒಂದು ವೇಳೆ ಎ.7ರ ಬಳಿಕ ಹೊಸ ಪ್ರಕರಣಗಳ ಪತ್ತೆಯಾಗದಿದ್ದಲ್ಲಿ ರಾಜ್ಯ ಕೊರೊನಾ ವೈರಸ್‌ ಮುಕ್ತವಾಗಲಿದೆ" ಎಂದರು.

  "ಗ್ರಾಮಗಳಿಂದ ಎಲ್ಲಾ ಆಹಾರ ಧಾನ್ಯಗಳನ್ನು ಖರೀದಿಸಲಾಗುವುದು. ಬೆಳೆಯನ್ನು ಕೂಪನ್‌ ದಿನಾಂಕದ ಪ್ರಕಾರ ಖರೀದಿಸಲಾಗುವುದು. ಈ ಶಿಸ್ತನ್ನು ಒಂದು ವೇಳೆ ಪಾಲಿಸಿದರೆ ನಾವು ಕೊರೊನಾ ವೈರಸ್‌ ವ್ಯಾಪಿಸುವುದನ್ನು ನಿಯಂತ್ರಿಸಬಹುದು" ಎಂದು ಹೇಳಿದರು.

  "ತಮ್ಮ ಬೆಳೆಯನ್ನು ರೈತರು ಮಾರಾಟ ಮಾಡಲು ಬಂದಾಗ ಅವರು ತಮ್ಮ ಪಾಸ್‌ ಬುಕ್‌ ಅನ್ನು ಪಡೆಯಬಹುದಾಗಿದೆ. ಆನ್‌ಲೈನ್‌ ಮೂಲಕ ಹಣವನ್ನು ಖಾತೆಗಳಿಗೆ ಜಮಾ ಮಾಡಲಾಗುವುದು" ಎಂದು ತಿಳಿಸಿದರು.