ತೀರ್ಪಿನ ಆದೇಶ ಪ್ರತಿಯೊಂದಿಗೆ ಪರಾರಿಯಾದ ಆರೋಪಿ..!

•   Sat, Mar 07 2020 11:24:02 AM



• ಗದಗ, ಮಾ. 07 (Daijiworld News/MB) : ನ್ಯಾಯಾಧೀಶರು ಚೆಕ್‌ಬೌನ್ಸ್‌ ಪ್ರಕರಣಕ್ಕೆ ಸಂಬಂಧಿಸಿದಂತೆ ಪ್ರಕಟಿಸಿದ ತೀರ್ಪಿನ ಪ್ರತಿಯೊಂದಿಗೆ ಆರೋಪಿ ಪರಾರಿಯಾದ ಘಟನೆ ನಗರದ ಜಿಲ್ಲಾ ನ್ಯಾಯಾಲಯದಲ್ಲಿ ಗುರುವಾರ ನಡೆದಿದೆ.

  

  ತೀರ್ಪಿನ ಪ್ರತಿಯೊಂದಿಗೆ ಪರಾರಿಯಾದ ಆರೋಪಿ ಜಿಲ್ಲೆಯ ಗಜೇಂದ್ರಗಡ ಪಟ್ಟಣದ ಪಾಂಡುರಂಗ ದೇವಸ್ಥಾನ ಸಮೀಪದ ನಿವಾಸಿ ಚಾಂದಲಿಂಗಪ್ಪ ಬಾರಕೇರ (33). ಈತನ ವಿರುದ್ಧ ಗದಗದ ಪ್ರಧಾನ ದಿವಾಣಿ ಮತ್ತು ಜೆಎಂಎಫ್‌ಸಿ ನ್ಯಾಯಾಲಯದಲ್ಲಿ ಕಲಂ 138 ಎನ್‌ಐ ಆ್ಯಕ್ಟ್ ಅಡಿಯಲ್ಲಿ ಚೆಕ್‌ಬೌನ್ಸ್‌ ಪ್ರಕರಣ ದಾಖಲಾಗಿದ್ದು ಈ ಪ್ರಕರಣದ ಕುರಿತಾಗಿ ಗುರುವಾರ ನ್ಯಾಯಾಧೀಶರು ತೀರ್ಪು ನೀಡಿದ್ದರು.

  ತೀರ್ಪು ಪ್ರಕಟ ಮಾಡಿದ ನ್ಯಾಯಾಧೀಶರು ಆರೋಪಿಗೆ ತೀರ್ಪಿನ ಆದೇಶ ಪ್ರತಿಗೆ ಸಹಿ ಹಾಕಿ ಕಟಕಟೆಯಲ್ಲಿ ನಿಲ್ಲುವಂತೆ ಸೂಚಿಸಿದ್ದು ಈ ವೇಳೆ ಆರೋಪಿ ಎಲ್ಲರ ಕಣ್ಣು ತಪ್ಪಿಸಿ ನ್ಯಾಯಾಲಯದಿಂದ ಪರಾರಿಯಾಗಿದ್ದಾನೆ.

  ಈ ಕುರಿತು ನ್ಯಾಯಾಲಯದ ನಿರ್ದೇಶನದ ಮೇರೆಗೆ ಗದಗ ಗ್ರಾಮೀಣ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಿಸಲಾಗಿದ್ದು, ಪೊಲೀಸರು ಶೋಧ ಕಾರ್ಯಚರಣೆ ನಡೆಸುತ್ತಿದ್ದಾರೆ.