'ನಮ್ಮ​ ಕಾರ್ಯಕರ್ತರನ್ನು ಹುಡುಕುವ ಕೆಲಸ ಬೇಡ'-ಈಶ್ವರಪ್ಪಗೆ ಜೆಡಿಎಸ್‌ ಕಾರ್ಯಕರ್ತ

•   Sun, Mar 01 2020 01:15:25 PM



• ಬೆಂಗಳೂರು, ಮಾ.01 (DaijiworldNews/PY) : ಈಶ್ವರಪ್ಪ ಅವರು ದೇವೇಗೌಡರ ಮಟ್ಟಕ್ಕೆ ಬೆಳೆಯುವುದು ಅಸಾಧ್ಯ. ಎಚ್​ಡಿಡಿ ಅವರ ಹೆಸರನ್ನು ಪ್ರಚಾರಕ್ಕೋಸ್ಕರ ಬಳಕೆ ಮಾಡಿಕೊಳ್ಳುವ ಅಗತ್ಯವಿಲ್ಲ. ಅವರಿಗೆ ಜೆಡಿಎಸ್​ ಕಾರ್ಯಕರ್ತರನ್ನು ಹುಡುಕುವ ಕೆಲಸ ಬೇಡ ಎಂದು ಈಶ್ವರಪ್ಪ ಅವರಿಗೆ ಜೆಡಿಎಸ್‌ ಕಾರ್ಯಕರ್ತರು ಎಚ್ಚರಿಕೆ ನೀಡಿದ್ದಾರೆ. 

  

  ರಾಜ್ಯ ಸರ್ಕಾರ ಮಂಡ್ಯದಲ್ಲಿ ಜೆಡಿಎಸ್​ ಮುಖಂಡನ ಕಲ್ಲು ಕ್ವಾರೆಗೆ ತಡೆ ನೀಡಿತ್ತು. ಈ ಬಗ್ಗೆ ಸಿಟ್ಟಾದ ದೇವೆಗೌಡರು, ನಮ್ಮ ಕಾರ್ಯಕರ್ತರಿಗೆ ಕಿರುಕುಳ ನೀಡಿದರೆ ನಾವು ಸುಮ್ಮನಿರುವುದಿಲ್ಲ ಎಂದಿದ್ದರು. ಈ ಹೇಳಿಕೆಗೆ ಪ್ರತಿಕ್ರಿಯಿಸಿದ ಈಶ್ವರಪ್ಪ ಅವರು, ದೇವೇಗೌಡ ಅವರು ತಾವೂ ಸೋತು, ಮೊಮ್ಮಗನನ್ನೂ ಸೋಲಿಸಿದರು. ರಾಜ್ಯದಲ್ಲಿ ಈಗ ಜೆಡಿಎಸ್​ ಪಕ್ಷ ಎಲ್ಲಿದೆ? ಕಾರ್ಯಕರ್ತರನ್ನು ನಾವು ಹುಡಕಬೇಕಿದೆ ಎಂದು ಹೇಳಿದ್ದರು.

  ಜೆಡಿಎಸ್ ಕಾರ್ಯಕರ್ತರು ಈಗ ಸಚಿವ ಕೆ.ಎಸ್ ಈಶ್ವರಪ್ಪ ಹೇಳಿಕೆಗೆ ಆಕ್ರೋಶ ವ್ಯಕ್ತಪಡಿಸಿದ್ದು, ಅಲ್ಲದೇ ಮಾಜಿ ಸಿಎಂ ಎಚ್.ಡಿ.ಕುಮಾರಸ್ವಾಮಿ ಬ್ರಿಗೇಡ್ ರಾಜ್ಯಾಧ್ಯಕ್ಷ ವಿ. ಶಶಿಗೌಡ ಅವರು ಸಚಿವರ ಮೊಬೈಲ್​ಗೆ ಕರೆ ಮಾಡಿ ಎಚ್ಚರಿಕೆ ನೀಡಿದ್ದಾರೆ.

  ಶಶಿಗೌಡ ಅವರು ಕರೆ ಮಾಡಿದ ಸಂದರ್ಭ ಈಶ್ವರಪ್ಪ ಆಪ್ತ ಸಹಾಯಕ ಕರೆ ಸ್ವೀಕರಿಸಿದ್ದು, ಶಶಿಗೌಡ ಎಷ್ಟೇ ಕೇಳಿಕೊಂಡರೂ ಈಶ್ವರಪ್ಪ ಆಪ್ತ ಸಹಾಯಕ ಈಶ್ವರಪ್ಪ ಅವರಿಗೆ ಪೋನ್‌‌‌‌ ನೀಡಲಿಲ್ಲ. ಈ ಸಂದರ್ಭ ಅವರು ಸಚಿವರ ಆಪ್ತ ಸಹಾಯಕರಿಗೆ ಎಚ್ಚರಿಕೆ ನೀಡಿ, ಈಶ್ವರಪ್ಪ ಅವರು ಜೆಡಿಎಸ್ ಕಾರ್ಯಕರ್ತರು ಎಲ್ಲಿದ್ದಾರೆ ಎಂದು ಕೇಳುತ್ತಾರೆ. ಹಾಗಾಗಿ ಅವರನ್ನು ಒಮ್ಮೆ ಭೇಟಿ ಮಾಡಬೇಕು. ಈ ಮುಖಾಂತರ ನಮ್ಮ ಶಕ್ತಿ ಪ್ರದರ್ಶನ ಮಾಡಬೇಕಿತ್ತು ಎಂದು ಹೇಳಿದ್ಧಾರೆ.

  ಈಶ್ವರಪ್ಪ ಅವರ ಹೇಳಿಕೆಗೆ ಪ್ರತಿಕ್ರಿಯಿಸಿದ ಶಶಿಗೌಡ, ದೇವೇಗೌಡರು ಪ್ರಧಾನಿ ಹುದ್ದೆ ಅಲಂಕರಿಸಿದವರು. ಈಶ್ವರಪ್ಪ ಅವರು ದೇವೇಗೌಡರ ಮಟ್ಟಕ್ಕೆ ಬೆಳೆಯುವುದು ಅಸಾಧ್ಯ. ಎಚ್​ಡಿಡಿ ಅವರ ಹೆಸರನ್ನು ಪ್ರಚಾರಕ್ಕೋಸ್ಕರ ಬಳಕೆ ಮಾಡಿಕೊಳ್ಳುವ ಅಗತ್ಯವಿಲ್ಲ. ಅವರಿಗೆ ಜೆಡಿಎಸ್​ ಕಾರ್ಯಕರ್ತರನ್ನು ಹುಡುಕುವ ಕೆಲಸ ಬೇಡ ಎಂದಿದ್ಧಾರೆ.