ಕ್ಲರ್ಕ್‌ ಟ್ರೈನಿ ಹುದ್ದೆ - ದೈಹಿಕ ಪರೀಕ್ಷೆ ನಡೆಸಲು ಮಹಿಳೆಯರಿಗೆ ಬೆತ್ತಲಾಗಲು ಸೂಚನೆ

•   Sat, Feb 22 2020 08:08:03 AM



• ಅಹಮದಾಬಾದ್, ಫೆ 22 (Daijiworld News/MB) : ಸೂರತ್‌ ಮಹಾನಗರ ಪಾಲಿಕೆಯ ಕ್ಲರ್ಕ್‌ ಟ್ರೈನಿ ಹುದ್ದೆಗೆ ಆಯ್ಕೆಯಾಗಿದ್ದ 100 ಮಹಿಳೆಯರಿಗೆ ದೈಹಿಕ ಪರೀಕ್ಷೆ ನಡೆಸಲೆಂದು ಬೆತ್ತಲೆಯಾಗಿ ನಿಲ್ಲಿಸಿದ ಪ್ರಕರಣ ಗುಜರಾತ್‌ನ ಸೂರತ್ ನಗರದ ಸರ್ಕಾರಿ ಆಸ್ಪತ್ರೆಯಲ್ಲಿ ನಡೆದಿದೆ.

  

  ಈ ಕುರಿತಾಗಿ ಸರ್ಕಾರಿ ನೌಕರರ ಸಂಘದ ಪ್ರಧಾನ ಕಾರ್ಯದರ್ಶಿ ಎ.ಎ. ಶೇಖ್ ದೂರು ನೀಡಿದ್ದು ಮೇಯರ್ ಜಗದೀಶ್ ಪಟೇಲ್ ಹಾಗೂ ಪಾಲಿಕೆ ಆಯುಕ್ತ ಬಂಚ್ಚಾನಿಧಿ ಪಾನಿ ಈ ಘಟನೆಯ ತನಿಖೆ ಕೈಗೊಳ್ಳುವಂತೆ ಹಾಗೂ ಎರಡು ವಾರಗಳೊಳಗಾಗಿ ತನಿಖೆಯ ವರದಿ ನೀಡುವಂತೆ ಆದೇಶಿಸಿದ್ದಾರೆ.

  ನಿಯಮಗಳ ಪ್ರಕಾರ, ಟ್ರೈನಿ ಹುದ್ದೆಗಾಗಿ ಮೂರು ವರ್ಷದ ತರಬೇತಿ ಅವಧಿಯ ಬಳಿಕ ನೌಕರರು ತಮ್ಮ ಕೆಲಸಕ್ಕಾಗಿ ದೈಹಿಕ ಸಾಮರ್ಥ್ಯ ಸಾಬೀತುಪಡಿಸಬೇಕು. ಈ ದೈಹಿಕ ದೈಹಿಕ ಪರೀಕ್ಷೆ ನಡೆಸುವ ಸಂದರ್ಭದಲ್ಲಿ ಸೂರತ್‌ನ ಮುನ್ಸಿಪಲ್ ಇನ್‌ಸ್ಟಿಟ್ಯೂಟ್ ಆಫ್ ಮೆಡಿಕಲ್ ಎಜುಕೇಷನ್ ಅಂಡ್ ರಿಸರ್ಚ್‌ನ (ಸಿಎಂಐಎಂಇಆರ್) ಮಹಿಳಾ ವೈದ್ಯರು ನೂರು ಮಹಿಳೆಯರನ್ನು ತಲಾ 10 ಗುಂಪುಗಳಾಗಿ ಬೆತ್ತಲೆಯಾಗಿ ನಿಲ್ಲಿಸಿದ್ದರು ಎಂದು ಹೇಳಲಾಗಿದೆ.

  ಅಷ್ಟೇ ಅಲ್ಲ ವೈದ್ಯೆಯರು, ವಿವಾಹಿತ ಮಹಿಳೆಯರು ಸೇರಿದಂತೆ ಅವಿವಾಹಿತೆಯರಿಗೆ ಸಾಮಾನ್ಯ ಪ್ರಶ್ನೆಗಳನ್ನು ಕೇಳುವ ಬದಲಾಗಿ ಗರ್ಭಧಾರಣೆ ಸಂಬಂಧಿಸಿದ ವೈಯಕ್ತಿಕ ಹಾಗೂ ಅಸಂಬದ್ಧ ಪ್ರಶ್ನೆಗಳನ್ನು ಕೇಳಿದ್ದರು ಎಂದು ಪರೀಕ್ಷೆಗೊಳಗಾದ ಮಹಿಳೆಯರು ಆರೋಪ ಮಾಡಿದ್ದಾರೆ.

  ಈ ದೈಹಿಕ ಪರೀಕ್ಷೆಗೆ ಸಂಬಂಧಿಸಿ ಪುರುಷ ನೌಕರರು ಯಾವುದೇ ದೂರುನೀಡಿಲ್ಲ. ಆದರೆ, ಮಹಿಳೆಯರು ತಮ್ಮನ್ನು ನಡೆಸಿಕೊಂಡ ರೀತಿಗೆ ಆಕ್ಷೇಪ ವ್ಯಕ್ತಪಡಿಸಿ ನೌಕರರ ಸಂಘಕ್ಕೆ ದೂರು ಸಲ್ಲಿಸಿದ್ದಾರೆ ಎಂದು ಸಂಘ ತಿಳಿಸಿದೆ.