'ಕಾಂಗ್ರೆಸ್‌ನಲ್ಲಿದಂತಹ ಕೊರೋನಾ ವೈರಸ್‌‌‌ಗಳನ್ನು ಬಿಜೆಪಿ ತನ್ನೊಳಗೆ ಸೇರಿಸಿಕೊಂಡಿದೆ'-ಬಿಜೆಪಿಗೆ ಕಾಂಗ್ರೆಸ್‌‌

•   Wed, Feb 19 2020 07:23:35 PM



• ಬೆಂಗಳೂರು, ಫೆ.19 (DaijiworldNews/PY): ಕಾಂಗ್ರೆಸ್‌‌ನಲ್ಲಿ ಇದ್ದಂತಹ ಎಲ್ಲಾ ಕೊರೊನಾ ವೈರಸ್‌‌ಗಳನ್ನು ಆಪರೇಷನ್ ಕಮಲ, ಕುದುರೆ ವ್ಯಾಪಾರದ ಮೂಲಕ ಬಿಜೆಪಿಯು ತನ್ನೊಳಗೆ ಸೇರಿಸಿಕೊಂಡಿದೆ ಎಂದು ಕಾಂಗ್ರೆಸ್‌‌ ಘಟಕ ತಿಳಿಸಿದೆ.

  

  ಇತ್ತೀಚೆಗೆ ಸಚಿವ ಎಸ್​.ಟಿ. ಸೋಮಶೇಖರ್ ಕಾಂಗ್ರೆಸ್​ ನಾಯಕರ ವಿರುದ್ಧ ಹೇಳಿಕೆಯೊಂದನ್ನು ನೀಡಿದ್ದು, ಕಾಂಗ್ರೆಸ್​ನಲ್ಲಿ ದೊಡ್ಡ ದೊಡ್ಡ ಕೊರೊನಾ ವೈರಸ್​ಗಳಿವೆ ಎಂದು ವ್ಯಂಗ್ಯವಾಡಿದ್ದರು. ಈ ಹೇಳಿಕೆಗೆ ಟ್ವೀಟ್‌‌ ಮೂಲಕ ತಿರುಗೇಟು ನೀಡಿದ ರಾಜ್ಯ ಕಾಂಗ್ರೆಸ್‌‌‌‌, ಎಸ್‌.ಟಿ.ಸೋಮಶೇಖರ್ ಆದಿಯಾಗಿ ಕಾಂಗ್ರೆಸ್‌‌ನಲ್ಲಿ ಇದ್ದಂತಹ ಎಲ್ಲಾ ಕೊರೊನಾ ವೈರಸ್‌‌ಗಳನ್ನು ಆಪರೇಷನ್ ಕಮಲ, ಕುದುರೆ ವ್ಯಾಪಾರದ ಮೂಲಕ ಬಿಜೆಪಿಯು ತನ್ನೊಳಗೆ ಸೇರಿಸಿಕೊಂಡಿದೆ ಎಂದು ಹೇಳಿದೆ. 

  ಈಗ ಇದೇ ಕೊರೊನಾ ವೈರಸ್​ಗಳು ಸರ್ಕಾರವನ್ನು ಬ್ಲಾಕ್ಮೇಲ್ ಮಾಡಿ ಅಲುಗಾಡಿಸುವ ಬೆದರಿಕೆಯೊಡ್ಡಿ ಒಳಗಿಂದೊಳಗೆ ರೋಗಗ್ರಸ್ತರನ್ನಾಗಿಸಿ ನಿಷ್ಕ್ರಿಯಗೊಳಿಸಿವೆ ಎಂದು ತಿಳಿಸಿದೆ.

  ರಾಜ್ಯದಲ್ಲಿ ಬಿಜೆಪಿ ಸರ್ಕಾರ ಬಂದು 6 ತಿಂಗಳೇ ಆಗಿದ್ದರೂ ಸಹ ಅಭಿವೃದ್ಧಿ ಕಾರ್ಯ ಇನ್ನೂ ಪ್ರಾರಂಭವಾಗಿಲ್ಲ. ಅಲ್ಲದೆ, ಅನರ್ಹ ಶಾಸಕರ ಕಾರಣದಿಂದಾಗಿ ಸಿಎಂ ಬಿಎಸ್‌‌ವೈ ಅವರು ಸಂಪುಟ ರಚನೆ ಹಾಗೂ ವಿಸ್ತರಣೆಗೆ ಸುಮಾರು 2-3 ತಿಂಗಳ ಕಾಲಾವಕಾಶ ತೆಗೆದುಕೊಂಡಿದ್ದರು. ಇದೀಗ ಕೇವಲ ವಲಸಿಗರಿಗೆ ಮಾತ್ರ ಸಚಿವ ಸ್ಥಾನ ನೀಡಿರುವುದು ಹಲವಾರು ಮೂಲ ಬಿಜೆಪಿಗರ ಆಕ್ರೋಶಕ್ಕೆ ಕಾರಣವಾಗಿದೆ.