'ಋತುಮತಿ ಅಡುಗೆ ಮಾಡಿದ್ರೆ ಮುಂದಿನ ಜನ್ಮದಲ್ಲಿ ನಾಯಿಯಾಗ್ತಾಳೆ' - ಸ್ವಾಮೀಜಿಯ ವಿವಾದಾತ್ಮಕ ಹೇಳಿಕೆ

•   Wed, Feb 19 2020 04:20:07 PM



• ಅಹಮದಾಬಾದ್​ , ಫೆ 19 (Daijiworld News/MB) : ಮಹಿಳೆ ಋತುಚಕ್ರದ ಸಮಯದಲ್ಲಿ ಯಾರನ್ನೂ ಮುಟ್ಟುವಂತಿಲ್ಲ. ಋತುಮತಿಯರು ಅಡುಗೆ ಮಾಡಿ ಬಡಿಸಿದರೆ ಮುಂದಿನ ಜನ್ಮದಲ್ಲಿ ನಾಯಿಯಾಗಿ ಅಥವಾ ವೇಶ್ಯೆಯಾಗಿ ಹುಟ್ಟುತ್ತಾರೆ, ಹಾಗೆಯೇ ಅವರು ಮಾಡಿದ ಅಡುಗೆ ಊಟ ಮಾಡಿದರೆ ಎತ್ತಾಗಿ ಹುಟ್ಟುತ್ತಾರೆ ಎಂದು ಇಲ್ಲಿನ ಭುಜ್​ ನಗರದ ಸ್ವಾಮಿ ನಾರಾಯಣ್​​ ಮಂದಿರದ ಕೃಷ್ಣಸ್ವರೂಪ್​ ದಾಸ್​ ಜೀ ವಿವಾದಾದತ್ಮಕ ಹೇಳಿಕೆ ನೀಡಿದ್ದಾರೆ.

  

  ಮೌಢ್ಯ ನಾಶವಾಗುತ್ತಿರುವ ಸಮಯದಲ್ಲಿ ಈ ರೀತಿ ಮೌಢ್ಯ ಹೇಳಿಕೆ ನೀಡುವುದರ ಮೂಲಕ ಕೃಷ್ಣಸ್ವರೂಪ್​ ದಾಸ್​ ಜೀ ವಿವಾದಕ್ಕೆ ಗುರಿಯಾಗಿದ್ದಾರೆ.

  ಅಷ್ಟು ಮಾತ್ರವಲ್ಲದೇ ತನ್ನ ಹೇಳಿಕೆಯನ್ನು ಸಮರ್ಥನೆ ಮಾಡಿರುವ ಅವರು, "ನಾನು ಹೇಳಿದ ಮಾತಿನ ಬಗ್ಗೆ ನೀವು ಏನು ಬೇಕಾದರೂ ಭಾವಿಸಿಕೊಳ್ಳಿ. ಆದರೆ ಶಾಸ್ತ್ರದಲ್ಲಿ ಈ ರೀತಿಯೇ ಬರೆಯಲಾಗಿದೆ. ನಾನು ಅದನ್ನೇ ನಿಮಗೆ ಹೇಳಿದ್ದೇನೆ ಎಂದು ಹೇಳಿದ್ದಾರೆ.

  ಕೃಷ್ಣಸ್ವರೂಪ್ ಹೇಳಿಕೆಗೆ ಭಾರೀ ವಿರೋಧ ವ್ಯಕ್ತವಾಗಿದ್ದು ಅನೇಕ ಮಂದಿ ಸ್ವಾಮೀಜಿಯವರನ್ನು ಪೀಠದಿಂದ ಕೆಳಗಿಸಿಲಿ ಎಂದು ಆಗ್ರಹ ಮಾಡಿದ್ದಾರೆ. ಇನ್ನೂ ಕೆಲವರು ಸಮಾಜಕ್ಕೆ ಬೋಧನೆ ಮಾಡುವವರೇ ಈ ರೀತಿ ಮೌಢ್ಯ ಹೇಳಿಕೆ ನೀಡಿದರೆ ಹೇಗೆ ಎಂದು ಪ್ರಶ್ನೆ ಮಾಡಿದ್ದಾರೆ.

  ಸ್ವಾಮಿ ನಾರಾಯಣ್​​ ಮಂದಿರ ನಡೆಸುತ್ತಿರುವ ಶಾಲೆಯಲ್ಲಿ ಋತುಮತಿಯರನ್ನು ಗುರುತಿಸಲು 60 ವಿದ್ಯಾರ್ಥಿನಿಯರ ಒಳ ಉಡುಪು ಕಳಚುವಂತೆ ಸೂಚನೆ ನೀಡಿದ್ದ ವಿಚಾರ ಭಾರೀ ಚರ್ಚೆಗೆ ಕಾರಣವಾಗಿತ್ತು. ಈ ವಿಚಾರದಲ್ಲಿ ಎಫ್​ಐಆರ್​ ಕೂಡ ದಾಖಲಾಗಿತ್ತು. ಈ ಪ್ರಕರಣ ಚರ್ಚೆಯಲ್ಲಿರುವಾಗಲೇ ಈ ರೀತಿ ವಿವಾದಾತ್ಮಕ ಹೇಳಿಕೆ ನೀಡಿದ್ದಾರೆ.