'ರಾಮ ಮಂದಿರಕ್ಕೆ ಗುದ್ದಲಿಪೂಜೆ ಮಾಡಿದರೆ, ಬಾಬ್ರಿ ಮಸೀದಿ ಕೆಲಸ ಕೈಗೆತ್ತಿಕೊಳ್ಳುತ್ತೇವೆ' -ಫರಾನ್ ಅಜ್ಮಿ

•   Thu, Jan 30 2020 01:53:44 PM



• ಮುಂಬೈ, ಜ.30 (Daijiworld News/PY) : "ಉದ್ದವ್‌ ಠಾಕ್ರೆ ಅವರು ರಾಮ ಮಂದಿರಕ್ಕೆ ಗುದ್ದಲಿಪೂಜೆ ಮಾಡಿದರೆ ನಾವು ಬಾಬ್ರಿ ಮಸೀದಿ ನಿರ್ಮಾಣದ ಕೆಲಸ ಕೈಗೆತ್ತಿಕೊಳ್ಳುತ್ತೇವೆ" ಎಂದು ಎಸ್​ಪಿ ನಾಯಕ ಫರಾನ್ ಅಜ್ಮಿ ಹೇಳಿದ್ದಾರೆ.

  

  ಮುಖ್ಯಮಂತ್ರಿಯಾಗಿ ಅಧಿಕಾರ ಸ್ವೀಕರಿಸಿ 100 ದಿನ ಪೂರೈಸುತ್ತಿರುವ ಹಿನ್ನಲೆಯಲ್ಲಿ ಮಹಾರಾಷ್ಟ್ರ ಮುಖ್ಯಮಂತ್ರಿ ಉದ್ಧವ್ ಠಾಕ್ರೆ ಮಾರ್ಚ್​ ತಿಂಗಳಲ್ಲಿ ಅಯೋಧ್ಯೆಗೆ ಭೇಟಿ ನೀಡಿ ರಾಮನ ಆಶೀರ್ವಾದ ಪಡೆಯುವುದಾಗಿ ಹೇಳಿದ್ದರು. ಈ ಹಿನ್ನೆಲೆಯಲ್ಲಿ ಸಮಾಜವಾದಿ ಪಕ್ಷದ ನಾಯಕ ಅಬು ಅಜ್ಮಿ ಅವರ ಮಗ ಫರಾನ್ ಅಜ್ಮಿ ಹೇಳಿಕೆ ನೀಡಿದ್ದು, "ನಾನು ಕೂಡ ಠಾಕ್ರೆ ಜೊತೆ ಹೋಗಿ ಬಾಬ್ರಿ ಮಸೀದಿಗೆ ಶಂಕುಸ್ಥಾಪನೆ ನೆರವೇರಿಸುತ್ತೇನೆ" ಎಂದಿದ್ದಾರೆ.

  ಮಾರ್ಚ್​ 7ಕ್ಕೆ ಉದ್ಧವ್ ಠಾಕ್ರೆ ಮಹಾರಾಷ್ಟ್ರದ ಮುಖ್ಯಮಂತ್ರಿಯಾಗಿ ಅಧಿಕಾರ ಸ್ವೀಕರಿಸಿ 100 ದಿನಗಳಾಗುತ್ತವೆ. ಈ ಹಿನ್ನೆಲೆಯಲ್ಲಿ ಅಯೋಧ್ಯೆಗೆ ತೆರಳಿ ಶ್ರೀರಾಮನ ದರ್ಶನ ಮಾಡುವುದಾಗಿ ಘೋಷಿಸಿದ್ದ ಅವರು ತಮಗೆ ಸಾಥ್ ನೀಡುವಂತೆ ಮಿತ್ರಪಕ್ಷಗಳಾದ ಕಾಂಗ್ರೆಸ್ ಹಾಗೂ ಎನ್​ಸಿಪಿ ನಾಯಕರನ್ನು ಕೂಡ ಆಹ್ವಾನಿಸುತ್ತೇನೆ ಎಂದಿದ್ದರು.

  ಈ ಹೇಳಿಕೆಗೆ ಪ್ರತಿಕ್ರಿಯೆ ನೀಡಿರುವ ಎಸ್​ಪಿ ನಾಯಕ ಫರಾನ್ ಅಜ್ಮಿ, "ಉದ್ಧವ್ ಠಾಕ್ರೆ ಮಾರ್ಚ್​ ತಿಂಗಳಲ್ಲಿ ಅಯೋಧ್ಯೆಗೆ ಹೋಗುವುದಾಗಿ ಹೇಳಿದ್ದಾರೆ. ನಾನು ಕೂಡ ಅವರೊಂದಿಗೆ ಹೋಗುತ್ತೇನೆ. ಅವರೇನಾದರೂ ಅಲ್ಲಿ ರಾಮ ಮಂದಿರಕ್ಕೆ ಗುದ್ದಲಿಪೂಜೆ ಮಾಡಿದರೆ ನಾವು ಬಾಬ್ರಿ ಮಸೀದಿ ನಿರ್ಮಾಣದ ಕೆಲಸ ಮಾಡುತ್ತೇವೆ" ಎಂದು ಹೇಳಿದ್ದಾರೆ.

  ಇತ್ತೀಚೆಗೆ ಅಯೋಧ್ಯೆಯ ವಿವಾದದ ಕುರಿತು ತೀರ್ಪು ಪ್ರಕಟಿಸಿದ್ದ ಸುಪ್ರೀಂಕೋರ್ಟ್​ ವಿವಾದಿತ ಜಾಗವನ್ನು ರಾಮ್​ಲಲ್ಲಾಗೆ ಬಿಟ್ಟುಕೊಡಬೇಕು, ಬಾಬ್ರಿ ಮಸೀದಿ ಕಟ್ಟಲು ಪ್ರತ್ಯೇಕ ಪ್ರದೇಶದಲ್ಲಿ ಜಾಗ ನೀಡಬೇಕು ಎಂದು ಆದೇಶಿಸಿತ್ತು. ಅಲ್ಲದೆ, ಈ ಬಗ್ಗೆ ಸಮಿತಿ ರಚಿಸುವಂತೆಯೂ ಸೂಚಿಸಲಾಗಿತ್ತು.