ಅಯೋಧ್ಯೆ ತೀರ್ಪು ಹಿನ್ನಲೆ - ಸಾಮಾಜಿಕ ಜಾಲತಾಣಗಳ ಮೇಲೆ ನಿಗಾ

•   Tue, Nov 05 2019 08:09:44 AM



• ಉತ್ತರಪ್ರದೇಶ, ನ.05(Daijiworld News/SS): ಅಯೋಧ್ಯೆ ರಾಮಜನ್ಮಭೂಮಿ-ಬಾಬ್ರಿ ಕಟ್ಟಡ ವಿವಾದ ಪ್ರಕರಣದ ತೀರ್ಪನ್ನು ಸುಪ್ರೀಂ ಕೋರ್ಟ್ ನ. 17ರೊಳಗೆ ಪ್ರಕಟಿಸುವ ಸಾಧ್ಯತೆ ಇದೆ. ಈ ಹಿನ್ನಲೆ, ಸಾಮಾಜಿಕ ಜಾಲತಾಣಗಳ ಮೇಲೆ ನಿಗಾ ಇಡಲಾಗಿದೆ.

  

  ಯಾವುದೇ ಧರ್ಮ, ದೇವರಿಗೆ ಅವಮಾನವಾಗುವ ಸಂದೇಶಗಳನ್ನು ವಾಟ್ಸ್​ಆಪ್, ಟ್ವಿಟ್ಟರ್, ಟೆಲಿಗ್ರಾಂ, ಇನ್​ಸ್ಟಾಗ್ರಾಮ್ಂಥ ಯಾವುದೇ ಸಾಮಾಜಿಕ ಜಾಲತಾಣಗಳಲ್ಲಿ ಪ್ರಕಟಿಸಬಾರದು ಎಂದು ಉತ್ತರ ಪ್ರದೇಶ ಸರ್ಕಾರ ತಾಕೀತು ಮಾಡಿದೆ. ಅಯೋಧ್ಯೆ ಜಿಲ್ಲೆಯ ಜನರಿಗೆ ಈ ನಿಷೇಧ ಅನ್ವಯ. ಈ ಅವಧಿಯಲ್ಲಿ ವಿದ್ಯುನ್ಮಾನ ಮಾಧ್ಯಮಗಳಲ್ಲಿ ಪ್ರಚೋದನಾಕಾರಿ ಚರ್ಚೆ ಆಯೋಜಿಸಬಾರದು ಎಂದು ಸೂಚಿಸಿದೆ.

  ಅಯೋಧ್ಯೆ ಜಿಲ್ಲಾ ಮ್ಯಾಜಿಸ್ಟ್ರೇಟ್ ಅನುಜ್ ಕುಮಾರ್ ಝಾ ಅ. 31ರಂದು ಹೊರಡಿಸಿರುವ ಆದೇಶ ಡಿ. 28ರ ವರೆಗೆ ಜಾರಿಯಲ್ಲಿರುತ್ತದೆ. ಉಲ್ಲಂಘಿಸಿದವರ ವಿರುದ್ಧ ಐಪಿಸಿ 188ನೇ ಸೆಕ್ಷನ್ ಅನ್ವಯ ಪ್ರಕರಣ ದಾಖಲಿಸಲಾಗುತ್ತದೆ. ಈ ಅವಧಿಯಲ್ಲಿ ಛತ್ ಪೂಜೆ, ಕಾರ್ತಿಕ ಪೂರ್ಣಿಮೆ, ಪಂಚಕೋಸಿ ಪರಿಕ್ರಮ, ಚೌಧರಿ ಚರಣ್ ಸಿಂಗ್ ಜನ್ಮ ದಿನ, ಗುರು ನಾನಕ್ ಜಯಂತಿ, ಗುರು ತೇಜ್ ಬಹಾದೂರ್ ಹುತಾತ್ಮ ದಿನ, ಈದ್ ಉಲ್ ಮಿಲಾದ್, ಮತ್ತು ಕ್ರಿಸ್​ವುಸ್ ಆಚರಣೆ ಇರುವುದರಿಂದ ನಿಷೇಧ ಹೇರಲಾಗಿದೆ.

  ಇನ್ನೂ ದುಷ್ಕೃತ್ಯದಲ್ಲಿ ತೊಡಗುವ ಶಕ್ತಿಗಳ ವಿರುದ್ಧ ಅಗತ್ಯಬಿದ್ದರೆ ರಾಷ್ಟ್ರೀಯ ಭದ್ರತಾ ಕಾಯ್ದೆ ಪ್ರಕಾರ ಕಠಿಣ ಕ್ರಮ ಜರುಗಿಸಲಾಗುವುದು ಎಂದು ಉತ್ತರಪ್ರದೇಶ ಪೊಲೀಸ್ ಮಹಾನಿರ್ದೇಶಕ ಒ.ಪಿ. ಸಿಂಗ್ ಎಚ್ಚರಿಸಿದ್ದಾರೆ.