ಫೋನ್​ಗಳನ್ನು ಹ್ಯಾಕ್ ಮಾಡುವುದು ಮಾನವ ಹಕ್ಕುಗಳನ್ನು ಸಂಪೂರ್ಣ ಉಲ್ಲಂಘಿಸಿದಂತೆ - ಪ್ರಿಯಾಂಕಾ ಗಾಂಧಿ

•   Sat, Nov 02 2019 08:10:15 AM



• ನವದೆಹಲಿ, ನ.02(Daijiworld News/SS): ಪತ್ರಕರ್ತರು, ವಕೀಲರು, ಕಾರ್ಯಕರ್ತರು ಮತ್ತು ರಾಜಕಾರಣಿಗಳ ಫೋನ್​ಗಳನ್ನು ಹ್ಯಾಕ್ ಮಾಡಲು ಬಿಜೆಪಿ ಅಥವಾ ಕೇಂದ್ರ ಸರ್ಕಾರ ಇಸ್ರೇಲಿ ಏಜೆನ್ಸಿಗಳನ್ನು ತೊಡಗಿಸಿಕೊಂಡಿದ್ದೇ ಆದರೆ ಅದು ಮಾನವ ಹಕ್ಕುಗಳ ಸಂಪೂರ್ಣ ಉಲ್ಲಂಘನೆ ಮತ್ತು ರಾಷ್ಟ್ರೀಯ ಭದ್ರತೆಯ ಗಂಭೀರ ಹಗರಣವಾಗುತ್ತದೆ. ಈ ಬಗ್ಗೆ ಸರ್ಕಾರದ ಪ್ರತಿಕ್ರಿಯೆಗಾಗಿ ಕಾಯುತ್ತಿದ್ದೇವೆ ಎಂದು ಕಾಂಗ್ರೆಸ್ ನಾಯಕಿ ಪ್ರಿಯಾಂಕಾ ಗಾಂಧಿ ಹೇಳಿದ್ದಾರೆ.

  

  ಪ್ರಮುಖ ಪತ್ರಕರ್ತರು, ರಾಜಕಾರಣಿಗಳು, ವಕೀಲರು, ಹಿರಿಯ ಸರ್ಕಾರಿ ಅಧಿಕಾರಿಗಳ ವಾಟ್ಸ್​ಆಪ್​ಗಳಿಂದ ಮಾಹಿತಿ ಕದಿಯಲು ಇಸ್ರೇಲಿ ಕಂಪನಿಯೊಂದು ಸ್ಪೈವೇರ್ ವೈರಸ್ ಕಳಿಸಿದ್ದ ಪ್ರಕರಣದಲ್ಲಿ ಅಚ್ಚರಿಯ ಮಾಹಿತಿ ಹೊರಬಿದ್ದಿದೆ. ಈ ವೈರಸ್ ಅತ್ಯಂತ ಅಪಾಯಕಾರಿಯಾಗಿದ್ದು, ಒಂದು ಮಿಸ್​ಕಾಲ್​ನಿಂದ ಮೊಬೈಲ್​ಗೆ ವೈರಸ್ ಲಗ್ಗೆ ಇಡುತ್ತಿತ್ತು ಎಂದು ತಿಳಿದುಬಂದಿದೆ. ಕ್ಯಾಲಿಫೋರ್ನಿಯಾದ ಜಿಲ್ಲಾ ಕೋರ್ಟ್'ನಲ್ಲಿ ವಾಟ್ಸ್​ಆಪ್ ಇಸ್ರೇಲ್​ನ ಸೈಬರ್ ಭದ್ರತಾ ಸಂಸ್ಥೆ ಎನ್​ಎಸ್​ಒ ವಿರುದ್ಧ ದೂರು ನೀಡಿದ್ದು, ಇದರಲ್ಲಿ ಎನ್​ಎಸ್​ಒ ವೈರಸ್ ಎಷ್ಟು ಅಪಾಯಕಾರಿ ಹಾಗೂ ಮಾಹಿತಿ ಕದಿಯುವಲ್ಲಿ ಯಾವ ರೀತಿ ಕೆಲಸ ನಿರ್ವಹಿಸುತ್ತಿತ್ತು ಎಂಬುದನ್ನು ತಿಳಿಸಲಾಗಿದೆ.

  ಇಸ್ರೇಲಿ ಕಂಪನಿಯ ಸ್ಪೈವೇರ್ ವಿಡಿಯೋ ಕಾಲಿಂಗ್ ಸೌಲಭ್ಯದ ಮೂಲಕ ಮೊಬೈಲ್ ಪ್ರವೇಶಿಸುತ್ತಿತ್ತು. ಬಳಿಕ ವೈರಸ್ ಮೊಬೈಲ್​ಗೆ ಇನ್​ಸ್ಟಾಲ್ ಆಗುತ್ತಿತ್ತು. ಬಳಕೆದಾರರು ವಿಡಿಯೋ ಕಾಲ್ ರಿಸೀವ್ ಮಾಡದಿದ್ದರೂ ಕೂಡ ರಹಸ್ಯ ಕೋಡ್ ಮೂಲಕ ವೈರಸ್ ತನ್ನ ಕೆಲಸ ಪ್ರಾರಂಭಿಸುತ್ತಿತ್ತು ಎನ್ನಲಾಗಿದೆ. ಇದೇ ರೀತಿ ವೈರಸ್ ಜಗತ್ತಿನ ಸುಮಾರು 1400 ಮೊಬೈಲ್​ಗಳಲ್ಲಿ ಕಾರ್ಯನಿರ್ವಹಿಸಿದೆ. ಇಸ್ರೇಲಿ ಸ್ಪೈವೇರ್​ನಿಂದಾಗಿ ವಾಟ್ಸ್​ಆಪ್​ಗೆ ಸುಮಾರು 54 ಲಕ್ಷ ರೂಪಾಯಿ ನಷ್ಟ ಸಂಭವಿಸಿದೆ ಎಂದು ಸಂಸ್ಥೆ ದೂರಿನಲ್ಲಿ ತಿಳಿಸಿದೆ.