ಕಣಿವೆ ರಾಜ್ಯ ಜಮ್ಮು - ಕಾಶ್ಮೀರದಲ್ಲಿ ಕಟ್ಟೆಚ್ಚರ

•   Wed, Oct 16 2019 07:34:40 AM



• ಶ್ರೀನಗರ, ಅ.16(Daijiworld News/SS): ಜಮ್ಮು – ಶ್ರೀನಗರದ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಸಂಚರಿಸುವ ಸರ್ಕಾರಿ ಹಾಗೂ ಭದ್ರತಾ ಪಡೆಗಳ ವಾಹನಗಳನ್ನು ಉಗ್ರರು ಗುರಿಯಾಗಿಸಿಕೊಂಡು ದಾಳಿ ನಡೆಸುವ ಸಾಧ್ಯತೆಗಳಿವೆ ಎಂದು ಗುಪ್ತಚರ ಇಲಾಖೆ ಎಚ್ಚರಿಕೆ ನೀಡಿದೆ.

  

  ಮಾತ್ರವಲ್ಲ, ಜಮ್ಮು- ಕಾಶ್ಮೀರದ ವಿಶೇಷ ಸ್ಥಾನಮಾನ ರದ್ದುಗೊಳಿಸಿದನ್ನು ವಿರೋಧಿಸಿ ಶ್ರೀನಗರದ ಲಾಲ್​ಚೌಕ್ ಮತ್ತು ಪ್ರತಾಪ್ ಪಾರ್ಕ್ ಬಳಿ ಪ್ರತಿಭಟನೆ ನಡೆಸುತ್ತಿದ್ದ ಮಾಜಿ ಮುಖ್ಯಮಂತ್ರಿ ಫಾರೂಕ್ ಅಬ್ದುಲ್ಲಾರ ಮಗಳು ಸಫಿಯಾ ಅಬ್ದುಲ್ಲಾ ಖಾನ್, ಸಹೋದರಿ ಸುರೈಯಾ ಅಬ್ದುಲ್ಲಾ, ಹೈಕೋರ್ಟ್​ನ ನಿವೃತ್ತ ಮುಖ್ಯ ನ್ಯಾಯಮೂರ್ತಿ ಬಶೀರ್ ಅಹ್ಮದ್ ಖಾನ್​ರ ಪತ್ನಿ ಹವಾ ಬಶೀರ್ ಸೇರಿ ಹಲವು ಮಹಿಳೆಯರನ್ನು ಭದ್ರತಾ ಪಡೆಗಳು ಬಂಧಿಸಿವೆ. ಇದರಿಂದ ಕಾಶ್ಮೀರದಲ್ಲಿ ಮತ್ತೆ ಬಿಗುವಿನ ವಾತಾವರಣ ನಿರ್ವಣವಾಗಿದೆ.

  ಕೇಂದ್ರ ಸರ್ಕಾರದ ವಿರುದ್ಧ ಘೋಷಣೆ ಕೂಗುತ್ತಿದ್ದ ಮಹಿಳೆಯರನ್ನು ವಶಕ್ಕೆ ಪಡೆದು ಸೆಂಟ್ರಲ್ ಜೈಲ್​ಗೆ ಸ್ಥಳಾಂತರಿಸಲಾಗಿದೆ. ಬಂಧನವನ್ನು ಖಂಡಿಸಿದ ಸುರೈಯಾ ಅಬ್ದುಲ್ಲಾ, ಆ.5ರಿಂದ ನಮ್ಮನ್ನು ಮನೆಯೊಳಗೆ ಕೂಡಿ ಹಾಕಿ ಕಾಶ್ಮೀರದ ವಿಶೇಷ ಸ್ಥಾನಮಾನ ರದ್ದುಗೊಳಿಸಲಾಗಿದೆ. ಇದು ಬಲವಂತದ ನಿರ್ಧಾರವಾಗಿದ್ದು, ಇಂಥದಕ್ಕೆ ಆಸ್ಪದವಿಲ್ಲ ಎಂದು ಆಕ್ರೋಶ ವ್ಯಕ್ತಪಡಿಸಿದರು.

  72 ದಿನಗಳಿಂದ ಸ್ಥಗಿತಗೊಂಡಿದ್ದ ಪೋಸ್ಟ್​ಪೇಡ್ ಮೊಬೈಲ್ ಸೇವೆಯನ್ನು ಸೋಮವಾರ ಮಧ್ಯಾಹ್ನದಿಂದ ಪುನಃ ಆರಂಭಿಸಿದ ಬೆನ್ನಲ್ಲೇ ಎಸ್​ಎಂಎಸ್ ಸೇವೆ ಸ್ಥಗಿತ ಮಾಡಲಾಗಿದೆ. ಮುಂಜಾಗೃತಾ ಕ್ರಮವಾಗಿ ಎಸ್​ಎಂಎಸ್ ಸಂದೇಶಕ್ಕೆ ನಿರ್ಬಂಧ ವಿಧಿಸಿದ್ದೇವೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

  ಪ್ರೀಪೇಡ್ ಹಾಗೂ ಇಂಟರ್​ನೆಟ್ ಸೇವೆಗಳನ್ನು ಇನ್ನೂ ನೀಡಿಲ್ಲ. ಆದರೆ, ರಾಜ್ಯಪಾಲ ಸತ್ಯಪಾಲ್ ಮಲಿಕ್ ಶೀಘ್ರದಲ್ಲೇ ಇಂಟರ್​ನೆಟ್ ಸೇವೆ ಆರಂಭಿಸಲಾಗುವುದು ಎಂದಿದ್ದಾರೆ.