ತಿಹಾರ್​ ಜೈಲು ಅಧಿಕಾರಿಗಳ ವಿರುದ್ಧ ಡಿ.ಕೆ.ಶಿವಕುಮಾರ್ ಆರೋಪ

•   Tue, Oct 15 2019 03:13:39 PM



• ನವದೆಹಲಿ, ಅ.15(Daijiworld News/SS): ಮಾಜಿ ಸಚಿವ ಡಿ.ಕೆ.ಶಿವಕುಮಾರ್ ಇ.ಡಿ.ವಿಶೇಷ ನ್ಯಾಯಾಲಯದಲ್ಲಿ ವಿಚಾರಣೆಯ ವೇಳೆ ತಿಹಾರ್​ ಜೈಲು ಅಧಿಕಾರಿಗಳ ವಿರುದ್ಧ ಆರೋಪ ಮಾಡಿದ್ದಾರೆ.

  

  ಓರ್ವ ವಿಚಾರಣಾಧೀನ ಕೈದಿಯನ್ನು ಹೇಗೆ ನಡೆಸಿಕೊಳ್ಳಬೇಕು ಎಂಬುದು ನನಗೆ ಗೊತ್ತು. ಆದರೆ ನನ್ನನ್ನು ತಿಹಾರ್ ಪೋಲಿಸರು ಒಳ್ಳೆಯ ರೀತಿಯಲ್ಲಿ ನಡೆಸಿಕೊಳ್ಳುತ್ತಿಲ್ಲ. ಪೊಲೀಸರು ಜೈಲಿನಲ್ಲಿ ನನ್ನನ್ನು ಸರಿಯಾಗಿ ನಡೆಸಿಕೊಳ್ಳುತ್ತಿಲ್ಲ. ಬ್ಯಾರಕ್​ನಿಂದ ಹೊರಗೆ ಬಂದ ವೇಳೆ ಕುಳಿತುಕೊಳ್ಳಲು ಕುರ್ಚಿಯನ್ನೂ ನೀಡುತ್ತಿಲ್ಲ. ನಾನು ಲೈಬ್ರರಿಗೆ ಹೋದರೂ ನಿಂತುಕೊಂಡೇ ಪುಸ್ತಕಗಳನ್ನು ಓದಬೇಕು. ನಾನು ಕರ್ನಾಟಕದಲ್ಲಿ ಈ ಹಿಂದೆ ಬಂಧೀಖಾನೆ ಸಚಿವನಾಗಿದ್ದವನು ಎಂದು ನ್ಯಾಯಾಧೀಶರ ಬಳಿ ಕೋರ್ಟ್​ನಲ್ಲಿ ಹೇಳಿದ್ದಾರೆ.

  ಇದಕ್ಕೆ ಪ್ರತಿಕ್ರಿಯಿಸಿದ ನ್ಯಾಯಾಧೀಶರು, ಒಬ್ಬ ವಿಚಾರಣಾಧೀನ ಕೈದಿ ಬ್ಯಾರಕ್​ನಿಂದ ಹೊರಗೆ ಬಂದಾಗ, ಲೈಬ್ರರಿಯಲ್ಲಿ ಪುಸ್ತಕ ಓದುವಾಗ ಆತನಿಗೆ ಕುರ್ಚಿ ಕೊಡಲು ಸಾಧ್ಯವಿಲ್ಲ ಎಂದಾದರೆ ಯಾಕಾಗಿ ಆ ಕುರ್ಚಿಗಳನ್ನು ಇಡಲಾಗಿದೆ ಎಂದು ಪೊಲೀಸರನ್ನು ಪ್ರಶ್ನಿಸಿದ್ದಾರೆ.