ಫುಡ್ ಡೆಲಿವರಿ ಮಾಡಿ ನಾಯಿ ಮರಿ ಕಿಡ್ನಾಪ್ ಮಾಡಿದ ಜೊಮ್ಯಾಟೋ ಡೆಲಿವರಿ ಬಾಯ್

•   Wed, Oct 09 2019 11:35:01 AM



• ಪುಣೆ, ಅ 09 (Daijiworld News/MSP): ಪುಣೆಯ ದಂಪತಿಗಳು ಜೊಮ್ಯಾಟೋ ಡೆಲಿವರಿ ಬಾಯ್​ ವಿರುದ್ಧ ನಾಯಿ ಮರಿಯನ್ನು ಕಿಡ್ನಾಪ್ ಮಾಡಿರುವ ಆರೋಪ ಹೊರಿಸಿದ್ದಾರೆ. ನಾಯಿ ಮರಿ ಕಿಡ್ನಾಪ್ ವಿಚಾರ ಇದೀಗ ಪೊಲೀಸ್ ಠಾಣೆಯ ಮೆಟ್ಟಿಲೇರಿದೆ.

  

  ಪುಣೆಯ ಕಾರ್ವೆ ರಸ್ತೆ ಸನಿಹ ವಾಸವಾಗಿದ್ದ ವಂದನಾ ಶಾ ದಂಪತಿಗಳು ಜೊಮ್ಯಾಟೋದಲ್ಲಿ ಆಹಾರ ಆರ್ಡರ್​ ಮಾಡಿದ್ದರು. ಈ ವೇಳೆ ಡೆಲಿವರಿ ಬಾಯ್ ತುಷಾರ್​ ಫುಡ್ ಡೆಲಿವರಿ ಮಾಡಿದ್ದ. ಇಷ್ಟೇ ವಿಚಾರ ಆಗಿದ್ರೆ ಸುದ್ದಿಯಾಗುತ್ತಿರಲಿಲ್ಲ. ಆದ್ರೆ ತುಷಾರ್ ಬಂದ ಕೆಲಸ ಮಾಡಿ, ಹೊರಡುವಾಗ ಮನೆಯ ಒಳಭಾಗದಲ್ಲಿ ಆಟವಾಡುತ್ತಿದ್ದ, ವಂದನಾ ಶಾ ಸಾಕಿದ್ದ ದತ್ತು ಹೆಸರಿನ ನಾಯಿ ಮರಿಯನ್ನು ಕದ್ದೊಯ್ದಿದ್ದ.

  ಆದ್ರೆ ಆ ಬಳಿಕ ದಂಪತಿಗಳು ನಾಯಿಮರಿಗಾಗಿ ಹುಡುಕಾಡಿದ್ದಾರೆ, ಎಲ್ಲೂ ಹುಡುಕಾಡಿದರೂ ದತ್ತು ಕಾಣಿಸದಾಗ ಸಿಸಿಟಿವಿ ಪರಿಶೀಲಿಸಿದ್ದಾರೆ. ಈ ವೇಳೆ ತುಷಾರ್​ ನಾಯಿ ಮರಿಯನ್ನು ಕದ್ದೊಯ್ದ ವಿಚಾರ ಬಯಲಾಗಿದೆ.

  ತಮ್ಮ ಮನೆಯ ಸಮೀಪ ಆಹಾರ ವಿತರಣಾ ಹುಡುಗರನ್ನು ವಿಚಾರಿಸಿದಾಗ, ಅವರಲ್ಲಿ ಒಬ್ಬ ನಾಯಿಯನ್ನು ಗುರುತಿಸಿ ಇದು ತನ್ನ ಸಹೋದ್ಯೋಗಿ ತೆಗೆದುಕೊಂಡು ಹೋಗಿರುವುದನ್ನು ಖಚಿತಪಡಿಸಿದ್ದಾನೆ.

  ವಂದನಾ ಶಾ ಈ ಬಗ್ಗೆ ಜೊಮ್ಯಾಟೋಗೆ ದೂರು ನೀಡಿದ್ದಾರೆ. ಈ ಸಂದರ್ಭ ಜೊಮ್ಯಾಟೋ ಕೂಡಾ ಪ್ರತಿಕ್ರಿಯೆ ನೀಡಿ, " ಈ ರೀತಿ ವರ್ತಿಸಿರುವುದು ಸ್ವೀಕಾರಾರ್ಹವಲ್ಲ. ದಯವಿಟ್ಟು ನಿಮ್ಮನ್ನು ಸಂಪರ್ಕಿಸುವ ವಿವರಗಳನ್ನು ನೀಡಿ, ನಮ್ಮ ತಂಡ ನಿಮಗೆ ಸಹಾಯ ಮಾಡುತ್ತದೆ" ಎಂದಿದೆ.

  ಮಹಿಳೆ ತುಷಾರ್​ ಬಳಿ ಕೇಳಿದಾಗ ಆತ ಈ ವಿಚಾರವನ್ನು ಒಪ್ಪಿಕೊಂಡಿದ್ದಾನೆ. ನಾಯಿ ಮರಿ ಇಷ್ಟವಾಗಿದೆ. ನಾನು ಅದನ್ನು ವಾಪಾಸು ಕೊಡುವುದಿಲ್ಲ. ಅದನ್ನು ತನ್ನೂರಿಗೆ ಕಳುಹಿಸಿರುವುದಾಗಿ ಹೇಳಿದ್ದಾನೆ. ಅಲ್ಲದೆ ಬೇಕಿದ್ದರೆ ದುಡ್ಡು ಪಡೆದುಕೊಳ್ಳಿ ಎಂದು ಮೊಬೈಲ್ ಸ್ವಿಚ್ ಆಫ್ ಮಾಡಿದ್ದಾನೆ.

  ಇದರಿಂದ ಸಿಟ್ಟಾದ ವಂದನಾ ಪೊಲೀಸ್​ ಠಾಣೆಯ ಮೆಟ್ಟಿಲೇರಿದ್ದಾರೆ ಪೊಲೀಸರಿಂದ ಸಹಾಯದ ಭರವಸೆ ನೀಡಲಾಗಿದ್ದರೂ, ದೂರು ದಾಖಲಿಸಲು ಪೊಲೀಸರು ನಿರಾಕರಿಸಿದ್ದಾರೆ ಎಂದು ಶಾ ಮತ್ತು ಅವರ ಪತಿ ಹೇಳಿದ್ದಾರೆ.