ಉಗ್ರ ದಾಳಿ ಸಾಧ್ಯತೆ - ದೇಶದ ಪ್ರಮುಖ ನಗರಗಳಲ್ಲಿ ಕಟ್ಟೆಚ್ಚರ

•   Fri, Oct 04 2019 09:09:24 AM



• ನವದೆಹಲಿ, ಅ.04(Daijiworld News/SS): ಜೈಷ್‌ ಎ ಮೊಹಮ್ಮದ್‌ ಸಂಘಟನೆಗೆ ಸೇರಿದ ಉಗ್ರರು ದೇಶದ ರಾಜಧಾನಿ ಹೊಸದಿಲ್ಲಿಯೊಳಗೆ ನುಸುಳಿದ್ದಾರೆ ಎಂಬ ಗುಪ್ತಚರ ಮಾಹಿತಿ ಲಭ್ಯವಾಗಿದೆ.

  

  ಜಮ್ಮು- ಕಾಶ್ಮೀರದ ವಿಶೇಷ ಸ್ಥಾನಮಾನ ರದ್ದತಿ ಬಳಿಕ ಭಾರತದ ವಿರುದ್ಧ ಆಕ್ರೋಶಗೊಂಡಿರುವ ಉಗ್ರರು, ಜಮ್ಮು- ಕಾಶ್ಮೀರ ಸೇರಿ ದೇಶದ ವಿವಿಧೆಡೆ ವಿಧ್ವಂಸಕ ಕೃತ್ಯ ನಡೆಸುವ ಸಾಧ್ಯತೆ ಪ್ರಬಲವಾಗಿದೆ. ಮಸೂದ್ ಅಜರ್ ಮತ್ತು ಆತನ ಸಹಚರರು ವಿಧ್ವಸಂಕ ಕೃತ್ಯ ಸಂಚು ನಡೆಸಿದ್ದಾರೆಂದು ಕಳೆದ ಒಂದು ವಾರದಿಂದ ಗುಪ್ತಚರ ಇಲಾಖೆಗೆ ಮಾಹಿತಿ ಬರುತ್ತಿವೆ.

  ಈ ಹಿನ್ನೆಲೆಯಲ್ಲಿ ದೇಶಾದ್ಯಂತ 30 ಪ್ರಮುಖ ನಗರಗಳಲ್ಲಿ ಕಟ್ಟೆಚ್ಚರ ವಹಿಸಲು ಕೇಂದ್ರ ಗೃಹ ಸಚಿವಾಲಯ ಸೂಚಿಸಿದೆ. ಶ್ರೀನಗರ, ಅವಂತಿಪೋರಾ, ಜಮ್ಮು ಪಠಾಣ್​ಕೋಟ್, ಹಿಂಡನ್ ವಾಯುನೆಲೆಗಳಲ್ಲಿ ‘ಆರೆಂಜ್ ಅಲರ್ಟ್’ ಸೂಚಿಸಲಾಗಿದೆ. ವಾಯುಪಡೆಯ ಮುಂಚೂಣಿ ನೆಲೆಗಳಿಗೆ ಜಾಗೃತವಾಗಿರುವಂತೆ ಕೇಂದ್ರ ಗೃಹ ಸಚಿವಾಲಯ ಹೇಳಿದೆ.

  ಜೈಷ್ ಉಗ್ರರು ಏರ್​ಬಸ್​ಗಳ ಮೇಲೆ ಆತ್ಮಾಹುತಿ ದಾಳಿ ನಡೆಸಲು ಸಂಚು ರೂಪಿಸಿರುವ ಕುರಿತು ನಾಗರಿಕ ವಿಮಾನಯಾನ ಭದ್ರತಾ ಬ್ಯೂರೊಗೆ ಸೆ.10ರಂದು ದೊರೆತಿರುವ ಬೆದರಿಕೆ ಪತ್ರದಲ್ಲಿ ಉಲ್ಲೇಖಿಸಲಾಗಿದೆ.