ಪುಲ್ವಾಮಾ ರೀತಿಯಲ್ಲಿ ಆತ್ಮಾಹುತಿ ದಾಳಿ ನಡೆಸಲು ಮತ್ತೆ ಉಗ್ರ ಸಂಘಟನೆಗಳಿಂದ ಸಂಚು

•   Thu, Jun 20 2019 07:45:11 AM



• ಕಾಶ್ಮೀರ, ಜೂ20(Daijiworld News/SS): ಲಷ್ಕರ್-ಎ-ತೊಯ್ಬಾ (ಎಲ್​ಇಟಿ), ಜೈಷ್-ಎ-ಮೊಹಮ್ಮದ್ (ಜೆಇಎಂ) ಸಂಘಟನೆಗಳು ಪುಲ್ವಾಮಾ ರೀತಿಯಲ್ಲಿ ಆತ್ಮಾಹುತಿ ದಾಳಿ ನಡೆಸಲು ಸಿದ್ಧತೆ ನಡೆಸುತ್ತಿವೆ ಎಂಬ ಮಾಹಿತಿ ಉನ್ನತ ಮೂಲಗಳಿಂದ ಲಭ್ಯವಾಗಿದೆ.

  

  ಪಾಕಿಸ್ತಾನ ಮೂಲದ ಉಗ್ರರು ಗಡಿ ನಿಯಂತ್ರಣ ರೇಖೆ (ಎಲ್​ಒಸಿ) ಬಳಿ ಭಾರತದ ಭದ್ರತಾ ಪಡೆಗಳು ಮತ್ತು ಸೇನಾ ಪ್ರದೇಶಗಳ ಮೇಲೆ ದೊಡ್ಡ ಮಟ್ಟದಲ್ಲಿ ದಾಳಿ ನಡೆಸುವ ಸಾಧ್ಯತೆ ಇದೆ ಎಂದು ತಿಳಿದುಬಂದಿದೆ. ದಕ್ಷಿಣ ಮತ್ತು ಉತ್ತರ ಕಾಶ್ಮೀರದ ಸೇನಾ ಶಿಬಿರ, ಯೋಧರು ಸಂಚರಿಸುವ ಮಾರ್ಗಗಳನ್ನು ಉಗ್ರರು ಗುರಿಯಾಗಿರಿಸಿಕೊಳ್ಳುವ ಸಾಧ್ಯತೆ ಹೆಚ್ಚಿದೆ ಎನ್ನಲಾಗಿದೆ.

  ಈ ಹಿನ್ನಲೆಯಲ್ಲಿ, ಬಾರಾಮೂಲದ ಸೆಕ್ಟರ್ ಮತ್ತು ಕುಪ್ವಾರದ ಹೆದ್ದಾರಿಗಳಲ್ಲಿ ಸೇನಾ ಸಿಬ್ಬಂದಿ ಸಂಚಾರದ ವೇಳೆ ಜಾಗ್ರತೆ ವಹಿಸುವಂತೆ ಬೇಹುಗಾರಿಕಾ ದಳ ಸೇನೆಗಳಿಗೆ ಸೂಚನೆಯನ್ನು ನೀಡಿದೆ. ನೇಪಾಳ ಮೂಲಕ ಭಾರತ ಪ್ರವೇಶಿಸುವ ಪ್ರಯತ್ನವನ್ನು ಪಾಕ್​ನ ಗುಪ್ತಚರ ಇಲಾಖೆ ಐಎಸ್​ಐ ಮಾಡುತ್ತಿದೆ ಎನ್ನಲಾಗಿದೆ.

  ಕಳೆದ ಕೆಲ ತಿಂಗಳುಗಳ ಹಿಂದೆ ನಡೆದ ಪುಲ್ವಾಮಾ ದಾಳಿಯ ನಂತರ ಭಾರತದ ಭದ್ರತಾಪಡೆಗಳು ಉಗ್ರ ನಿಗ್ರಹ ಕಾರ್ಯಾಚರಣೆಯನ್ನು ತೀವ್ರಗೊಳಿಸಿದ್ದು, 50ಕ್ಕೂ ಹೆಚ್ಚು ಉಗ್ರರನ್ನು ಹೊಡೆದುರುಳಿಸಿವೆ. ಇದಕ್ಕೆ ಪ್ರತೀಕಾರ ತೀರಿಸಿಕೊಳ್ಳುವ ಉಗ್ರರು ದಾಳಿಗೆ ಸಂಚು ನಡೆಸುತ್ತಿದ್ದಾರೆ.