ಯಾರೆ ನೀ ಭುವನ ಮೋಹಿನಿ? ಸುಂದರ ಯುವತಿಯ ಆಕರ್ಷಕ ಯಕ್ಷ ಕುಣಿತಕ್ಕೆ ಬೆರಗಾದ ನೆಟ್ಟಿಗರು

•   Mon, May 20 2019 04:36:39 PM



• ಮಲ್ಪೆ, ಮೇ 20 (Daijiworld News/MSP): ಬಡಗತಿಟ್ಟಿನ ಖ್ಯಾತ ಭಾಗವತ ಜನ್ಸಾಲೆ ರಾಘವೇಂದ್ರ ಆಚಾರ್ಯರ ಅವರ ಖ್ಯಾತ 'ಯಾರೆ ನೀನು ಭುವನ ಮೋಹಿನಿ' ಯಕ್ಷಗಾನದ ಹಾಡಿಗೆ ಹೆಜ್ಜೆ ಹಾಕಿದ ಯುವತಿಯ ಆಕರ್ಷಕ ಯಕ್ಷ ಕುಣಿತವೊಂದು ರಾಜ್ಯಾದ್ಯಂತ ವೈರಲ್ ಆಗಿ ಜನಮನ ಸೆಳೆದಿದೆ.

  

  

  ಮದುವೆಯ ಮುನ್ನಾ ದಿನದ ಮೆಹಂದಿ ಶಾಸ್ತ್ರದಲ್ಲಿ ಸಂಬಂಧಿಕರ ಒತ್ತಾಯದ ಮೇರೆಗೆ ಬಡಗುತಿಟ್ಟಿನ “ಯಾರೆ ನೀನು ಭುವನ ಮೋಹಿನಿ’ ಹಾಡಿಗೆ ಕಡೆಕಾರಿನ ಯುವ ಕಲಾವಿದೆ ಚೈತ್ರಾ ವಿ.ಶೆಟ್ಟಿ ಅವರು ಹೆಜ್ಜೆ ಹಾಕಿದ್ದರು. ಇದನ್ನು ಚಿತ್ರೀಕರಿಸಿ ಯಕ್ಷಗಾನ ಪ್ರಿಯರು ಸಾಮಾಜಿಕ ಜಾಲತಾಣದಲ್ಲಿ ಹರಿಬಿಟ್ಟಿದ್ದಾರೆ. ಇದು ವಾಟ್ಸಪ್‌ ಸಹಿತ ಸಾಮಾಜಿಕ ಜಾಲತಾಣಗಳಲ್ಲಿ ಓಡಾಡುತ್ತಿದ್ದು, ಲಕ್ಷಾಂತರ ಮಂದಿ ವೀಕ್ಷಿಸಿ ಮೆಚ್ಚಿದ್ದಾರೆ.

  ಮೋಹಿನಿ ಹೆಬ್ರಿಯ ವಿಜಯ ಕುಮಾರ್ ಶೆಟ್ಟಿ ಹಾಗೂ ಜಯಂತಿ ಶೆಟ್ಟಿ ದಂಪತಿಯ ಪುತ್ರಿ ಚೈತ್ರಾ ಶೆಟ್ಟಿ(24). ಬಿಎಸ್ ಸಿ ನರ್ಸಿಂಗ್ ಪದವಿ ಪಡೆದು ಮಣಿಪಾಲದಲ್ಲಿ ಕರ್ತವ್ಯದಲ್ಲಿರುವ ಇವರು ಸದ್ಯ ಮಣಿಪಾಲದ ಮಾಹೆ ವಿವಿಯಲ್ಲಿ ಉನ್ನತ ವ್ಯಾಸಂಗ ಮಾಡುತ್ತಿದ್ದಾರೆ. ಚೈತ್ರಾ 7ನೇ ತರಗತಿಯಲ್ಲಿರುವಾಗಲೇ ಯಕ್ಷಗಾನದ ಬಗ್ಗೆ ಆಸಕ್ತಿ ಹೊಂದಿ ರಾಜೀವ ತೋನ್ಸೆ ಅವರಲ್ಲಿ ಹೆಜ್ಜೆಗಾರಿಕೆ ಅಭ್ಯಾಸ ಮಾಡಿದ್ದಾರೆ. ಗಂಗಾಧರ ಜಿ.ಕಡೆಕಾರ್‌ ಅವರ ನೇತೃತ್ವದ ದುರ್ಗಾಂಬಿಕಾ ಮಹಿಳಾ ಯಕ್ಷಗಾನ ತಂಡದಲ್ಲೂ ಪ್ರಮುಖ ವೇಷಧಾರಿ, ಚೆಂಡೆ ವಾದಕಿಯೂ ಆಗಿದ್ದಾಳೆ.