ಮುಲ್ಕಿ: ಸ್ಕೂಟರ್-ಓಮ್ನಿ ಕಾರು ನಡುವೆ ಅಪಘಾತ; ಸವಾರನಿಗೆ ಗಾಯ

•   Mon, Jul 29 2024 03:32:02 PM



• ಮುಲ್ಕಿ, ಜು.29(DaijiworldNews/AA): ದ್ವಿಚಕ್ರ ವಾಹನ ಮತ್ತು ಓಮ್ನಿ ಕಾರು ನಡುವೆ ಅಪಘಾತ ಸಂಭವಿಸಿದ್ದು, ದ್ವಿಚಕ್ರ ವಾಹನ ಸವಾರನೋರ್ವ ಗಾಯಗೊಂಡ ಘಟನೆ ರಾಷ್ಟ್ರೀಯ ಹೆದ್ದಾರಿ 66ರ ಕೊಲ್ನಾಡ್ ಬಳಿ ಇಂದು ಬೆಳಗ್ಗೆ ನಡೆದಿದೆ.

  ಅಪಘಾತದಲ್ಲಿ ಕೊಲ್ನಾಡ್ ನಿವಾಸಿ ಮನೀಶ್(22) ಗಾಯಗೊಂಡಿದ್ದಾರೆ.

  ಮನೀಶ್ ಮಂಗಳೂರಿನ ಮಾಲ್ ವೊಂದರಲ್ಲಿರುವ ಮೊಬೈಲ್ ಶೋರೂಮ್ ನಲ್ಲಿ ಕೆಲಸ ಮಾಡುತ್ತಿದ್ದರು. ಅವರು ಮನೆಯಿಂದ ತನ್ನ ದ್ವಿಚಕ್ರ ವಾಹನದಲ್ಲಿ ಕೊಲ್ನಾಡು ಬಸ್ ನಿಲ್ದಾಣದವರೆಗೆ ಬಂದು ಅಲ್ಲಿ ಸ್ಕೂಟರ್ ಅನ್ನು ಇಟ್ಟು ಬಸ್ ನಲ್ಲಿ ಮಂಗಳೂರಿಗೆ ತೆರಳುತ್ತಿದ್ದರು ಎಂದು ಹೇಳಲಾಗಿದೆ.

  ಎಂದಿನಂತೆ ಇಂದು ಕೂಡ ಕೊಲ್ನಾಡು ಕಡೆಯಿಂದ ತನ್ನ ಸ್ಕೂಟಿಯಲ್ಲಿ ಬರುತ್ತಿದ್ದ ವೇಳೆ ಈ ಅವಘಡ ನಡೆದಿದೆ. ಅಪಘಾತದಲ್ಲಿ ಗಾಯಗೊಂಡ ಅವರನ್ನು ಸಮೀಪದ ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಯಿತು ಎಂದು ತಿಳಿದುಬಂದಿದೆ. ಘಟನಾ ಸ್ಥಳಕ್ಕೆ ಮಂಗಳೂರು ಉತ್ತರ ಸಂಚಾರ ಪೊಲೀಸರು ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದು, ಪ್ರಕರಣ ದಾಖಲಿಸಿಕೊಂಡಿದ್ದಾರೆ.