ಉಡುಪಿ: ಕಳ್ಳರ ಕೈಯಿಂದ ತಪ್ಪಿಸಿ ಪ್ರಾಣ ಉಳಿಸಿಕೊಂಡ ಗೋವುಗಳು

•   Mon, May 13 2019 06:37:08 PM



• ಉಡುಪಿ, ಮೇ13(Daijiworld News/SS): ದನದ ಕೊಟ್ಟಿಗೆಗೆ ನುಗ್ಗಿದ್ದ ಕಳ್ಳರು ಜಾನುವಾರುಗಳನ್ನು ಕದಿಯಲು ವಿಫಲ ಯತ್ನ ನಡೆಸಿದ್ದು, ಅದೃಷ್ಟವಶಾತ್ 2 ಹಸುಗಳು ಕಳ್ಳರ ಕೈಯಿಂದ ತಪ್ಪಿಸಿಕೊಂಡು ಪ್ರಾಣ ಉಳಿಸಿಕೊಂಡಿವೆ. 

  

  ಕೋಟ ಠಾಣಾ ವ್ಯಾಪ್ತಿಯ ಮೆಕ್ಕೆಕಟ್ಟು ಶ್ರೀ ನಂದಿಕೇಶ್ವರ ದೇವಸ್ಥಾನದ ಸಮೀಪದ ನಂದಿ ಮರಕಾಲ ಹಾಗೂ ನಾಗು ಮರಕಾಲ್ತಿ ದಂಪತಿಯ ಮನೆಯಲ್ಲಿ ಈ ಕೃತ್ಯ ನಡೆದಿದೆ. ಮನೆ ಸೇರಿದಂತೆ ಸುತ್ತಮುತ್ತಲಿನ ನಾಯಿಗಳು ಜೋರಾಗಿ ಬೊಬ್ಬೆ ಇಟ್ಟ ಕಾರಣ ಮನೆಯವರು ಎಚ್ಚರಗೊಂಡ್ಡಿದ್ದು, ಕಳ್ಳರು ಸ್ಥಳದಿಂದ ಕಾಲು ಕಿತ್ತಿದ್ದಾರೆ. 

  ನಾಗು ಮರಕಾಲ್ತಿಯವರ ಮನೆಯ ಕೊಟ್ಟಿಗೆಯಲ್ಲಿ 4 ಜಾನುವಾರುಗಳಿದ್ದು, ಕಿಡಿಗೇಡಿಗಳು ಹಸುಗಳನ್ನು ಕದಿಯಲು ಪ್ರಯತ್ನಿಸಿದ್ದರು. ದನವನ್ನು ಕಟ್ಟಿ ಹಾಕಿದ್ದ ಹಗ್ಗವನ್ನು ಚೂರಿಯಿಂದ ಕತ್ತರಿಸುವ ವೇಳೆ ಒಂದು ಹಸು ಕೈ ತಪ್ಪಿಸಿಕೊಂಡು ಪರಾರಿಯಾಗಿತ್ತು. ಇನ್ನೊಂದು ಹಸುವನ್ನು ಬಲವಂತವಾಗಿ ಕೊಟ್ಟಿಗೆಯಿಂದ ಕಾರಿನ ಬಳಿ ಎಳೆದುಕೊಂಡು ಹೋಗಿದ್ದರು. ಕಾರಿಗೆ ತುಂಬಿಸುವ ವೇಳೆ ಆ ಜಾನುವಾರು ಕೂಡಾ ಖದೀಮರ ಕೈಯಿಂದ ತಪ್ಪಿಸಿಕೊಂಡು ಪ್ರಾಣ ಉಳಿಸಿಕೊಂಡಿದೆ. 

  ಈ ವೇಳೆ ಶ್ವಾನ ಹಾಗೂ ಜಾನುವಾರುಗಳು ಜೋರಾಗಿ ಕೂಗಿದ್ದು, ಕೂಡಲೇ ಮನೆಯವರು ಎಚ್ಚರಗೊಂಡು ಹೊರಗೆ ಬಂದಿದ್ದಾರೆ. ಮನೆಯವರು ಹೊರ ಬರುತ್ತಿದ್ದಂತೆ ಕಳ್ಳರು ಅಲ್ಲಿಂದ ಕಾಲು ಕಿತ್ತಿದ್ದಾರೆ.