ಮಂಗಳೂರು: ಪೊಲೀಸರ ಮೇಲೆ ಚಾಕು ಇರಿತಕ್ಕೆ ಮುಂದಾದ ರೌಡಿಶೀಟರ್; ಆತ್ಮರಕ್ಷಣೆಗೆ ಪೊಲೀಸರಿಂದ ಫೈರಿಂಗ್

•   Fri, May 10 2019 07:51:22 AM



• ಮಂಗಳೂರು, ಮೇ 09(Daijiworld News/SM): ನಟೋರಿಯಸ್ ರೌಡಿಶೀಟರ್ ಮೇಲೆ ಪೊಲೀಸರಿಂದ ಗುಂಡಿನ ದಾಳಿ ನಡೆಸಿರುವ ಘಟನೆ ಮಂಗಳೂರಿನ ಜಪ್ಪಿನಮೊಗರು ಬಳಿ ನಡೆದಿದೆ. ಕುಖ್ಯಾತ ರೌಡಿಶೀಟರ್ ಗೌರೀಶ್ ಕಾಲಿಗೆ ಪೊಲೀಸರು ಗುಂಡು ಹಾರಿಸಿ ಆತನನ್ನು ಬಂಧಿಸಿದ್ದಾರೆ. 

  

  

  ಗೌರೀಶ್, ಭೂಗತಪಾತಕಿ ವಿಕ್ಕಿಶೆಟ್ಟಿಯ ಸಹಚರನಾಗಿರುವ ಆಕಾಶ್ ಭವನ್ ಶರಣ್ ನ ಸಹಚರ ಎಂದು ತಿಳಿದು ಬಂದಿದೆ. 3 ಕೊಲೆ, ಕೊಲೆ ಯತ್ನ, ಉದ್ಯಮಿಗಳಿಗೆ ಬೆದರಿಕೆ ಕೇಸ್ ಗಳಲ್ಲಿ ಆರೋಪಿ ಪೊಲೀಸರಿಗೆ ಬೇಕಾಗಿದ್ದ. ಲೋಕಸಭ ಚುನಾವಣೆ ಹಿನ್ನಲೆಯಲ್ಲಿ ರೌಡಿಗಳನ್ನು ಗಡಿಪಾರು ಮಾಡಲಾಗಿತ್ತು. ಆದರೂ, ಗೌರೀಶ್ ಮಂಗಳೂರಿನಲ್ಲೇ ಓಡಾಡಿಕೊಂಡಿದ್ದ. ಈ ಹಿನ್ನೆಲೆಯಲ್ಲಿ ಆತನ ಬಂಧನಕ್ಕೆ ಸಿಸಿಬಿ ಪೊಲೀಸರು ಮುಂದಾಗಿದ್ದರು.

  ಸಿಸಿಬಿ ಪೊಲೀಸರು ಬಂಧಿಸಲು ಯತ್ನಿಸಿದಾಗ ಗೌರೀಶ್ ಕಾರಿನಲ್ಲಿ ತಪ್ಪಿಸಿಕೊಳ್ಳಲು ಯತ್ನಿಸಿದ್ದ. ಆತನನ್ನು ಚೇಸ್ ಮಾಡಿ ಹಿಡಿಯುವ ವೇಳೆ ಕಾರಿನಿಂದ ಇಳಿದು ಪೊಲೀಸ್ ಪೇದೆಗೆ ಚಾಕು ಇರಿಯಲು ಮುಂದಾಗಿದ್ದ. ಈ ಸಂದರ್ಭದಲ್ಲಿ ಆತ್ಮರಕ್ಷಣೆಗಾಗಿ ಸಿಸಿಬಿ ಪೊಲೀಸರು ಗೌರೀಶ್ ಕಾಲಿಗೆ ಗುಂಡು ಹೊಡೆದಿದ್ದಾರೆ. ಬಳಿಕ ಆತನನ್ನು ಬಂಧಿಸಲಾಗಿದ್ದು, ಗಾಯಗೊಂಡಿರುವ ಆತನಿಗೆ ಮಂಗಳೂರು ಖಾಸಗಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಲಾಗುತ್ತಿದೆ.