ಕಾಸರಗೋಡು: ಮನೆಗೆ ನುಗ್ಗಿದ ಕಳ್ಳರು- 35ಪವನ್ ಚಿನ್ನಾಭರಣ ಕಳವು

•   Mon, May 20 2024 07:23:52 PM



• ಕಾಸರಗೋಡು,ಮೇ 20(DaijiworldNews/AK): ಮನೆಗೆ ನುಗ್ಗಿದ ಕಳ್ಳರು 35 ಪವನ್ ಚಿನ್ನಾಭರಣ ಕಳವು ಗೈದಿರುವುದಾಗಿ ಕಾಸರಗೋಡು ನಗರ ಠಾಣಾ ಪೊಲೀಸರಿಗೆ ದೂರು ನೀಡಲಾಗಿದೆ.

  ಮೊಗ್ರಾಲ್ ಪುತ್ತೂರು ಮುಂಡಕಯಲ್ ನ ಮುಹಮ್ಮದ್ ಇಲ್ಯಾಸ್ ರವರ ಮನೆಯಿಂದ ಕಳವು ನಡೆದಿದೆ. ಮೇ 15 ರಿಂದ 19 ರ ಸಂಜೆ  ಸಮಯದಲ್ಲಿ ಕೃತ್ಯ ನಡೆದಿದೆ.

  ಮುಹಮ್ಮದ್ ಇಲ್ಯಾಸ್ ಗಲ್ಫ್ ನಲ್ಲಿ ಉದ್ಯೋಗದಲ್ಲಿದ್ದು , ಪತ್ನಿ ಆಯಿಷಾ ಫೌಶಿದಾ ಮೇ ೧೫ ರಂದು ಉಪ್ಪಳ ದಲ್ಲಿರುವ ತವರು ಮನೆಗೆ ತೆರಳಿದ್ದರು. ರವಿವಾರ ಸಂಜೆ ಮನೆಗೆ ಬಂದಾಗ ಕೃತ್ಯ ಬೆಳಕಿಗೆ ಬಂದಿದೆ.

  ಮನೆಯ ಮುಂಭಾಗದ ಬೀಗ ಮುರಿದು ಒಳನುಗ್ಗಿರುವ ಕಳ್ಳರು ಕೋಣೆಯಲ್ಲಿದ್ದ ಕಪಾಟನ್ನು ಮುರಿದು ಚಿನ್ನಾಭರಣವನ್ನು ಕಳವು ಮಾಡಿದ್ದಾರೆ. ಪೋಲಿಸರು ಸ್ಥಳಕ್ಕೆ ಆಗಮಿಸಿ ತನಿಖೆ ಆರಂಭಿಸಿದ್ದಾರೆ