ಮಂಗಳೂರು: ಖ್ಯಾತ ಕೊಂಕಣಿ ಸಾಹಿತಿ ಎಡ್ವಿನ್ ಜೆ ಎಫ್ ಡಿ'ಸೋಜಾ ನಿಧನ

•   Thu, Oct 26 2023 08:19:06 PM



• ಮಂಗಳೂರು, ಅ 26 (DaijiworldNews/HR): ಖ್ಯಾತ ಕೊಂಕಣಿ ಸಾಹಿತಿ, ಕೇಂದ್ರ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ ವಿಜೇತರಾದ ಎಡ್ವಿನ್ ಜೆ ಎಫ್ ಡಿ ಸೋಜಾ(75) ನಿಧನರಾಗಿದ್ದಾರೆ.

  1948 ಜುಲೈ 15 ರಂದು ಮಂಗಳೂರಿನಲ್ಲಿ ಜನಿಸಿದ ಎಡ್ವಿನ್ ಅವರು ಸೈಂಟ್ ಅಲೋಶಿಯಸ್ ಕಾಲೇಜಿನಲ್ಲಿ ತಮ್ಮ ಪದವಿ ಶಿಕ್ಷಣವನ್ನು ಪೂರೈಸಿದ್ದರು. ಕೊಂಕಣಿ ಭಾಷೆಯಲ್ಲಿ ಕಥೆ ಹಾಗೂ ಕಾದಂಬರಿಗಳಿಗೆ ತಮ್ಮದೇ ಹೊಸ ಶೈಲಿಯೊಂದನ್ನು ಪರಿಚರಿಸಿದ ಎಡ್ವಿನ್ ಅವರ 33 ಕಾದಂಬರಿಗಳು ಹಾಗೂ ನೂರಕ್ಕಿಂತಲೂ ಹೆಚ್ಚಿನ ಸಣ್ಣಕಥೆಗಳು ಪ್ರಕಟವಾಗಿವೆ.

  ಇನ್ನು ಇಂಗ್ಲಿಷ್, ಹಿಂದಿ ಸೇರಿದಂತೆ ಆರು ಭಾಷೆಗಳಿಗೆ ಎಡ್ವಿನ್ ಅವರ ಕೃತಿಗಳು ಭಾಷಾಂತರಗೊಂಡಿವೆ. ಎಡ್ವಿನ್ ಅವರ ’ಕಾಳೆಂ ಭಾಂಗಾರ್’ ಕಾದಂಬರಿಗೆ 2013ನೇ ವರ್ಷದ ಕರ್ನಾಟಕ ಸಾಹಿತ್ಯ ಅಕಾಡೆಮಿ ಪುರಸ್ಕಾರ ಹಾಗೂ ಅದೇ ವರ್ಷದ ವಿಮಲಾ ವಿ ಪೈ ಪುರಸ್ಕಾರ ದೊರಕಿತ್ತು. ಇದೇ ಕಾದಂಬರಿಯ ಇಂಗ್ಲಿಷ್ ಭಾಶಾಂತರಕ್ಕೆ ಎಡ್ವಿನ್ ಅವರು 2016ನೇ ಸಾಲಿನ ಕೇಂದ್ರ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿಗೆ ಭಾಜನರಾಗಿದ್ದರು. ಕೇಂದ್ರ ಸಾಹಿತ್ಯ ಅಕಾಡೆಮಿಯ ಕೌನ್ಸಿಲ್ ಸದಸ್ಯರಾಗಿಯೂ ಸೇವೆ ಸಲ್ಲಿಸಿದ್ದ ಎಡ್ವಿನ್ ಅವರು ಉತ್ತಮ ಸಂಘಾಟಕರಾಗಿಯೂ ಕೊಂಕಣಿ ಸಾಹಿತ್ಯ ವಲಯದಲ್ಲಿ ಎಲ್ಲರಿಗೂ ಆಪ್ತರಾಗಿದ್ದರು. ವೃದ್ದಾಪ್ಯ ಸಹಜ ಸಮಸ್ಯೆಗಳಿಂದ ಕೆಳ ತಿಂಗಳಿಂದ ಮಂಗಳೂರಿನಲ್ಲಿ ವಿಶ್ರಾಂತ ಜೀವನ ನಡೆಸುತ್ತಿದ್ದರು.